［是日金融大刁］一哥買二哥喎，仲唔大刁？
1. 咩公司來？明顯特登我唔畀英文名你睇，如果見到個中文譯名嘅，大約估到。速匯金嘛，怕且都係匯款公司。睇埋英文士篤曲，MGI，應該有機會估到係Money Gram
2. 實情我都匯過錢（匯去台灣咪試過），但只經銀行。我連街邊啲乜氏兄弟都冇幫襯過（唱人仔現水就有嘅）。完全唔知Money Gram點玩
3. 對了，無啦啦咁升，首先你都估到，畀人收購啦。買佢嘅，正係更大嘅Western Union，西聯匯款。曾經去旅行周圍都見。傳聞啫，未有細節
4. 我畀呢張圖你睇，就梗係靚啦。破晒頂喎。不過叻嘅，留意下時間軸。如果我拉一年，已經唔同，隻嘢舊年9月有6蚊
5. 但呢度都未係最精彩，睇長少少？2017年，18蚊。
6. 再睇長啲？金融海嘯前，隻嘢係……300蚊！而家得返3蚊。醫返都嘥藥費，or not？（話時話，招緊股隻網易，2000年上市係3蚊，而家係400蚊美金）
7. 但凡呢啲畸屎，都唔使講。梗係賺唔到錢。股票反唔反映盈利或基本因素，睇你點理解，但長期個圖斜上去嘅，絶大多數都係越賺越多。好似Money Gram咁，300跌到3蚊嘅，唔使審都知係蝕錢多過賺。但我當然有睇過，近年的確蝕錢居多。原因？科技先進吧。呢啲以前因為匯款又難又煩，收你好重手續費。而家好多網上搞嘅，都相當簡單了。仲唔使養住一班人或租個舖位。
8. 仲有多個重點，睇下個市值？2億美金。仲係升咗之後。未升前係億幾美金。「殼價」都唔值。
9. 但即係，就算一張廁紙、一條底褲，都有佢本身嘅用處。其實原本Money Gram有人買。但買家係大陸公司，螞蟻金服，阿里巴巴嘅東西。當然就唔批了，說好了的自由市場。
10. 而家買嘅，正係Western Union西聯。其實係一哥吞二哥，又睇下有冇人出嚟話反競爭先。喂，你計正常孖劇些呀，一哥食二哥，點會唔反競爭？但你計埋啲 Fintech firm，又唔同嘅計法。所以之前寫文都講過，呢啲反競爭法，只係益咗啲官，顧問公司（前官），同埋律師。係rent seeking嘅完美示範．Market segment根本任你劃
11. 講返，最大嘅，Western Union西聯。你見一出呢單傳聞，西聯股價都升10%！「咁就已經證明係反競爭」。
12. Western Union，市值當然就大好多，近100億美金。近年都賺到錢，浮浮沉沉咁，好景時咪十億八億美金，差嗰時兩三億甚至輸錢都試過。股價，都係差不多咁，浮浮沉沉。
13. 對於呢類刁，分析員有個名詞，就叫做兩個醉酒佬互相扶持。實情成個行業仲有冇得做架呢？係咪應該會畀科技淘汰？
———————
版務：收費專欄已減價。支持埃汾高質文章。
一星期三篇，$175睇到6月22號，加埋過去兩個幾月所有文章。
請去呢度訂：bit.ly/2wVXndj
課程編號填: CC01
報完會有email通知，繳費後有Login及Password
逢一三五入去 homebloggerhk.com （入到去就睇到《事先張揚》）
亦睇得返以前嘅文。一般我都係會黃昏出文嘅。
