來自星星的猩猩（上）
見到呢隻猩猩，我知道，我嘅人生即將有突破。
尋日，政府喺郊野度發現咗隻飛碟，飛碟嘅科技遠超地球嘅水平，當然即刻被運去研究。
飛碟內只有一隻貌似猩猩嘅生物，作為動物學家，我被任命為「星星猩猩研究組」嘅組長，負責研究呢隻猩猩嘅狀況。
第一個正式研究外星生物嘅動物學家！諗吓都令我熱血沸騰。
我直情搬去研究所，日以繼夜咁對住隻猩猩，希望儘快得到成果。
測試完基本生理狀況後，就開始測試佢嘅智商。
佢嘅智商出乎意料地高，我哋好快就教識佢寫字，可以好似人類咁溝通，不愧係外星猩猩。
我問佢：「你喺邊度嚟㗎？」
猩猩寫咗一個名，我當然睇唔明，可能係佢個星球嘅名掛。
我又問佢嚟做乜，佢寫咗個單詞「開心」。
嚟地球開心？有幾開心？我繼續同佢用紙筆傾計，教佢哋球人嘅用字。
我本來以為，我哋會咁樣相處一段時間，我就出番篇論文，講外星猩猩嘅特性。
根據政府安排，猩猩寫嘅所有嘢，都要交畀政府留底。
有時猩猩寫一堆亂七八糟嘅字母同符號，我都睇唔明，只係照交上去。
點知，無幾耐，總統居然出現喺研究所！
據講，猩猩喺其中幾張紙裡，寫咗一種武器嘅研製方法，
嗰種武器嘅科技水平至少超前五十年，應該係外星人用嘅武器。
如果我哋掌握更多高科技武器，就有更多嘅國際話語權。
所以，總統專登嚟觀察隻猩猩，將猩猩嘅存在列為國家機密，嘉許我嘅努力，
並且畀我一個重要嘅任務：喺猩猩身上發掘更多武器嘅科技。
我呆咗：「佢......佢係一隻猩猩啊，佢點會識乜嘢科技？」
「佢來自外星，可能偷睇咗外星人嘅科技呢。」
總統答：「原因唔重要，總之依加嘅情況，就係猩猩掌握咗重要嘅科技。」
雖然大家都充滿希望，但我都係無乜信心，從一隻猩猩身上學整武器喎，始終覺得有啲荒謬。
死馬當作活馬醫，我只好問：「有無犀利嘅武器？」
猩猩寫：「香蕉。」
我遞咗兩條蕉畀佢，跟住佢就埋頭苦幹，寫咗一堆嘢出嚟。
我當然唔識睇，交畀軍事專業分析，發現佢寫嘅，係核武器防護罩嘅研製方法。
顧名思義，就好似科幻片咁，受到攻擊時，會出現一個透明光幕，
其實係能量場，喺短時間內吸收大量能量，擋住核武嘅衝擊波、光輻射、放射性塵埃等等。
軍事專家們熱血沸騰，迅速調動大部份資源展開研究，證實核武器防護罩確實有效。
本來，各國都唔會動用核武，係因為核武破壞力強而且難以防禦，用核武必然導致核反擊，於是同歸於盡。
依加，我哋有咗防衛核武嘅可靠方法，咪即係話我哋可以用核武，而又唔怕其他國家嘅核反擊？
政府中嘅主戰派極度興奮，聲稱我哋唔駛再同敵國談判，為咗一丁點嘅利益殫精竭慮，我哋可以直接開戰！
主戰派強調，暴力唔可以解決問題，但絕對嘅暴力，可以消滅帶來問題嘅人。
我覺得有啲唔妥，雖然我一向同動物打交道，對軍事科技一竅不通，
但純以邏輯思考，咁勁嘅核武器防護罩，用兩條蕉就換到，係咪唔太合理呢？
我表達出我嘅諗法，但所有人都同我講：「嗰隻只係猩猩啫，猩猩邊度識『抵唔抵』吖，畀條蕉就咩都講晒，有幾奇？」
總統仲直接回覆我，叫我唔好諗咁多，
我唯一嘅任務，就係繼續努力，喺猩猩身上掘出更多武器嘅資料。
事情一步步發展，政府竭盡全力，將核武器防護罩安裝好。
然後，我國喺國際對話中姿態強硬，屢屢以核武作威脅，其他國家當然不以為然。
無幾耐，我國動用核武，毀滅咗長年敵對嘅A國嘅一個城市。
各國都譴責我國，A國迅速以核武反擊，但眾目睽睽下，戰無不勝嘅核武，被防護罩擋住，消弭於無形。
總統好開心，主戰派好開心，似乎我哋成為地球上最強嘅國家，指日可待。
至於我嘅工作，係繼續對住隻猩猩。
我將啲片播畀猩猩睇：「你寫出嚟嘅防護罩，真係好勁喎。」
猩猩手舞足蹈，好開心好自豪咁樣。
「你有無其他武器嘅研製方法啊？依加開戰啦，寫出嚟，幫吓我哋國家啦。」我遞咗兩條蕉畀佢。
猩猩一路食蕉，又寫咗幾種外星武器嘅研製方法。
下集：http://bit.do/fs83Q
將專頁設定為「搶先看」/ "See first"，最新故仔馬上睇！
拯救咗地球，之後呢？：https://goo.gl/EVhESA
我嘅職業係：白狐俠：http://bit.do/eJkZ4
#短故 #短篇 #小說 #陳美濤 #廣東話 #粵語 #tomatochan #來自星星的猩猩
防護罩安裝 在 專業測速器、雷射防護罩討論區~ | Facebook 的推薦與評價
柯沅璋. 我想了解原本舊車前後hp905是否能拆下來安裝在新車上，店家是否有代工$. Share. 1y · 單澤皓. $. Share. 1y ... ... <看更多>