假如日本既生活係咁既話，你仲想唔想黎？
#恐怖系列
騙徒既呃like手法層出不窮。係咁講日本有幾好，甚至用「一去愛上」、「去上癮」之類既字眼等等，每次見到我都不期然冷笑左一下。風小姐好想同大家講一個故事：
[以下故事純屬虛構 (除非唔係)。如有雷同，實屬巧合。故事主人翁以「我」為自稱。］
我去左日本某個地方 (應該係南邊，我方向好差) 既滑雪場幫手。當我以為係京都番12個鐘一日得45分鐘休息已經係好攰既事既時候，我竟然就再度突破我既界限，連踩14個鐘加送1.5小時休息(而當中有半個鐘休息時間係會計埋我由A地點移動去B地點番工 (需要步行路程10分鐘) + 去廁所 + 食飯 + 由運動裝換成西裝制服既時間，我頂，即係冇得抖啦!) 我嘗試問自己係咪個種俾d阿叔話「你班後生仔唔捱得」個一班人既其中一個既時候，但我去到大概9PM既時候，真係行行下有d頭暈同體力不支既感覺，如果捱唔住等於唔捱得，好，我認我衰仔。我除左大半日時間著住滑雪鞋同拎住滑雪gear行上行落之外 （其實真心幾重下），另外3成時間就係著住對高跟鞋係餐廳行黎行去。好有趣既佢地光明正大話希望大家Multi-task咩都識，我頂你，其實好撚明顯係唔想請人而又用盡現有同事既體力 (盡到一個做到你超攰就快暈但又死唔去既地步)。黎左冇耐，已經聽到唔少人辭職。
一開始黎既時候上briefing，所有新黎員工一齊上，當中有7成外國人+3成日本人，而我地外國人入面，有5成係唔識日文。但話說個briefing，又真係全日文咁棧鬼，夠膽死一隻英文都冇上足兩日。有一堂佢問大家問題然後要分組討論，我忍唔住舉手話呢度D外國人唔識日文，佢就同我講咁你做翻譯啦，或者用手機翻譯都得。WTF!? 於是乎幾乎所有外國人都係坐哂係度呆Q左，最好笑佢前一張slide先話公司好講求員工雙向溝通，成件事根本係廢up。個問題係，你地想請外國人黎做野，但竟然所有配套都仲係聰明笨伯個種石器時代。
大家肯定以為係日本番工肯定好多加班費。其實日本既加班費係唔會咁容易俾你拎到。除左我曾經聽過有人話為左保住份工，就算加班都堅持要6pm打卡既人大有人在之外，而我就係 (被) 用月計去計你加班費。所以就算每日做多過14個鐘，但放番你一日補假，即係變相冇補水。但呢日補假，就當然唔會係有薪假啦傻豬，我地呢d用鐘頭去計既又點會有呢!!
員工餐食咩? 首先，員工餐係要錢既，餸並唔係任拎。我第一次行過去員工餐廳既時候我以為我去左鬼屋，兩邊既牆滲滿左霉菌咁污糟，好似俾人地屠殺過個d地牢。餐廳只有黃昏先開所以放假既話早午係唔會有野食，就算唔放假你都係食番尋晚隔夜菜。而我食左三四日之後好想出去出面食，不過係呢個白雪世界係唔係有分出面同入面，而只係會有入面only，食極都係你主子既地頭，所以又再次上貢左d糧餉俾主子。而係真正既餐廳食野，我聞到一陣陣香味，先至醒覺我從來冇係員工餐廳聞過任何一陣香味，感覺好似前世未食過好野咁。的確，因為佢所有既肉，全部都係一pack pack真空處理，想食稍微新鮮少少dd咁多既野，咪洗旨意。有一次我買左個魚餐放飯盒諗住第二日食，我太攰訓著左冇放雪櫃直至第二日晏晝都一直室溫狀態都竟然冇變味!!!!! OMG! 係，我照食左...-.- 可想而知，我食緊幾多化學野落肚。
算啦！當係我唔知道搵錢辛苦，但最令我唔爽既一樣野係，係雪地有客既時候唔可以帶墨鏡，咁即係係雪場9成時間都唔可以戴啦。但有趣既係，佢成日同你強調公司好注重安全 (可能我理解能力低，我懷疑只係客人既安全，而冇包括員工既安全)，咁同事對眼就係屎?? 大家應該都知道係雪地既UV係強到會令你眼都盲架可?
幸好既係，我係度認識左好多新朋友，如果唔係有佢地陪伴，我諗我都唔會番得開心。但實驗證實，日本既公司其實都幾刻薄。
[故事完畢]
故事講完，我相信係日本係有好多好公司，呢d咁奇怪既例子係唔應該係真實世界上出現。我相信各位係日本生活應該會有好開心既回憶。祝福各位。
是日學習點: 1)出外靠朋友，2)大家唔好成日望住日本地圖ff，3)曲線要講明，4)一山還有一山低
