【龔成問答信箱】(Q22401-Q22420)
Q22401:
Hello 依家溫緊進階班第5堂 notes 你話如果附屬公司多而且比較接近50% or 小數股東股益較大 個純利率會扭曲左
想問下幾多間附屬公司先為之多。同樣 小數股東股益點樣先為之大 例如佔左總盈利既某個%就叫大?
龔成老師︰
我地要估這個調整,主要係因為當集團對附屬公司持股,較接近50%時,即附屬公司盈利中,有不少比重非有集團所有,令計算出來的純利率出現偏差。
所以,我地有時係會唔扣"非控股權益",直接用盈利(而非股東應佔溢利)去除營業額,去計算純利率。
但我地唔需要一見到"非控股權益"有數字,就去做這個調整。因為有時個數字好細,當你調整後,發現純利率其實無明顯變化。
所以,你預"非控股權益"大於"盈利"10%,我地才會對純利率進行調整,令佢數字更能反映真實情況。
------------------------------------------------
Q22402:
你好請教1928,見佢近期弱左,如靠債去還債,賺到的利潤都會被利息蠶食。
派一次中期息都要10億美元,好難想像何時內可以做到。
還未計續牌等政治風險,以你的專業分析點解可以對此企業有咁堅定信心?
龔成老何:
金沙(1928)風險度的確增加左,但投資者分析時,不要將中短期因素太過放大,其實只要澳門疫情穩定翻少少,其實就無事。
睇翻上半年,金沙中期經調整物業EBITDA 2.34億美元,銀娛都是EBITDA有正數的,反映如果唔計會計因素,佢是有錢賺的,除非疫情惡化,否則,佢無問題,而我地從投資,是投資企業的長期,不用將當刻的短期因素太過放大,同時佢持有的資產好有價值,要融資都十分容易。
至於政治因素,的確有少少,但如果從「澳門政府想那些博企續牌的角度」,就是金沙、銀娛,這是從就業、澳門發展等的角度去分析。
------------------------------------------------
Q22403:
你好。想問9926同2878點睇,9926跟人買跌左十元。點算,唉。守唔守好
龔成老師:
康方生物(9926)你預佢上落會較大,不宜持有太多。
主要從事生物製藥業務,專注於腫瘤學及免疫學治療領域。
佢候選藥物例如有AK104:適應症包括子宮頸癌、肝細胞癌、食管鱗狀細胞瘤、胃癌、非小細胞肺癌、黑色素瘤、晚期實體瘤、外周T細胞淋巴瘤;預計於2021年下半年在中國提交治療子宮頸癌的首次NDA(新藥申請/生物製品許可申請),及開始在美國進行治療晚期或轉移性實體瘤的Ib/II期臨床試驗,以
及聯合治療實體瘤的試驗。
這企業現時是投資期,回報要慢慢先見到,不過,這股估值十分難。因為無實在的收入與盈利進行計算。
只可以話,風險較高,是有危有機的類別。投資注碼一定不能大。
如果持貨,小注,長線,不是不可。投資得就一定長線,等佢長期回報。
如黑持貨多,宜減。
晶門半導體(2878)都算有長線投資價值,佢係一間無晶圓廠半導體公司,主要從事設計、開發及銷售專有集成電路晶片產品及系統解決方案業務。
佢的產品及方案可供應用於智能手機、平板電腦、電視╱顯示器、筆記本電腦以及其他智能產品。
雖然都有一定的生意,但多年來都出現虧損,到近年才算好轉。行業需求對佢是利好的。
這企業質素未算好高,因為技術未算好強,這股如果持貨不過多,都可守住先。
------------------------------------------------
Q22404:
我想請教你
2869在11元買入
1313 在 9.9買入需止蝕嗎?
我知3319/1313是優質股可以守,2869是優質股嗎?
多謝阿sir解告令我心態有改變
龔成老師:
綠城服務(2869)仍算有質素的。佢為中國高端住宅物業服務供應商,提供以下三類服務:
(1)物業管理服務:包括保安服務、保潔及園藝服務,以及物業維修及保養服務。
(2)顧問諮詢服務:包括在建物業服務(示範單位管理服務及建築工地保安服務)及管理諮詢服務(於項目設計及開發階段提供物業開發諮詢服務,以及於物業交付後提供各種物業管理諮詢服務)。
(3)園區增值服務:包括園區產品及服務(購物協助、拎包入住服務、交通服務、文化教育服務、房屋返租與置換服務及二手房交易的經紀服務)、家居生活服務(物業維修及保養、家政服務、保健及娛樂),以及園區空間服務(出租廣告空間,並提供廣告設計、製作及出版服務)。
過往發展不差,業務有增長,現價合理區中上部。
這股都可以守,但你預佢中短期會有少少波動。
至於另外兩股,都可持有。但你較集中在內地地產相關行業,小心行業集中風險。
------------------------------------------------
Q22405:
如果我40歲,加按d錢出嚟投資會唔會有風險?謝謝你的意見
龔成老師︰
以你年齡可承受的風險程度(以你年紀,建議總負債,最多只可以佔總資產6成),加上現時仍處低息期,加按是沒有問題的。
關鍵是加按後,將資金買入其他資產,創造更高的回報,由於加按是要支付利息的,所以新資產產生的利息回報一定要比加按的利率高,這樣才值得做。
最好有比較明顯的息差回報,這樣才能抵銷加按後,加大負債為你所帶來的風險。因此,你加按前,最好先計劃如何分配新資金,如何平衡風險,怎樣說服自己獲得理想的回報,即是有充分的理由,而非為加按而按。
若是投資於股市,相信中低風險會較合適,公用股、內銀股、收息股、房託等,都可考慮,策略為長期的增值及收息,期望股息回報大於加按利息,這樣就值得做。但絕不建議炒賣等方式投入股市。
------------------------------------------------
Q22406:
到目前為止,我們現住的村屋政府還沒有任何收地計劃。估計還可以起碼多住十年八載。我想得到一些資料關於鄰近地區政府收地價、土地私人買賣價錢等資料,
從而比較一下地主開出的價錢是否合理。請問以上資料可以從哪裏得知呢?謝謝你的幫忙!祝生活愉快!
除了以上住屋問題之外,從二月至今,已分段買入以下股票合共約200,000。(之前打算用1,000,000投資,其中500,000分注入市及月供股票;
其餘500,000手持現金等大跌市才大力度掃貨),請問暫時這個股票組合是否合適我?分注買入速度又是否過急呢?
66 - 43.50 (12.3%)
1658 - 5.70 (9.6%)
1928 - 29.20 (13.2%)
1972 - 22.90 (12.9%)
2800 - 27.80 (7.8%)
3067 - 17.60 (19.9%)
9633 - 56.80 (12.8%)
9988 - 198 (11.2%)
另外,月供股票方面也開始了兩個月。分別月供以下股票。月供股票因為剛開始,未有計算在以上。
2800 - $3000
27 - $2000
66 - $1000
請問以上我的股票組合是否潛力股方面佔約40%太多呢?之後再分注買入的資金,我會偏向平穩增長股及收息股。請問龔sir有什麼股票建議加入我的組合呢?
以上問題太多,不好意思。希望得到你的抽空回覆。祝身體健康,生活愉快!
