終於睇完第五季《House of Cards》，個人覺得經過第三季因為要講「人性」要跌至谷底之後，第四季係稍為回勇，第五季雖然有好多位唔係好講得通，但因為有Trump Trump效應加上戲劇性搭夠，比第一二季當然差好遠，但綜合黎講都只係比第四季差少少，絕對睇得入眼（甚至一路都係用「追」嘅方式一路睇到最尾）
詳細感想遲下有機會再講，但好多人話Underwood夫婦弱智做錯哂決定，我想講反而係第一、二季太神，成日都可以絕地逆轉反勝我先覺得唔真實，根本呢兩夫婦始終都係以高壓方式守住自己權力同迫人屈服，次次都贏先至係問題，到後面要冚住嘅局愈來愈大，左支右絀嘅情況自然愈來愈多；正正因為積埋積埋太多問題，劇尾諗住扭橋一次過「Restart」反而令我覺得係相當合理。
至於對手響關鍵時刻弱智化呢個問題，其實前幾集都不斷重覆架啦（除咗Viktor Petrov 之外根本無人唔係），Will Conway變咗死小孩同第四集近乎完美形象相比固然係有啲失望但亦不意外，而且Mark Usher同Jane Davis接手做幕後推手全力離間佢兩夫婦其實個感覺又唔太差，所以都唔算係致命傷口。
《House of Cards》玩到第五季，總統權力點都要塵埃落定，再玩落去都玩唔倒咩出樣，反而Frank Underwood睇得穿有啲權力係要響體制外掙取，偏偏諗唔倒當你稍為信任一個人時就係你破滅嘅開始，呢啲就係追求權力嘅人嘅宿命，唔駛回望美國政壇、睇下香港政壇百態，一樣好易搵倒例子。
但其實去到呢度，先真正講倒我想講的嘢，就係Frank Underwood明明就係一個硬派嘅共和黨總統，但偏偏套戲夾硬設定佢係民主黨員；同Will McAvoy明明立場民主黨到不得了，《Newsroom》就係夾硬話佢係共和黨支持者，真係相映成趣。
