Juno同Kay嘅新Project用音樂飾演董折同浦銘心，故事線本來已經夠吸引，故事由1986年切爾諾貝爾核爆事件講起，兩個反叛少年由17歲愛得轟轟烈烈早婚生子，到28歲疲於奔命，相對無言。
早幾日又釋出新章節，搵到古天樂同Kay合唱《（一個男人）一個女人和浴室》，故事推進至蒲銘心另嫁財經新聞報導員藍定凌，亦即係古天樂是也。
古老闆由十幾年前嘅《今期流行》封口至今，如今開金口固之然話題性十足，但我更驚訝嘅係Juno擁有嘅創作才華同執行能力。
Juno由2002以《愛上殺手》出道時，俾人恥笑佢唱歌難聽、馬面、買Fans，可謂係由內至外都被香港樂迷嫌棄。
既然此路不通，佢就另闢蹊徑，2005年推出《雌雄同體》，銳意向非主流曲風發展，後來幾年接連推出《酷兒》、《弱水三千》、《超生培慾》、《彳亍》等等，涉獵同性戀、戀物癖、佛經禪學等題材，當然不得不提2015年嘅《念念不忘》同《羅生門》，續寫十年前唱到街知巷聞嘅《耿耿於懷》，由Kay狠狠戳破長達一個decade嘅癡情幻想，十年磨一劍，又一次證明咗佢嘅音樂品味同執行能力。
除咗音樂，佢嘅電影事業亦都令人眼前一亮。2009年第一次寫劇本《復仇者之死》就身兼男主角，雖然喺香港冇乜人識，但係獲得莫斯科國際電影節「最具文本哲學獎」同「最佳導演」，仲攞埋韓國富川國際奇幻電影節嘅「最佳男主角」。
我諗香港人真正發現Juno嘅電影才華，係2013年上映嘅《殭屍》。佢唔單止自編自導，仲請到日本恐怖大師清水崇監製，搵到昔日港產殭屍片iconic人物錢小豪、陳友同樓南光，電影嘅水準有目共睹。
儘管如此，有人係都要唱反調，話Juno有錢所以先搞得成以上嘅事。係，的確有錢嘅話，你係可以連甄子丹同李連杰都打得贏，但係搞得成事，同搞得好件事，係兩個完全唔同嘅層次。
早前睇過《JET》訪問，講Juno執導《風林火山》接近煞科時：
「當時身在零下25度的雪山之上，一間現已被拆的鎢絲廠裡。我們在極嚴寒的地方中拍攝，一眾科技產品出現問題，電話沒電，充電器沒電，正因如此，演員和我同樣全程投入創作，盡力演戲，人人都變得很專注，這是非常難能可貴的。就在極嚴寒的地方，我便想出這對戀人的故事，然後一落山就立即打電話給Kay，告訴她這兩個角色在雪山上出生了。」
Kay話記得當日半夜收到Juno連續send好幾個長達30分鐘嘅voice message過嚟，一輪嘴講呢兩個當時連名都未有嘅角色同故事，如果你覺得Juno咁樣已經好瘋狂，其實未算，因為原來連林夕、黃偉文、周耀輝、Jerald等等都收到呢個狂人嘅voice message轟炸。
Kay喺訪問話Juno真係好厲害：「當中牽涉這麼多位很有性格的人，有時候要協調他們，本身就是一場很好看的表演了。」
然後今日我喺YouTube撳下撳下，無意中聽到一個Juno嘅訪問，講佢點樣去說服古天樂開金口同Kay合唱，大意係話，藍定凌呢個角色係一個木獨平實嘅男人，佢只係大概知道浦銘心嘅過去，但確實知道有咩係唔應該講唔應該問，而佢好清楚浦銘心只當佢係一個在世間最亂時最穩的牆，但就算係咁，佢都默默祈求上帝，呢種安穏生活可以被浦銘心欣賞。
Juno同古天樂講，藍定凌就係一個成日聽到老婆喺浴室唱歌，而佢就算唱得唔好，都仍然想陪老婆唱呢首歌嘅人。
聽到呢個訪問，我大概明白Kay話Juno協調咁多叻人已經係一場表演嘅意思。
我諗，或者古天樂就算唔係被呢番說辭打動，都係因為Juno而首肯演出──Juno用十幾年時間證明，就算唱得唔係最好，佢都有能力成就一個音樂品牌、一種質素保證，一掃當年嘅所有負評。