龔成老師︰
你可以去田土廳和地政總署,可以睇到交易金額和一些補償計算資料,你可以用來參考。
你現時持股和月供計劃,大致上係可以。但安碩恒生科技(3067)和阿里巴巴(9988)係潛力股,這類股票以你48歲,最多佔2成左右好了。
未來時間,就正如你所講,要偏向平穩增長股及收息股,去慢慢拉低翻潛力股比例,以免風險過高。以下都是一些合適選擇,現價都合理,你可以參考下。
但緊記唔好偏重個別企/行業,個別企業和行業,不要佔組合15%和30%以上,銀行業更加不要高於組合20%,否則會有過度集中性風險。
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)、富豪產業(1881)等(記住,股價略波動,不能太過大注)。
現時你投入了1/5資金,這個比例係可以。當再出現多10-15%左右回調,就可以再加下一注。而另外50萬,但等大跌市出現,才分注入貨。
------------------------------------------------
Q22407:
1) 龔sir , 想問一問關於美股TLRY , 持有半年虧損接近40% , 應繼續持有還是止損,能幫手分析一下嗎
2) 龔sir, 6993 係米仲可以持有 ,仲可以守
龔成老師︰
1) Tilray Inc (TLRY)從事是一家從事製藥業務的公司。該公司是一家向藥品分銷商供應大麻產品的供應商。
大麻股過往曾是熱炒對象,過去一年波幅好大,由$5至到$67。上市後,更曾經升至$300,可見這隻股票,有一定投機味道。
我自己無仔細研究過大麻行業和相關股份,但從佢財務數據睇,上市後收入係有明顯上升,但依然未能達至收支平衡。
因此,此股現價不少部份,係來自投資者對"將來"的睇去。只要未來前景稍有偏離,你預佢會有較大幅調整。
此股唔係話無投資價值,但確定性較高,只宜小小注。
2) 藍月亮(6993)不是劣質,但最新業績令人失望,由於上市前的數據幾靚,因此,有可能佢上市前執靚盤數,這亦是我對新股/半新股有保留的原因。
佢最新的中期虧損約$4400萬元,去年同期純利約$3億元。虧損主因是市場上,其他平台出現過剩的較低價產品,導致佢定價策略及產品在市場上的價格體系受到干擾。
為統一產品在市場上的定價,佢向其客戶提供若干折扣以穩定產品的市場價格,此類折扣對其於上半年的毛利率產生約9%的負面影響。
相信中短期未必強,但長遠,其實又不算好差,佢成立於1992年,擁有衣物清潔護理、個人清潔護理和家居清潔護理三大系列共73個品種的產品。
佢係中國洗衣液有龍頭地位,加上毛利率高,賺錢能力強。睇翻佢之前的資料,以零售額計算,藍月亮在洗衣液市場、濃縮洗衣液市場及洗手液市場的市佔率均為第一。
整體有質素,不過之前貴,現價算是合理區中上部,如果你小注持有都可以。
------------------------------------------------
Q22408:
龔老師你好,我想聽一下老師的意見.本人可承受高風險。
1. 持有1257,20,000股平均價3.4。現價掉到2.77左右,應否繼續持有或減持?
2. 持有1448,6,000股平均價7.02。現價7.42應否增持?
還是增加其它平衡增長股?
龔成老師︰
1) 中國光大綠色環保(1257)其實本質不差。
睇翻佢的業務情況,長遠發展其實是一個大方向,但佢近年負債有所上升,加上市場擔心佢之後的增長力有所減慢,因此對這股的評價減少左。的確,負債與發展持續性,是這股的風險因素。
長遠來說,這股仍是有投資價值。但不建議太過大注,始終都有風險,同時可能仍會弱一段時期。你明白這些風險,你照長線持有係可以。
當然,若你持股佔組合較多的話,我比較建議你沽出少少,去平衡翻個風險,咁會較好。
2) 福壽園(1448)有質素,現價算合理區頂,如果你現貨佔組合比重不多,或者資金較充裕,現價可以再加小小注。
否則,你等佢回多10%左右,才再加注會較好。
以下增長股,都適合你30歲年紀,你可以參考下。
平穏增長股︰指數基金、金沙(1928)、恆基(0012)、平安(2318)、中銀(2388)、港鐵(0066)、長建(1038)、領展(0823)、粵海(0270)
潛力股︰安碩恒生科技(3067)、比亞迪(1211)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)、GX中國電車基金(2845)、三星FANG ETF(2814)。
平穏增長股,現處於合理水平,可分注入市。但潛力股,部份係略貴。
現時只有安碩恒生科技(3067)、GX中國電車基金(2845)、騰訊(0700)、阿里(9988)、中生製藥(1177)、福壽園(1448)勉強算在合理區中上至頂部,可分注入貨,其餘都略貴,想買就要等一等。
------------------------------------------------
Q22409:
真的衷心感謝,讓我瞓吾著幾日不斷思考過去錯在哪!同時,我並非抗拒買股票,亦十分認同你價值投資的方法。
我從不同category 選了一些之前心儀的和你推薦的選一至两隻,想把台灣現金調回來建立一個組合,比D意見?
銀行-滙豐/恆生/中銀3988(但PE 4倍不到,好似鬼鬼哋)/citibank
地產 - 恒基/新世界/置富
科網-阿里/騰訊/MSFT
手機-小米/舜宇/瑞聲
網絡-電盈/香港電訊/移動
電車-比亞迪/中國電車/雅廸
公共-地鐵
醫療-和黃醫藥/平安好醫生
零售-佐丹奴/六福/周大福
休閒-金沙/銀河
指數或基金-2800或3086華夏納指
建倉用80至100萬,留150萬現金等。
有點長,抱歉!
老實講,我清楚年齡影響可承擔的投資風險,只是希望在還有生產力(10-12年)間,除完成兩個小朋友在外地讀完書和以後照顧到自己已滿足了!
龔成老師︰
以你48歲年紀,我唔建議太進取。你可以用恒基(0012)、地鐵(0066)、金沙(1928)/銀娛(0027)、六福(0590)/周大福(1929)、指數基金作為核心,為組合提供平穏增值能力。
之後,再配以一些收息股,好似滙豐/恆生/中銀3988、置富(0778)、佐丹奴(0709)。
中行(3988)和一些內銀股,你會發現地市盈率都係好低。因為市場覺得佢地壞帳潛在風險大,所以市場唔會比佢地個市盈率太高。
最後,若果你想個增長力強少少,可以加入一些潛力股,例如阿里(9988)、騰訊(0700)、比亞迪(1211 - 但現價偏貴,可先用2845代替)。但由於潛力股風險較高,總額不要高於組合2成。
現時大市只在合理水平,先用80至100萬建倉,再另留150萬現金等大跌市機會,係可以。
若你想加快增值速度(但會承受較高風險),你可以調高少少潛力股和平穏增長股比重。
否則,你這個年紀,我建議按潛力股/平穏增長股/收息股(20/40/40)的比例,會較穏當。
------------------------------------------------
Q22410:
龔成老師, 你好~ 本人35歲, 月入2萬幾, 60萬左右, 買了以下股票~ 月儲萬五至2萬左右~
買了以下股票, 但一直持續跌勢, 雖然以下股票都是有質素的, 但.. 某些股票仍需要賣出先止蝕嗎? 謝謝!
另外, 怎樣可以增加財富呢.. 因有可能10年後便跟小朋友去外國讀書, 相信在外國對於我來說, 不易搵工作… 買那些股票是比較隱陣呢, 謝謝!
700 騰訊 買入: $616 x 400 (現價約: $537)
1211 比亞迪 買入 $157 x 500 (現價約: $218.
