好認同資源回收係一種服務一種責任並唔係理所當然由有心人去做既免費公益。
為自己垃圾負責任，其實唔難。
《不如L wan 去草原音樂營見識如何露一個真正的營》
文：Celia Fung
不只在大帽山棄置了超過十公斤垃圾的L wan＆Friends，所有曾經在露營時有意或無意製造過大量廢物的人，其實都應該到草原音樂營一趟。
每次有朋友傳媒問起筆者何謂環保露營，我只能sam hui的說句：「對唔住，其實你問錯人，我只係個出外露營靠朋友的廢柴。」因為朋友總會為自己打點一切，我要做既只係準時出現及帶定自己支牙刷。所以，當草原地圖與本群組再次合作，在三日兩夜的音樂營內進行回收分類活動，我們嘗試把握機會在活動內窺探何為「環保地露營」。
第一個不幸地被我們捉住的sam露營年資已超過十年，他可真的是「全副武裝的專業露營者」，所有的「架餐」即使是外行人一睇都知道殊不簡單，包括那個用了數年，由瑞典直送的扁扁食物盒，竟內藏了摺得埋的杯及碗、餐具以及三色調味樽，靚到一個點令筆者都想即刻飛到瑞典大手入貨，試問又點會有人捨得用一次就掉?
但呢個食物盒都都並非筆者對sam印象最深刻的原因，當問到「你會點樣鼓勵新手露營者減少廢物」，他的回覆才令我「O」了一個大咀：「其實好多野都可以避免，例如買食物既時候已經可以減少好多包裝產生，好多人貪方便，會就咁去超市買定一pack pack野食，但同時亦會製造大量保鮮紙同膠盤等垃圾，而我自己就盡量會將用完既膠袋洗乾淨再羅去街市買野食，咁就已經可以減少好多廢物產生。」
嘩！係呢個年頭，搵到個願意出街帶環保袋既候生仔已經係難能可貴，試問仲可以係邊度搵到一個會將膠袋洗完再用既大男孩！呢個被其他世俗人看來婆媽的行為，在筆者眼中卻是「charm到震」，跟早前打包但被女友嫌棄的男子是如出一轍的「環保界荀盤」！ （雖然未知對方是否尚單身但有興趣的女士可pm本專業我們可嘗試聯絡有關人士）
你以為場內所有camper都一定用極度專業的「架餐」露營？少年，你太年輕了，接落黎訪問呢兩位女士真正示範了何謂「你有你高檔我有我草根」的露營體驗，因為佢地所用既餐具同器皿，基本上都係你隨手執都執到，包括飛機的即棄餐具、超市的生果膠盤等等，連兩位只有一次露營經驗的朋友，都識得點樣透過自己既方式盡力落實「零廢露營」，大家絕對未能再以「年資淺」及「架餐平」為由以將自己製造大量廢物的行為「不合理地合理化」。
不管專業與否或露營資歷長短，不管用的是過千元的餐盒或幾蚊雞的膠盒，都不應成為大家會否製造大量垃圾的主要因素，始終最重要的是「用家心態」。識得用其實好好用，所以無論係鐵盒定鐵叉，係膠兜定膠羹，只要你唔好第一眼有偏見地將佢放係「即棄」行列，每一樣物件都有機會被重用數十百千萬次直到佢死得眼閉為止！
整體而言，camper的質素還是頗高的，來分類的營友其實也頗配合及主動，但當然害群之馬也「為數不少」，基本上每當我們背對回收桶再擰轉身，都會在回收桶內無端發現不能回收的紙巾、食物包裝、甚至乎是一整袋未分類的垃圾！ 由於偷雞亂掉垃圾既人行動太迅速，當場實在難以捕捉，我地只可以用我地僅餘既武器 － 紙同筆，去寫低我地對呢d行為係予以深切的譴責 （雖然用處係零但起碼可令接近更年期而極燥底既筆者發洩一下）。
而另外一樣需要強烈譴責既，係連廚餘同垃圾都唔識分既弱！能！人！士！請問點解你地會覺得廁紙、塑膠同煙頭係廚餘呢！？你地平時會將煙頭同廁紙食落肚架咩？定係你覺得「膠米」真係用膠黎種所以將d膠都掉埋落去？要農夫係堆食剩既野度逐張廁紙同逐個煙頭執出黎你地良心過以得去嘛？點解我地要做分類，點解要做得咁仔細，就係希望前面功夫做得好，後面回收商或其他處理者就唔需要花咁多功夫同時間幫大家執手尾，要知道好多時污染左既野，要花多幾百倍工序甚至乎難以循環再造，所以有時回收商會將回收物掉落堆填區都係因為大家將狗屎垃圾污糟邋遢掉埋一齊既後果所致！（諗起就嬲嬲到差d連keyboard都打爛埋！）
