謝謝寫下這麼用心的一篇文字。🙏🏻
【10號仔：RubberBand】
每月10號畫一個10號仔，4月10號，畫夠4個———RubberBand（橡膠樂隊）———左至右：鼓手泥鯭、主音結他手兼隊長阿正、低音結他手阿偉同主音6號。
如果「10號仔」係代表緊果隊波，咁香港樂壇組合嘅「10號仔」非RubberBand莫屬，不論係佢哋音樂風格同一路走來嘅心路歷程，都好「香港」。
RubberBand由2004年正式組班，「地下樂隊」咗好幾年，2007年自薦搵公司，2008年於金牌娛樂／金牌大風正式出道，一嚟就拎咗叱吒新力軍金獎，2009-2013年可謂樂隊高峰期，先後拎過叱吒組合、我最喜愛男組合、年度專輯、同埋各台嘅年度十大歌曲好多次（唔數喇），當中《Simple Love Song》、《Easy》同《睜開眼》仲拎埋當時仲在生嘅「四台冠軍歌」！頒獎禮上，最有印象係喺叱吒台上面，以兩支結他簡單伴奏（主要係阿正彈），6號接近清唱咁演繹咗年度歌曲《Simple Love Song》，要知道呢首歌當初係由阿正寫，本身仲諗住麻麻地唔想要，好彩最後無掉到，起死回生。及後2014年轉會到寰亞唱片，出咗兩張大碟，拎到唔錯成績，特別係《Frank》同隱藏版《Frank?》大碟，睇得出RubberBand不斷求進，喺既有模式當中再進化，亦嘗試跳出框框。合約期滿後，RubberBand又再回歸獨立，但唔再「地下」，直至現在，希望唔係永遠……因為「獨立」，永遠都要面對一個好現實嘅問題：資源分配。所有嘢都要自己嚟，宣傳、聯絡、金錢、時間、精神體力、不同專業範疇等等都係一個挑戰。不過對於創作人嚟講，相信無嘢係比「自由」更可貴，同時保持初心係最重要。所以幾時都話：「走自己風格係最有型，但亦係最危險」，RubberBand之所以選擇獨立，可能其中一個原因就係想繼續做自己。可幸嘅係RubberBand一路走來，始於如一，無比市場定型、不甘固步自封，最難得係，仲有團火。
RubberBand由五缺一，到四加一。講緊係Keyboard手藝琛早早係2010年因健康為由離開咗樂隊。但好好彩，RubberBand團隊背後其實仲有個好重要嘅人一直Backup住佢哋：一位個樣似楊千嬅、歌聲優美到可以做幕前嘅填詞人Tim Lui，佢仲要係主音6號嘅太太嚟添！根據非正式統計，Tim Lui至今包辦咗RubberBand超過80%以上嘅歌詞，好多成名作都係出自佢手，例如《阿波羅》、《Simple Love Song》等等，當然唔少得佢同老公合唱嘅《Slow & Easy》啦！不過Tim Lui最犀利嘅地方係題材多變，中英都得！就好似一隊波有幾個進攻點咁，中場傳直線又得、左右閘Overlap落底傳中又得，無得輸呀！
講起「多變」，一般嘅組合都有既定嘅市場定位，令受眾容易Search到想要嘅嘢。不過RubberBand最特別之處就係有個人風格得嚟又有驚喜。作為男子樂隊，佢哋無吓吓嗌爆咪唱到聲嘶力竭、無限Loops啲「當兵」歌，反而係Keep住「一聽就知係RubberBand」*嘅特色，再不斷尋找可能性，真係要乜有乜，仲要瓣瓣掂：
要慘情嘅有《零度聖誕》、《Secret》；
要抒情嘅有《城記》、《寂寞島嶼》；
要柔情嘅有《喜宴樂隊》、《你和我》；
要激情嘅有《前面尚有一萬里》、《Gotta Go》、《逆流之歌》；
講友情有《心照一生》、《未來見》；
講親情嘅有《M.A.M.A》、《G.I.》；
講社會民生嘅有《Easy》、《放》；
借足球講少數族裔嘅有《細街杯》、《黑雞》；
講掙扎求存嘅有《3字頭》、《挾持》；
講時事政治嘅有《睜開眼》、《語言藝術》、《脫軌時刻》
……首首好歌，實在太多，不能盡錄。
除咗啲歌好聽之外，同時必須留意嘅係RubberBand嘅Music Video，全部都好似藝術品一樣，滿載詩意！呢樣同6號嘅身份有關，皆因出道前嘅佢係喺港台做助導，有深厚嘅功力（特別係美學上嘅修行）。呢家RubberBand嘅MV全部都由佢親自操刀開鏡兼剪接，可謂多才多藝。首推《是時候》同佢孖生啊哥《Simple Love Song》嘅MV，西環取景，拍出香港嘅節奏同寂靜；《你和我》，透過充滿力度嘅舞蹈演繹出「溫柔」；《未來見》，好友之間所產生嘅隔膜，就好似睇緊一套微電影咁……好多好多，好很精彩。
RubberBand出道至今10年多，由20幾歲不斷衝衝衝試試試，才華洋溢又不失玩味性質，到呢家多咗陣「佬」味，無論曲詞編唱甚至MV一地都係，可以話同聽眾一齊成長緊。講緊係聽聽吓（或睇睇吓個MV）會唔小心代入咗、流咗滴眼淚、夭心夭肺咗大半日果隻，可能有返啲經歷嘅人會更明白吧……好嘅音樂，該當如此。正如真正世界級嘅球員，係唔會單一招死衝爛衝踢到尾，隨住時代轉變，應該要不斷反思、改變踢法，轉換形態，咁就算踢到50歲都仍然可以繼續———希望50歲仍然可以聽到RubberBand到時嘅新作，於願足矣。
*RubberBand初出道曲風偏向Smooth Jazz同Funk，舒服順耳得嚟有節拍感，例如《小涼伴》、《遊車河》、《一早地下鐵》、《發現號》咁，不過隨住藝琛嘅離開，慢慢地轉形、進化。陣痛過後，造曲旋律上比以往認真細膩、而且愈造愈「精緻」，聽得出用咗好多心力做Mixing，同埋開始好識運用6號把咁獨特嘅聲線去「點睛」（例如《山河故人》唱出果種無奈感，一絕也）。特別係最近兩三張大碟，好似聽緊6號用佢把聲去詮釋緊一套戲咁，好精彩。所以，有一個好嘅主唱，同一隊波有個識踢嘅10號仔一樣，事半功倍。
#RubberBandHK #RubberBand #HongKong #Music #廣東話
https://www.instagram.com/10hojai/
是時候 rubberband 在 o歌詞中『睜開眼』原本是『fi - Facebook 的推薦與評價
【RubberBand泥鯭：是時候反撃】 正當全城樂迷正密切留意RubberBand會否辭演七一維穩騷，鼓手泥鯭剛於Facebook留言：「猶記得《睜開眼》demo歌詞中『睜開眼』原本 ... ... <看更多>