388 港交所 買入: $437.5 x 200 (現價約: $531.5)
2800 盈富 買入: $28.43 x 3000 (現價約: $27.72)
3690 美團 買入: $290.30 X 200 (現價約: $268.80)
9988 阿里巴巴 買入: $223.8 X 100 (現價約: $202.60)
1398 工商銀行 買入: $5.33 X 3000 (現價約: $4.39)
1810 小米集團 買入: $24.75 X 400 (現價約: $26.
1972 太古地產 買入 $23.10 X 400 (現價約: $22.95)
1177 中國生物製藥 買入 $7.44 X 1000 (現價約: $6.99)
3067 安碩 買入: $17.12 X 300 (現價約: $15.28)
2638 港燈 SS 買入: $7.61 X 500 (現價約: $7.80)
3088 華夏恆生 買入: $10.34 X 200 (現價約: $9.22)
龔成老師︰
你現時持股都係有質素,你唔好太比個買入價或者大市氣氛影響,令你做出錯誤決定。緊記只要係有質素,長線投資價無轉壞,就算股價下跌,我地都應該照持有。
由於你尚有10年時間,用以上股票去增值,都係可以。
但有個較大問題,你而家太偏重左係潛力股(0700, 1211, 0388, 3690, 9988, 1810, 1177, 3067, 3088),佢地雖然有增長潛力,同時風險都較高,不宜持有過多。
你算年青,潛力股可佔約5成,餘下應用以下平穏增長股。若你投資經驗較淺,潛力股比重,要再調至3成以下。到你學到一定投資知識,才慢慢調高。
但你唔需要減持任何股票,只要未來時間,加大翻平穏增長股部份,令組合慢慢回復平衡,咁就可以。
平穏增長股:指數基金、金沙(1928)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)、長建(1038)
但到10年後,你要移居外國,你可能會需要穏定現金流,去支援生活,多於財富增值。
那時候,你可以將部份股票,慢慢換成收息股,用股息收入,去減輕你生活負擔。至於比重多少,你就按自己實際情況而定。
------------------------------------------------
Q22411:
龔 sir 您好!又要打擾您!有關一些資產問題希望您可提供一些意見。
本人有一層剛供完的樓,由於預計子女在未來五至八年後會移居外國 (他們已有當地護照),所以我希望在當地置業。但由於疫情關係,
暫時不能往來外地親自考察當地不同區域的環境,而我又不想只靠海外agent 隔山買牛,所以暫時對於將要付出的金額只有很初步的概念。
現在問題是,我應否在此期間先翻按現在的居所,先keep 錢向手,再等時機去用這筆錢於海外買樓(根據疫情,有機會我要兩年左右才真正落實買到,
甚或如果到時樓價因大量移民而飛升, 海外置業計劃亦可能泡湯)
另一考慮是,我自己工作的房屋津貼將會屆滿,人工也已經到了max, 所以翻按的還款能力會降低,我應否take risk 仍然去翻按 (因市場常有消息指高息時代很快重臨)
不好意思,可能說得有些亂。盼龔sir 比D意見
龔成老師︰
你2個問題,都係建基於一些假設性結果(外地樓價大升/環球息口大升),但這些結果,到底會否成真,幾時會成真,無人會知。
我地係投資時,係唔應該用"估"去做策略。我地係因應現時情況,平衡各方利弊,去找出一個較可行方向。
由於你子女尚有5-8年才會移民當地,有一定時間。你而一刻其實唔需要急住買當地物,除非你好有信心,長線當地升幅,一定會跑嬴香港樓,咁就另作別論。
至於翻按,你就要一直支付利息開支成本。但你又未知幾時先買外國樓。如果到時外國樓升幅不多,可能這筆錢跟本用不上,你就白比利息。
我建議你先計劃清楚,如果你擔心到時賣左香港樓,都唔足夠你買外國樓。你可以把握這5-8年,用優質股去增值財富,令自己有更多資金可以動用,減少到時的不確定性。
------------------------------------------------
Q22412:
老師,我上了堂, 計算了00698 通達之估價為
市盈率9-12
保守盈利預測0.05
市值股價約$0.45-0.6
不知道為什麼,00698的估價跌了很多,我之前已經減持了很多,上堂後覺得此公司不優質,但還有少量貨,不知道如何處理剩下少量貨,約40000 股,請老師指導
龔成老師︰
佢過往市盈率大約係9-10.5倍,但由於佢質素唔係咁高,我會再打折扣,下調至6-8倍左右。
而每股盈利,可以用佢過去10年平均,大約HKD0.09。
合理價︰HKD0.54 - 0.72。
但要留意,通達集團(0698),只是不過不失。
佢主要從事電器產品(包括手機、手提電腦及其他電器產品)零部件生產;為電子產品及電器提供金屬外殼及其他五金部件;及提供塑膠機頂盒及生產體育產品。
現價計係偏平,但由於質素只係一般,唔值得持有太多,勉強可長線。若40000股只係佔你成個組合,一個好低的比重,你照持有係可以。否則,當有反彈,就要再沽多少少。
------------------------------------------------
Q22413:
老師,其實etf回報係唔係理應回報多過投資個股? 我見差唔多全部etf股價都係步步向上,好似無邊d係大起大落 或者 長線向下? 想問下呢個係ETF特性?
問題二. 想請問下一我地係咪應該買ETF好過買個股? 一般人理應唔會下下買中倍升股,但係etf就基本上股價係一直向上? 長線好小跌?
謝謝你的寶貴意見
龔成老師︰
1) 唔一定,因為ETF係一籃子優質企業,可以係追蹤一個股票市場、一個行業、或者特定產品(如黃金)。
以盈富(2800)這隻較為人所熟識的ETF為例,佢係追蹤恆生指數,等同買入58間優質企業。
但當中有潛力股,有平穏增長股,也收息股。若你用當中的比亞迪(1211)為例,佢近2年一定係跑嬴盈富(2800)。
但如果你用中國人壽(2628)做比較,佢就明顯係跑輸恆指。所以,ETF唔一定係跑嬴個股。只係佢較有風險分散能力,令個整體回報相對穏定。
2) 如果你係初階投資者,不懂選股,但又睇好個別市場,ETF就會係一個唔錯選擇。
因為佢係一籃子股票,就算當中有些股票,表現未如理想,但只要大市或者相關行業係正面發展,你都會享受到成果。這就是分散風險,有利之處。
當然,如果你係買中一隻較具潛力的企業,升幅係有權優於ETF。但若投資個股時,你選擇錯誤,係可以大市/行業升,但你個隻跌。
------------------------------------------------
Q22414:
龔成 我係你fans 有買你啲書 亦曾經係你股票班學生 不過喺度好想同你講聲對唔住 我覺得自己好似辜負咗你咁 因為你當初教嗰套信念我無好好記住
搞到依家由賺錢變倒輸 初初我齋買港股都好哋哋 後尾學人買美股 賺咗少少之後就開始心雄 再玩埋沽空 結果依家輸到損手爛腳 我好嬲我自己
當初嫌你嗰套賺錢慢 於是就不知不覺好似走咗入賭場咁 仲要唔識走 越賭越大 到依家諗返轉頭 原來你一路教嗰套先係最穩陣 雖然唔會一夜致富
但最終一定有收成 依家我down得好緊要
近排工作 前途 甚至依家股市 無一樣嘢順利 好似時不與我咁 唔知點樣走出呢個困局…
龔成老師︰
其實,有唔少人都會因為短炒成功幾次,就會心雄,只後走上短炒之路。這就是點解我成日Q&A度提讀者,以前做證券行個陣,見短炒個班,可能會短期賺,但長遠都係輸晒架原因。
我地投資要成功,除了要學好一套投資方法外,經驗、自律性和心理素質,都係同樣重要。
有些人,本身心理素質好穏定,可以好好地操作個長線投資計劃。有些人,要好像你有一樣,要有所經歷才會明白。但重點係,這2種人最終都會走到財務自由之路。原因是,他們都"學懂"了。
你現時才34歲,依然很年青,只要你現時開始用正確方法,去創造你財富增值組合,係一D都唔遲。
而且,你比其他人經歷更多,對未來操作"真正"大升大跌市時,你心理上優勢,係會更加明顯,這都對你長線投資有利。
所以,你現時要做,就係收拾心情,做你應該做的事,一切自然慢慢會好。加油!!!
