【縮水姆欽】
拿，我個人呢，就好照顧粉絲既。所以响分享我對呢單新聞既睇法之前，我先用中文解釋一下篇野係講乜既先。
報導話，美國既財長姆欽決定唔延長一批將會响今年年底到期既救市措施，同時將有關既資金從聯儲局既手上收回。受影響既，包括早前惹黎抨擊，被指干預自由市場經濟，購買私人企業債券黎拯救瀕危中小企既備用資金，相關既金額最多可以高達兩千億美元。
對於姆欽既舉措，市場一般認為佢老人家係支持侵侵既，用意係明知道拜登上任之後，財長唔再係佢，所以家下擺到明落雨收遮，等下一任既財長無錢救市，或者至少都要經過一大輪繁文縟節，先至可以重新調撥到新既資金黎撐聯儲局。簡單講，即係擺明玩野。
其實呢單野有兩個重要既啟示：第一、聯儲局既救市資金已經唔再係無限，而變為有限，以後大家唔好咁腦定；第二、就係侵及其自己友就算明知自己果頭近，都會無所不用其極咁，將所有响過去四年由自己一手一腳建立既野摧毀到變成一攤屎，俾拜登做賀禮。
拿，你又當我杞人憂天都係咁話架喇，侵成日都話：美股之所以創新高係佢既功勞，咁你估下佢下一步會搞咩？
🤭
#美國財長 #姆欽 #聯儲局 #救市基金
