#非廣告
又講下貼紙嘞。呢排準備緊下星期去俄羅斯啲嘢，兼且趕稿趕到想死；喺呢啲忙到出煙嘅日子，逐張逐張貼紙咁貼上本集圖冊度呢個行為實在非常之咁治癒，亦已經變成最近僅有嘅娛樂；喺上一篇 #世界盃集圖冊回憶 入面講過，家一係唔敗，一敗就要敗到盡，所以我最後都係敗埋套瑞士硬皮金版。
我係透過生產商個App訂嘅。一本金版硬皮集圖冊連一百包貼紙盛惠115歐元，另加50歐運費(！)。我就建議大家夾埋朋友一齊訂，因為佢買夠某個金額可以免運費，兩本加埋買就慳成百歐。而呢個Box Set，我測試過，每個a/c一次過最多可以訂三套；即係話如果你要訂四套，2x2咁買就最抵。
運費貴係有理由嘅，因為佢個Express Courier真係好快送到嚟；由訂嗰刻到個速遞員嚟到我屋企門口，一個星期都唔駛。打開個盒嘅時候我直頭雙眼發光：由封面到內頁紙質再到貼紙本身都同普通版唔同，非常高汁，好靚好靚好靚。
不過靚極都係要拆嚟貼嘅。我想講如果你之前冇玩過普通版、一開始就玩呢套套裝嘅話，你絕對會有「乜咁容易儲齊㗎咋？」呢種錯覺。一啲喺平時極少甚至唔會出現嘅情況，嚟到呢度就變成乜都有可能：乜一包兩閃、甚至三閃呢啲咁喪盡天良嘅事都可以發生㗎咩？成隊爭一張，下一包就竟然有埋，感覺好似打牌鋪鋪叫卡窿都食得出咁。我唔知散買會點啦，但係根據我同另外三個畀我毒咗去一齊玩金版嘅朋友(我想講，毒到人個感覺仲滿足過儲齊🤪)嘅經驗，Box Set嗰一百包係極少重複嘅。我啱啱開晒一百包，得13張重複；我哋四條友入面暫時最叻仔嗰個，得四 - 張 - 重 - 複！(另外留意，我哋幾個重複嘅全部係閃貼同Team相，一個球員都冇)
我而家已經儲咗486張(本來就應該487嘅，但由於其中一張貼得唔正，我想起番出嚟再貼嘅時候粗暴得滯，撕鬼爛咗🤦🏻♂️)，不過問題又嚟嘞：剩低嗰一百九十幾張點算呢？官網除咗Box Set之外就唔見有金版貼紙、eBay又淨係得散裝、香港就更加少見；仲有嗰12張可樂Legends，怕且都係要喺eBay搞埋佢嘞。請問有冇師兄可以賜教？
Btw，希望我可以毒到你。冇咩事我死番出去寫稿先；順手賣下廣告，今年我本書嘅主題講男人嘅集體回憶，咁當然又會提下呢本集圖冊咁啦。書展會出㗎喇，支持下吖！
世界盃集圖冊回憶 在 香港集圖冊貼紙同盟促進協會 - Facebook 的推薦與評價
香港集圖冊貼紙同盟促進協會在 2018年世界盃貼紙交換會花絮相簿中新增 了1 張相片— 參加 2018年世界盃第一次貼紙交換大會──在 732 Traumhaus Fußball & Party 。 ... <看更多>