------------------------------------------------
Q22415:
老師,我手持幾隻蟹貨,可唔可以strong hold 牙?
3692 $33.1 2000 shares
2160 $16.7 5000 shares
1913 $55.5 500 shares
873 $24.7 3000 shares
謝謝
龔成老師︰
持有與否,你要睇翻企業本身有無質素。如果無,就算唔係蟹貨,係賺緊錢,都要減持,甚至係沽出。
微創心通醫療科技(2160)和翰森製藥(3692)不確定性較高,近期中央相關政策,令佢地風險高左,故暫時不要再加注。
普拉達(1913)有質素的。
佢係全球時裝及奢侈品集團之一,透過Prada、Miu Miu、Church’s 及Car Shoe品牌,從事設計、生產、推廣及銷售高級皮具用品、成衣及鞋履,以及透過特許協議提供眼鏡及香水。
有一定的品牌價值,但都較受經濟週期情況,你預佢中短期都會較波動,這股有長線投資的價值。
世茂服務(0873)由世茂集團(0813)分拆上市,業務有(1)物業管理服務(2)社區增值服務(3)非業主增值服務。
睇翻佢過往的財務數據,基本上都正面,業務不差同時有增長力,不過上市年期不算耐,因此參考價值會減。
股價上落較大,要注意風險。這股都有質素,有長線投資價值。
------------------------------------------------
Q22416:
龔sir, 睇而家個勢6088同788前景如何。6088坐緊3.48,788坐緊1.44
1858之前40入跌到20放埋一邊冇理到 點知前排彈咗一彈上30 好後悔冇溝 係咪繼續坐吓等
龔成老師︰
唔好用買入價,去決定是否持有一隻股票。我地要睇的是企業質素,只要佢有長線投資價值,中短期帳面虧損,唔係咁重要。
IT HON TENG(6088)質素中等,雖然都有投資價值,但企業不是最高質之列,因為企業的賺錢能力始終唔算好強,每件產品賺錢唔多。
同時業績有回落情況,不過,這股始終不是無質素,但預期長遠的增長力只是中等。若你持貨不多,可以守。
中國鐵塔(0788)質素無大變,但你預佢增長潛力同幾年前相比,會係弱左。整體而言,都有長線投資價值。
春立醫療(1858)長遠有發展的,但本身佢股價和盈利,都係較大上大落。你現貨照持有,只要唔係佔組合太重比例,咁就可以。
------------------------------------------------
Q22417:
老師點睇1024快手?佢差唔多每曰都跌,有投資價值嗎?現價$142是否仲係貴既水平?
問題2,另外今個月開始每月會買1手你書中介紹的潛力股1833(平安好醫生),用老師上堂教的估值計是合理價,現價吸引,會持續1年至2年買入,佢升到咩價位應該停買?
想問請如何操作?老師又覺得e家1833是處於咩水平?
龔成老師︰
1) 快手(1024)之前貴,現價開始合理,大致在合理區中上至頂。近期受大市和中央政策風險所影響,有較大回調,但本質上無太大轉變,有貨可照持有。
2) 平安好醫生(1833)長遠有發展力。
佢係中國領先的一站式醫療健康系統平台,透過「移動醫療+AI」,為每個家庭提供一位家庭醫生,為每個人提供一份電子健康檔案、一個健康管理計畫。
平安好醫生係中國互聯網醫療健康市場的先行者,以平均月活躍客戶,以及在線諮詢量計,是中國最大規模的互聯網醫療健康平台。
企業的業務有潛力,本身有優勢,大環境的配合,都成了這企業的機遇,前景正面,不過財務數據未算好理想。
雖然長遠的企業價值向上,但股價在中短期,可以十分波動,因為市場以「前景」作估值,故此變化必然很大。好難得出平貴的準確數,只能估估下,作參考。
因此,低風險者未必適合投資,若投資者考慮這股,亦不能大注投資,買入後就耐心長線持有,等待這企業改變整個行業的情況,現價算合理區中間位。
但好波動,你每月買1手,去平均個價格,係可以。但此股始終不確定性較高,不宜佔組合太多。
如果一個月買一手,會令佢佔你組合比例過重。你可以更改為月供,或者隔開多少少,例如每2,3個月才買一手,去平衡。
------------------------------------------------
Q22418:
龔sir,我有個理財問題想請教你,我手上有兩個物業出租,一個已經供完每月收租金$11500.00,
另一個仲有20幾年要供,每月租金收入$12500.00,租金可以cover供款和物業管理費等支出。
我的問題係我自己住的單位是租的,每月扣除租金收入後還需要付$20500.00。
我上完你初階股票班後一直思考,我係咪應該把手頭上兩個出租物業賣出,先幫自己買入一個自住用的物業來減底支出呢?
謝謝!
龔成老師︰
其實都唔一定,因為香港買賣樓宇成本唔細,你這個變動,可能要用你唔少錢。你可以主要考慮翻,邊個方法可以令你有更在資金空出,作投資增值之用。
如果你現時置業,反而令你每月投資優質股資金少左,其實係成個配置角度,就未必值得咁做。
當然,長線計你照好都持有一個適合自己長線生活需要的物業,但唔需要過急去進行。
你現時持有2個物業,若都有一定質素,你可以照持有,用佢地來資產追資產,平衡樓市波動的影響。
另一邊,你繼續用優質股去增值,到你可以做到買自住樓之餘,又可以保留一定優質股(最好可保留一間收租物業),才去出手買自住樓都未遲。
------------------------------------------------
Q22419:
1) 也想請問你1093, 《50值博倍升股》中亦提及此股能穩中求勝,請問此股的便宜區是多少?
2) 1297的便宜區是多少?
3) 你的著作《50值博倍升股》中提及1181是穩中求勝之選,請問此股的便宜區是多少?
4) 《50值博倍升股》中提及1458成功打開了一片藍海,請問此股的便宜區在哪?
5) 《50值博倍升股》中提及1373是穩中求勝之選,請問此股的便宜區是多少?
6)《50值博倍升股》中提及868是穩中求勝之選,請問此股的便宜區是多少?
7) 讀完仍的《50值博倍升股了》,但發現很多股票已升了很多,如果現時從書本中選一隻,你會選哪一隻?
8) 想問根據過往數據,本港樓市平均每年會上升多少?(樓價、租金分別上升多少?)我已在書中找到了。
9) 想問現有哪隻優質潛力股已跌至便宜區?