整個營地不設垃圾桶，亦提倡「自己垃圾自己帶走」，所以campers離開時必需帶同自己的垃圾離開，亦帶到去最後的壓軸環節，就係「磅垃圾」！呢個環節就好比人地結婚即場拆人情，只係我地將人情換作垃圾，即場磅離營營友既垃圾量，重得不合符比例既我地會再開袋「驗屍咁驗」，睇下究竟垃圾袋裝左舊石頭定係袋左舊磚頭，需要知道除左基本既紙膠金回收之外，我地仲設有玻璃廚餘連竹籤都搵埋回收出路，實在無理由會重得離譜。呢個咁緊張既環節往往令參加者極度驚恐，但係溫柔滿滿既分類專員會充滿耐性地逐樣逐樣解釋俾參加者聽點解呢樣分類得個個分類得，令到參加者係回收站有賓至如歸既感覺，從而希望呢個美好既回憶會令大家日後不論在任何場地任何時間都會落足心力做好回收工作。
而今年好值得讚賞同佩服既，係其中一個七人女子露營組合，係三日兩夜只係製造左少於1kg既垃圾，絕對值得筆者特登開一個段落加以表揚！
但當然亦都有部份分類及環保意識未夠高的營友，係我地既堵截下摷到好多應被回收既物件差d又被枉送堆填區，但係對比上年有營友唔理我地勸喻仲發脾氣掉低左句「痴線」走左去，大部份都係好聽話地即場將回收物盡量分類，履行作為「有責任心對環境有承擔」的campers應盡的義務，為此筆者係感動的。之但係，我地希望大家唔好係有人監視同督促既情況下先識得「被動地」進行分類，我地唔會有人24小時監察同提點大家，我地亦相信咁大個人，應該同唔應該做乜野大家絕對清楚知道。若果大家係環境問題面前繼續「詐傻」同「扮懵」，大家可以預備定下年冬天唔洗換季，繼續迎接夏天三十幾甚至超過四十度既高溫，儲定錢興建焚化爐泵水，繼績享受千篇一律既商場因為到時郊野公園唔洗起屋都已經變哂做堆填區… 仲係咪要我繼續講落去？
最後，點算是次音樂營的回收成績：
雜膠：14.49公斤
膠樽：9.505公斤
紙：15.205公斤
鐵：6.664 公斤
gas罐：3.74公斤
玻璃：約超過50公斤
廚餘：75.91公斤
全憑大家的努力，以上175公斤原本被棄於堆填區的回收物，將會由各個回收界別幫忙接收及妥善處理，重獲新生。
最最後，感謝草原地圖又再次「唔識死地」搵我地呢個形象極負面、超危險、粗聲粗氣基本上係趕客既群組協助整個場地既回收工作。呢個行為係需要極具勇氣及 ─ 金錢的。我地一直強調資源回收係一種服務，係一個責任，無任何人有必要免費回收及處理活動後的垃圾，還能令主辦機構套上「環保活動」的光環。還記得去年完成草原地圖的回收活動，有另一個大型跑步比賽的主辦單位希望尋求我地既協助在場內進行回收，但最後卻似乎因為我地「開天殺價」地要求收取回收處理費用而卻步。當然這並非獨立例子，只要大家繼續抱著「回收跟清潔一樣應免費提供」的心態，香港的回收業界就只能給這種想法被活活殺死了。
若果連草原音樂營這個如此小型及非牟利的活動都能夠及願意擠出一筆錢支持活動的減廢及回收工作，其他主辦單位再跟我用「冇budget唔夠人手冇時間」等多餘藉口來再三推搪的，admin只能跟你說句：「算x數啦」
重申一次，回收分類工作是。需。要。錢。及。時。間。及。資。源。的。各位打算吃免費午餐的人請過主吧。
嗚謝：
回收團隊：celia lau，zoeleungpy，了了，Jackal Chan，Kelvin Kwok，草原地圖及楊雪盈義工團隊及其他朋友不能盡錄
回收物回收商：secure information Disposal servies Limited
廚餘回收：自然脈絡
酵素提供：酵霸十三一
回收設備製作：zoeleungpy
磅垃圾coupon獎勵提供：本木序
合作伙伴：草原地圖
不能回收的紙 在 [問卦] 為什麼便當餐盒還要回收？？ - 看板Gossiping 的推薦與評價