大俠老咗之後（下）
上集：https://bit.ly/3gwFEwr
唉，我真係好擔心佢。
佢條腰好番少少，就開始每朝起身紮馬。
佢話想做多啲運動，練好個身體，長命啲喎。
唉，我點會睇唔出，佢係想練番好武功，做番大俠，懲治鍾老虎。
但佢已經七十七，仲有風濕……唉，我唔講你都明啦。
有一日，鍾老虎嘅大宅張燈結彩。
原來，佢嗰個做縣太爺小妾嘅妹妹有咗，而縣太爺生咗五個女，至今無子，所以縣太爺馬上當呢個小妾如珠如寶。
鍾老虎大肆慶祝，亦代表佢喺呢個小鎮嘅權勢達到頂峰。
書生睇唔過眼，拖住殘腿上門鬧事。
嗰一晚，鍾老虎嘅大宅外，全部都係血。
鍾老虎聲稱，書生企圖刺殺佢，佢自衛所以殺咗書生。
事實係唔係咁？冇人知。
大家只知，書生個妹披麻戴孝，跪喺大宅門外，聲稱要幫阿哥討回公道。
但一晚之後，佢就消失咗。
夜晚，大宅隱約傳出女仔嘅呼救聲。
老公知道咗呢件事，嬲到成面都係青筋。
我緊緊捉住佢隻手，係咁同佢講，我哋老啦，我真係好驚會失去佢。
佢忽然問我，記唔記得當年我哋路過另一個小鎮，遇到一個惡霸，確定佢惡貫滿盈，最後我哋一齊殺咗佢，全鎮嘅市民都拍手叫好。
「我記得，但呢件事係五十年前啦。」我一字一頓咁講。
老公垂低頭，冇再出聲。
自此之後，我每日都睇實老公，好驚一睇漏眼，佢就衝咗出去搵鍾老虎。
但有一日，我嘅老毛病發作，要去醫館搵大夫。
我千叮萬囑叫啲伙計睇住老公，千祈唔好畀佢出去，伙計拍晒心口咁應承。
嗰日醫館好多人排隊，到傍晚我返到去嗰陣，見到兩個荒失失嘅伙計。
佢哋話，一個唔覺眼，老公就唔見咗。
我跑去後院，見到樹下挖開咗一個大洞。
三十年前，我親眼睇住老公將把寶劍埋喺度，再種咗棵小樹苗。
依加樹苗已經變成大樹，飛大俠已經七十七歲……
我衝去向鍾老虎嘅大宅，我發誓我一生人從來冇試過跑得咁快。
但我都係遲咗。
大宅門外，鋪滿肉碎，仲有一把寶劍。
或者冇人會覺得佢係「寶劍」，只覺得係一把生鏽嘅劍，但喺老公心目中，佢永遠係寶劍。
係我心目中，飛大俠永遠係大俠。
我冇出聲，冇披麻帶孝。
我沉默咁離開，第二日，我沉默咁去咗藥材鋪，沉默咁買咗一大堆藥材。
依加已經冇人知道，五十年前嘅江湖第七美人，係用毒嘅。
當年我第一眼見到佢，就決定為佢改邪歸正，唔再用毒。
呢次，我決定為佢行俠仗義，最後一次。
天生我才必有用，你當然有權埋沒你自己。
但係，如果喺需要嘅時候都唔攞出嚟用，你錯失嘅嘢，會多到超出你想像之外。
—完—
新書《真實虛擬一鏡過》已經出版了，現正發售中，
詳情可點擊這裡：https://bit.ly/3eTPuHL
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #大俠老咗之後
七劍粵語 在 電影《七劍》Seven Swords 《七劍》Seven Swords 的推薦與評價
@楊雲驄|演員黎明天山派二弟子，青干劍【防守】。 @楚昭南|演員甄子丹天山派大弟子，由龍劍【進攻】。 @傅青主|演員劉家良(粵語配音 ... ... <看更多>