龔成老師︰
1) 石藥集團(1093)現價算合理區上部,要平宜區,要有好大幅回調,接近回一半才到。
2) 中國擎天軟件(1297)規模較細,以及行業存有風險。此股較難做個穏當估值,如你想投資,現價都有投資價值﹐但要控制注碼。
3) 唐宮中國(1181)現價計,你預回多3,4成,會開始到初步平宜區。
4) 周黑鴨(1458)雖然近期回落唔少,但都仲係偏貴,你預佢真係有好大跌幅,去有機會進入平宜區。
同埋,其股都有一定風險,不宜大注。
5) 國際家居零售(1373)你預跌在多2,3成,才算係初步平宜區。
6) 信義玻璃(0868)過往一段時間,累積了不少升幅,就算合理區,都要有一個明顯大回調才會到。所以,暫時唔好入市住。如果真係想入,最好用月供去儲貨。
7) 我會選中生(1177)和信義光能(0968),2隻雖然只在合理區上部,但本身質素較高。故在當中,值博率會係較好的2隻。
但由於現價唔平,只宜小注,等有明顯回調,才正式入市。
8) 過往數據,你可以作為一個參考。但更重要,你應著眼面前轉變、房屋政策、樓市供求問題。未來預期,香港中短期房屋都係維持供不應求。
再加上,近年多國政府都用量化寬鬆政策去救市,令市場資金大量增加。所以,可預見的將來,樓價都會維持上升。
9) 沒有,其實高質素的潛力股,極少跌到平宜區。所以你唔好諗住平宜區先入,要係合理區就開始分注,如果唔係,好機會錯失入市機會。
------------------------------------------------
Q22420:
老師,我睇返中國銀行和中銀香港每年既股息增長率,中國銀行既股息增長比較快,而家中國銀行呢個價位股息有8厘,如果股息再增長股價必定有影響,那投資中國比行不是比中銀香港好嗎?
同埋我想問如果我想查返中銀香港10年前既股價可以係邊到查詢?
同我想問通漲對阿里巴巴,騰訊,香港中華煤氣,同中銀香港會唔會有影響,我照你推介已買入呢四隻股票,之後仲想入d香港電訊同置富
龔成老師︰
我地唔可以單憑派息增長力,就去判斷一個企業情況。無錯,當中行(3988)股息再上調,有機會令股價再上。但
但始終中行(3988)本身已經好大間,加上佢業務上發展比中銀香港(2388)細,故增長力預期會較弱。
以你3X歲年紀,應該集中係財富增長上,故中銀香港(2388)會較為適合。
至於你想睇10年前股價,你可以去YAHOO財經,或者睇各個財經網的圖表,都會有。
阿里巴巴(9988),騰訊(0700),香港中華煤氣(0003),同中銀香港(2388)都係有質素的企業,長線都會跑嬴通漲,你長線持有就可以。
至於指數基金都係適合你,但香港電訊(6823)只係收息股,增長力不高,不太適合你這個年紀。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
中國金茂派息 在 龔成 Facebook 的最佳貼文
【龔成問答信箱】(Q17961-Q17980)
Q17961:
你好,成哥!我係你之前基礎班既學生。首先感謝你係班上面既指導。
課堂裡面你曾經提及過中國生物製藥(1177)係一間有潛力既公司。之後我睇左佢既業績,發現2018年公司曾經進行拼購另一間公司。關於拼購,有幾個問題想請教一下:
1) 留意到公司業績-商譽 數值大增,咁樣會唔會對日後營利有好大影響(如減值)?
2) 公司收購完另一間公司,係咪應該要將被收購公司業績(如股東權益、負債、盈利等)一拼計算?
3) 就住問題2),如果需要一齊計,我留意到中生製藥既ROE,因為拼購後低左好多。其實係咪需要忽略新收購公司所產生既影響,再做估值?
期待你既回覆。謝謝
龔成老師:
1)有可能,但我地好難這樣去推算。我地最重要是明白這是一個「會計價值」,在分析及估值上,一般都唔會太著重。所以,當佢日後真的出現減值時,同時唔需要太在意,因為只是會計上的增加,非現金流的增減。
2)對,除非只買好少股權,否則,會以合併賬目模式計算。
3)我地最重要是長期分析,中短期可能未反映新公司的賺錢能力,又或受入賬等因素影響,因此我地會以長期角度去分析。
------------------------------------------------
Q17962:
龔sirigg799值得買入嗎?
呢間公司值得投資嗎
龔成老師:
IGG(0799)業務上都有質素的,但卻是有風險的類別。
雖然佢財務數據不差,但業務本質的不確定性大,軟件及遊戲都是變他較大的行業,這種不確定性可以令企業好勁或好弱,因此你要明白這點。
佢股價上落大是正常的,如果你投資要明白這點,就算長遠企業價值向上,都要明白股價波動。這股不是無質素,但由於有風險,因此唔建議大注,持貨不算多就無問題。
------------------------------------------------
Q17963:
我現時33歲,其實最好持有幾多隻股票?每隻比例應該點分配?
每隻股票佔整體比例上係指股數定係指買入金額定係現時價值?
另外,如股票總值佔總資產一定比例,當股票升升跌跌時需要作出買賣調整以維持相同比例嗎?
龔成老師:
如果股票組合在$100萬以下,可以持有5-10隻股,如果在$100萬以上,就持有10-15隻。
個股佔比唔好多過股票組合的15%,同一行業唔好多過30%。
我地會按現時的股價計算(但一般唔睇中短期,而是長期的股價,你可以用平均價計)。
如果長期股價改變,就有可能要作出調整。
------------------------------------------------
Q17964:
老師 剛剛看了你有關物業的貼文 小弟現時在澳洲只是自住物業 一直在這疫情下看樓市有調整才去看看物業 投資。
但即使樓市有下跌,買了平貨, 但有以下出租率優慮。
1)現時留學生都很難回國繼續進修。
2)政府對本地上車提供2萬5澳元的資助,又令多一點家庭買下自己物業。
3)澳洲重開正常生活後如果因經濟情況又說交上租金,政府又再下令屋主不能吹收租金或趕租客走,又令租金生活不穩。
暫時只見不是入市時機。 老師對澳洲市場有何見解? 謝謝
龔成老師:
如果疫情令樓市出現較大的下跌,利用這時買入,的確是機會,而我地所有分析點,都要以「長期」為基礎。
1)如果只是中短期影響,而你有足夠的資金去守,去「供款」,就不用擔心。
2)你要睇翻你當區的租務情況,租金回報率。其實,如果政策令人好想買樓,就會對樓價有支持作用,雖然租金回報有機會減,但唔需要太擔心。
3)各地都有不同的租務情況,因此如買樓收租,都要明白這是成本的一種。
你要衡量樓價是否跌得夠多,是否吸引。而記住,我地的分析點,一定是「長期」。
------------------------------------------------
Q17965:
老師,之前有請教過老師$6000月供股票,建議係$3000盈富、$1500恆基、$1500港交所,最近我其實仲想加1211同9988的。但睇完書後,覺得係咪其實唔洗心急
調整為$3000盈富+$3000恆基先會好d?等日後其他幾隻股票回落返d再作調整。
龔成老師:
我地會按翻你的年齡、企業質素、平貴,去決定點配置。
如果你年輕,想組合有多少少增長力(而你組合現時無潛力股),就加入比亞迪(1211),不過,由於現價唔平,因此可能只供$1000。因為你永遠唔知佢幾時回落。
所以,你要先考慮組合的方向,再考慮平貴去決定金額。
------------------------------------------------
Q17966:
龔成老師 你好, 我剛畢業24歲, 預計於九月開始上班, 扣除每年稅項、家用、基礎消費後,每月淨收入$23920。每年會跳point及薪金調整,十年後頂薪約50k。投資初哥, 現有70k現金, 1手[email protected].
想6年內存約100萬作首期、持續增值的投資組會(優質股+倍升股)及維持銀行有一筆備用現錢足以6個月開支(約$200k)。(備用現金可彈性用以應付朋友們的紅色炸彈 但絕不胡亂使用)
一、想向老師請教該如何前進
現打算每月約24k的淨收入
1/2用作定期手動買入2800/823
1/2存銀行作儲蓄及等待1177/1448回落至老師曾提及的合理價後買入
老師認為如何?
二、因為工作是輪班的,請問老師會否辦網上課程讓輪班的學生能自行安排在時限內網上上課?
三、想請教如何得知長線投資的收割位?是否以估價得出預期值?
四、另外,雖然現時工作十分穩固及薪金不錯,但工作壓力大/輪班及危險,曾有研究指出我所屬機構於三十歲年齡層的員工出現離職潮。
在儲下大約5-6年經驗及完成專科試後,我須考慮在本原有機構面試嘗試升一級(該職級現時月入頂薪~70k),還是到私人機構闖?
以我現時的職級在私人機構每月多約20k薪金(未連年花紅),但聽聞可以隨時被辭退及未知晉升前景如何。如考慮私人機構是否太短視?
除此之外,經濟環境會影響我到私人機構的可能性,以及將來另一半的職業是否有穩固收入也是我需顧慮的。我心理上該如何走?
謝謝老師的寶貴意見
龔成老師:
1)你的方向可以,以平穩增長股為核心,例如盈富(2800),而領展(0823)的比例可以比盈富少。同時以潛力股作配置。
所選的都是優質,可長線的股,潛力股等跌先入都正確。
不過,你可以同時考慮其他股,唔好只停留在幾隻股,你的「可選股名單」可增加,但都要耐心等跌,或適當時機先入。
2)我有可能在年底,開一個有關於資產配置的網上課程。
至於股票班,由於內容太重要,暫時唔會。
因為之前實體股票班試過比人偷拍,之後放左上網賣,最後要搞到報海關先處理到,好煩。所以,網上類的教學,都好擔心有偷拍問題,風險太高,因為好多課堂內容,都唔想太公開,只想自己學生知,所以暫時都唔會搞。
3)如果股價升得太多,去到超過合理價,都有可能賣。
不過,你要改變思維,你想「賣出」「收割」,這都是窮人思維的想法,有錢人用另一套思維。你以「現金」為中心,買入想賣出變翻現金,有錢人以「資產」為中心,唔希望持有太多現金(貶值)。
4)你最緊要問翻你自己,5年後、10年後,你想做甚麼,那一邊你最開心,最有發展,對你最好,用長期去分析。
------------------------------------------------
Q17967:
龔成老師,想問中國銀行 3988,還會股價向下嗎?
本人於2018年2月,買入價是4.72。2萬股。
雖然每年派息 3700元左右。可惜股價,每況愈下。
現在只有 2.61。
是否應繼續持有此股呢?
龔成老師:
由於中國經濟轉弱,加上壞賬增加,對內鋸一定有影響的,因此組合唔好太集中在銀行股。
中行(3988)本身不是全無質素,但你預中短期都會較弱,只是收息股,如果你想組合增值,應該轉其他。如果你唔想蝕太多,可以等過1、2年,中國經濟好翻D後,這股都會上翻D,到時先轉其他都得,相信暫時睇,唔會大跌的。
------------------------------------------------
Q17968:
HI``成哥,想問吓你意見~~
點睇817:)
龔成老師:
中國金茂(0817)主要係中國從事城市及物業開發、商務租賃、零售商業運營、酒店經營等。
佢都算有一定的規模,加上生意能保持增長,不過就有少少波動,其實各方面都唔差,唯一擔心的,就是佢的負債問題,負債不斷增加,到了有少少令人擔心的位。
近期股價上升了不少,投資值博率減少左,所以如果投資,就唔建議太大注。
------------------------------------------------
Q17969:
龔成老師你好,本人36歲公務員已婚,收入穩定月儲2萬,預計2020年尾有現金$40萬, 太太有現金約$20萬,沒有任何投資經驗。
剛買了老師的五年買樓四部曲,才發現自己錯失很多時間,浪費左好多吸收投資資訊同投資機會去用資產追資產,雖然有點後悔但此時目標明確,希望下年年尾或22年頭置業上車。
想問一問老師,會否建議我這刻投資在股票市場上?
如果可以,會建議我買入那類型的股票?謝謝。
龔成老師:
如果你在1、2年內置業,你應該持有較多現金,唔太建議投資。
因為投資股票,要長期才有回報,而中短期只會因市況波動而上落,無人知你買樓的一刻,到時的市況情況,因此,你應該持有較多現金。
除非股市出現大跌,你見到有一定的投資值博率,才會將部分(都不能多)的資金,投資股票。
如果投資,你應該選一些較穩健的股票,考慮盈富(2800)、銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
------------------------------------------------
Q17970:
老師,想問好耐 你多數分析公司業績果d資料,而好少分析d日線圖
龔成老師:
好簡單,因為分析圖表走勢,是無用的!
我20年前,都是一位技術分析投資者,好中意睇圖,因為技術分析的原理是統計學,而我數學會考欏A的,所以較強。可惜,當時我用左幾年,都是輸多贏少。
之後我做銀行同證券行,見好多客用技術分析,大部分輸錢,反而長線投資優質股的,就贏錢。
因此,我已無用技術分析十幾年,而這十幾年我都是贏多輸少。
------------------------------------------------
Q17971:
龔sir想問,身邊長輩及同事(我35歲)都持有好多手3988,包括我爸爸有超過30萬股,但我見你書入面都係推2388(今日去書局睇,最後買咗財務自由行)
如果我追求增值,唔淨係收息,係咪入2388會比3988好?
謝謝!
龔成老師:
銀行業的賺錢能力,比過往年代弱左,不過,不是全無質素的。
中銀香港(2388)與中行(3988)都不是無質素,不過,就唔好對增長有太大期望,同時,唔好太過集中在銀行業。
2388有少少增長力,至於3988,就只是收息股。
如果你想增長,可考慮2388。不過2388都不是高增長股,你應該同時在組合,投資其他股,以建立一個更平衡的組合。
------------------------------------------------
Q17972:
請問3323中國建材是否優質股?最近升上很多,是否入3323的時候
龔成老師:
中國建材(3323)本質都有質素,但不算強。
這企業最大的問題是盈利不穩,主要由於成本問題令佢出現這情況,結果就是令股價不穩,投資者亦會視為有風險,因此這類股的估值不會太高。
之前因內地水災而令這股上左,但長遠增長力其實不算強。這股現時在合理價水平,但賺錢能力不算好強,長線投資都可以,但就未必值得投入太多金額。
------------------------------------------------
Q17973:
龔成老師 謝謝!今日見阿里巴巴入左1手 打算之後以月供方式長線投資 這方法好嗎?
另外 708 恒大健康 公司推6款電動車 但就一架都未見影 呢間公司您覺得長線投資 值得嗎? 跟比亞迪相比 應該投資邊間?
感覺電動車未來有market 但我又未見恒大有詳細推出時間表 感覺有d擔心
龔成老師:
如果你無貨,小注阿里巴巴(9988)入一手。之後再月供。可以的。
恒大(0708)要小心,未有產品,不斷賣廣告,可能賣比股東睇,而股價近期上落大,現時估值好難,無實質的銷售情況,根本好難分析。只可以話小心。
寧願投資有實質產品的比亞迪(1211)。
------------------------------------------------
Q17974:
Hi龔Sir,你好!我有現金大概180萬。收入大概每月$42,000.每月供樓$16,000。
有月供股票一供每月三千元2800和2388。明年先從180萬取50萬給兒子在外國升讀大學。不想餘下現金貶值。想買一個大概120萬車位投資,要上會。
現在見823領展$60幾元,都想買3000到5000股等將來升.…可否給点意見?謝謝你
龔成老師:
買車位投資是可以的,車位都是資產項的一種,不過就要留意,租金回報率是否合理,因為近期的回報率較低,值博率只是中等。
至於領展(0823),現價合理區中下部,的確可投資,但你唔能夠只集中在單一股票,應該建立一個平衡的組合。
你的大方向,就是將部分現金,轉為資產,車位+優質股是可以,但如果你股票部分,只投資地產類,這就會令你連同車位,太集中在地產相關。因此你應該進行優化。
另外,投活股票唔好一次過入,最好分開幾次,以減少買入價風險。
------------------------------------------------
Q17975:
龔SIR, 我剛用家人名義買入了第二層樓, 一層自住另1租投資用, 眼見現時淘股估值不貴, 打算借稅貸(30萬左右)全部投入股票, 再分5年慢慢還, 希望搵到一隻穩中求勝既股票全部買入, 你有無推介?
我暫時心水係長實(1113) 或者潤地(1109), 我希望趁年輕盡量借錢買優質資產, 希望在8年後累積600期資產退休
另外,呢兩日研究左隻股票,雅生活同碧桂園服務,物管股營利極穩定,業務簡單易明,增長潛力高,因為將來仲會有大把樓盤落
上網見到龔sir 你好耐之前都有講過雅生活,但唯一問題係佢地呢排升得太勁,PE 已到4X-5x水平,可是佢地未來2-3年既盈利都可以預估到會升幾倍,因為計到母將落成既樓盤面積有幾多。
面對呢個情況,明知佢業績一定升幾倍,但現價唔便宜亦覺得回落機會好細,應唔應該買入??
我想靠呢隻股將身家翻一至兩倍,我覺得有潛力,龔sir 請指教呢個隻幾時可以買得
龔成老師:
現時大市只處合理區,未必值得你借錢買股,你最好等到「便宜」才出手會較好。
長實(1113)潤地(1109)都是有質素的,前者合理區中下部,後者則在合理區中間。
你借錢買資產的方向,不是錯,但我地用這一招,一般只會在平的時候才動用,如果你這刻用,之後大市跌,你就沒有資金再買入平貨。
至於物管股,的確不少都有質素,雅生活(3319)我過往一直推介,雖然倍升,但未算好貴,可理解這刻在合理區頂部,你可以小注入左先,之後等跌先再加。
另外,你上述所講的,都同地產有關,這是一個不差的行業,但都不能將財富只集中在單一行業,你要建立一個平衡的組合。
------------------------------------------------
Q17976:
老師,想問最近中美關係緊張,中國會否不續賭牌金莎,因為之前都30元入左金莎所以睇完新聞都有點緊張。
另外想請教銀行股版塊最近息率都6%以上,係咪一個值得長線投資既板塊,如果是有無推薦既優質銀行股
龔成老師:
金沙(1928)成功續賭的機會,仍是相當高,當然,無人知中美玩成點,但我仍相信,金沙好大機會順利續牌。
我自己都持有金沙,之前都在$2X增持左。唔擔心。
至於銀行,你預大部分都是收息股,增長力就唔算強。因此睇翻你想組合有幾多比例想持有收息股。
恆生(0011)、中銀香港(2388)都有質素的。
------------------------------------------------
Q17977:
你好 老師 現在我情況供緊保險 供多一年就供完 我考慮想買多層樓 想攞曬保險D錢出來俾首期買樓
你建議繼續放係保險到退休 還是先攞出來 果份保險係儲蓄保 麻煩老師俾意見
其實都係用來將來退休 但唔知道磚頭好還是繼續放係保險好
龔成老師:
如果你本身已經有物業,再買多一層作收租,就唔需要太急,以現時的租金回報率計,物業未必算好吸引。雖然這刻有自住價值,但投資價值就唔算好高。
你將資金買一些投資產品,或收息股,回報會更好。
因此,你的策略可以暫時繼續留在保險,除非你見到樓市有一定的下跌(起碼都回翻D先考慮),又或你想找資其他投資工具,而這些工具又處吸引水平
------------------------------------------------
Q17978:
老師你好,我家庭係深水埗有一間唐樓物業實用五百多尺,因特殊原因丟空十多年,今年決定要重整旗鼓。
層樓因太舊,沒有業主立案法團,樓梯位置又暗又舊,屋內都有石屎剝落情況,大廈外牆維修中,完成後要付費大約幾萬蚊,另大廈消防設施及公用地方日後都要維修,未知需要幾多錢,可能十幾萬。
現有兩個想法:
1.改裝成3-4間套房出租,但要支付大約40-70萬裝修費,及日後大廈未知的維修費用
2.出售,但唔知有無人會買及可能因太舊太爛而壓低價錢,出售後再作其他投資
老師我諗唔到邊樣會回報同風險好d,希望你會比到意見我
補充:樓齡五十幾年,五十年前買斷左
龔成老師:
1)的回報會較高,但你就要較多野煩,區份是適合造這類的,但你到時的管理會較煩,租客的問題多,欠租等問題多,同時你單位可能日後仍要持續維修。
但如果搞得好,能產生持續的現金流,你回報都唔差。
因此,要睇你是否想承受風險及較煩。
------------------------------------------------
Q17979:
龔成老師你好:本人今年36歲,單身未婚,月入$25,000,因之前家中有財務狀況欠下銀行分期貸款(20萬)每月還1萬還有20個月不能提早償還,每月扣除所有開支淨儲$5000,資產只有現金15萬,請問我這樣情況和市況應該如何部署最好呢?
1. 按兵不動保留現金等大跌市才出手?
2. 每月開始月供股票減低風險?
3. 繼續儲錢直至20個月後償還所有貸款再考慮投資?
感激等待老師專業建議!
龔成老師:
1)首先,你要以選款為首要考慮因素,如果計算資金要還款,就不能投資。但如果你計算後,有資金利,其實可以買少少股都得,如果你本身完全無股票在手,其實可動用現時的少少,投資一些穩健,有質素的股票,如果不懂選股,就投資盈富(2800)。
2)對,因為能將買入價平均,對於未有把握投資時機,以及未有企業平貴概念的人來說,這是一個很好的做法。
3)你最重要是計好數,你可以用兩年作為一個單位,計翻自己預期有多少入入支出,減去還錢後有無現金剩,如果有現金剩的話,其實在這段時間,都可以少少去運用。
------------------------------------------------
Q17980:
你好
你點睇2018呢隻股?
龔成老師:
瑞聲科技(2018)不差的,本身有一定的規模與技術,長遠發展正面,不過,佢增長力不是好強,只能視為平穩增長類別。
現價合理,可以分注投資,長線持有。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
中國金茂派息 在 龔成 Facebook 的最佳貼文
【龔成問答信箱】(Q17421-Q17440)
Q17421:
老師!你好呀,我最近買左樓!好開心呀!比起銀行估價買低左100萬! 我相信無做錯決左!
我今年25歲,我看了好多你的書,係比你的書激發架!特別是5年買樓4部曲。我買樓前就係睇曬你本書後就不停睇樓,再研究不同區的樓。想多謝你!
另外我也有事情想請教你!我唸緊這個物業自住定租岀去好,租岀去我就無咁吃力,我都唔等地方住,有人替我供。但也想感受一下自己岀來住。
另外,我也想問下,我向銀行做按揭,利息都有200幾萬,好似好多,其實是否值得?
龔成老師:
比銀行估價低,當然是利好因素,反映你起碼無買貴貨,甚至是買到平野!《5年買樓》正是教讀者要不斷睇樓,你運用這技巧成功買到比市價平的物業,太好了!
你如果不用自住,租出去當然最好!
至於利息問題,其實這是一個資金成本,雖然你總計要比一筆「好似好大的利息金額」,但其實,你可能有賺的。如果你收租能得到4%回報,而你還按揭的利息只是2%,這樣,你其實是租金大於利息,你有著數的。借得愈多,就賺得愈多。
另外,我假設你物業$800萬,到幾十年後,一定升值到$1000萬以上的數目(因為現金是一定一定貶值的)。就算連同利息$200萬計,你物業的價值在幾十年後都會多於$1000萬這個價值。
同一個資產,你愈早得到可以較平的價位去買,例如過往幾十年前的樓價,如果你等儲到全數現金先買,就已經升晒。雖然你早得該項目到要比利息,但這個付出比起回報其實不高,所以是值得的,唔好比「現金數目」影響,最重要是計算資金成本與回報。
記住,今天的錢比將來的錢更值錢,你為了早一步得到資產,而支付一個利息成本,而這個成本是值得付出的。
------------------------------------------------
Q17422:
Hi, 想問下小米可以長keep嗎?我上年$9.xx買,想問下宜家放唔放。
之前睇過股票勝經,所以好多股都長keep.可以幫我分析下小米嗎?謝謝你!
龔成老師:
小米(1810)有發展前景的,這股在我今年年頭的《50優質潛力股》(2020年版)新加入成為潛力股,有長線投資。
如果你好多貨,就賣少少,如果不算多,就持有,這股可長線。但由於短期升了較多,相信中短期股價會較波動。
------------------------------------------------
Q17423:
老師想問一下你00699神州租車,這個股怎麼樣呢?現在價格合適嗎?
01093石藥集團、01099國藥控股,2只選那只比較好呢?什麼價位是合適價格呢
09983建業新生活這個股老師你怎麼看呢?
謝謝老師
龔成老師:
神州租車(0699)於中國短租自駕市場,佢亦通過網上招標、拍賣網銷及拍賣公司等渠道銷售二手車,以及提供「
企業雲」汽車租賃解決方案。另提供包括意外事故險、GPS導航系統、7天x24小時道路救援、車輛交付及異地還車等多種增值服務。
整體是不差的,但中短期有可能較一般,而佢近年的盈利都出現大跌。
現價是合理的,但你預要長少少先好轉,投資不是不可,但又未必值得好大注。
至於藥業方面,石藥集團(1093)較有質素,現價合理區中上部,可分注投資。
建業新生活(9983),佢係中國中部地區的物業管理服務提供商,管理的物業組合包括住宅物業、商場、文化旅遊綜合體、商業用公寓、辦公樓、學校及政府機關物業。
業務不差的,有投資價值,不過現價都唔平,這刻投資不宜太大注,要分注進行。都有長線投資的價值。
------------------------------------------------
Q17424:
龔sir,您好!在糾結好冇出售兩手9988(當時購入價為168.9)、再換入4手1810(現價16.01)和3手788(現價1.59)
龔成老師:
上述3股都是有質素的,如果你想組合較平衡,的確可以賣少少阿里(9988)轉其他。不過,這股仍有一定的增長力。其實你唔應該著重「賺左先」這個概念。
我從你過往的投資模式,已見到了犯了散戶常犯錯誤:著重數字利潤。我建議你睇書《80後百萬富翁》,我相信對你有好大得著。
------------------------------------------------
Q17425:
老師您好:因為澳門月供貴,所以想要一手手入,手上大約有25萬可以投資
1)盈富(2800)$26還能入嗎?見您之前說過24、25可以分注投資,24以下有較大值博率。我想先入2手,之後再每2-3個月入一手,現在我是應該等他回落到24、25才入嗎?
2)金沙(1928)打算等$30以下入3手,現價$30.3(因賭牌即將到期,投資此股的風險是不是大很多?)
3)中國奧園(3883)、融創中國(1918)、世茂(0813),這三支有素質嗎?現價合理嗎?想選一支入
4)小米(1810)騰訊(0700)、阿里巴巴(9988),現價好像都偏貴,如果想一手手入,是不是都不建議?
5)手中有30手中行(3988)$2.9入,見您說工行(1398)和建行(0939)素質都比中行好,加上中行壞帳問題較大,我應該繼續持有嗎?
問題比較多,麻煩您解答,謝謝!
龔成老師:
1)盈富(2800)$26仍是合理區,只要你分注投資就得,我地無人會知佢的升跌,因此利用分注策略較能平衡風險。
如果你現金較多,現價入少少可以,但如不算多,就等$24才買。
2)金沙(1928)有質素的,我相信佢能取得賭牌的機會仍是高的。$3X是合理價,你可以分注投資,只要唔過份集中這股,就無問題。
3)在業務上,3隻都有質素,不過負債都不少,因此要注意風險。以現價值博率及質素考慮,世茂(0813)會略好,但都唔建議太大注。
4)的確唔平。小米(1810)算是相對不太貴。
5)質素上,工行(1398)會較好,但中行(3988)都不是無質素,你都可以投資的,又不用太擔心。不過就唔好過份集中。
------------------------------------------------
Q17426:
成哥,最近我在研究一隻科技股1297,發覺佢都冇係呢個升市到跑上嚟,但我覺得佢好有質素,可以少注投資,分段買入。我覺得佢係倍升股。你有咩睇法?
同埋我想問PS Ratio幾時先至用
龔成老師:
中國擎天軟件(1297)本質不差的,市場擔心佢之後的增長動力減慢,因此估值上認為佢會較低,但如果佢能保持這增長,其實現時的股價是便宜的。
這股的其中風險,就是規模較細,以及行業存有風險。
現價其實有投資價值,但就唔建議太過大注。
至於PS Ratio,你可以作為企業估值的其中一種方法,這計法進階班都會教。一般來講,如果一些企業未有實質盈利,但已經有一定的生意,預期盈利會慢慢出現,就可以用這種方法,去比較行的的比率,從而推算出這企業的估值。
------------------------------------------------
Q17427:
呀sir 你好 我新手
想請教下5 匯豐 同 3988 中國銀行
現價入可以嗎?
現無股票 想開始月供股票
謝謝
龔成老師:
匯豐(0005)、中行(3988)都只是收息股,增長力不強。匯豐的賺錢能力比過往略有減弱。
這類股不是不可投資,但你預佢股價表面都只是一般,投資目標只是收息。
投資可以,但唔好太集中在銀行業,始終會有行業集中的風險。
------------------------------------------------
Q17428:
我今年33,如果我只想買入9988、1928、1316、1113這四隻,應該怎樣部署及分配資金。
龔成老師:
阿里巴巴(9988)、金沙(1928)、長實(1113)都是有質素,要留意,阿里現價略高,金沙中短期會弱但長遠無問題,長實中短期都會較弱,同時這是收息股,增長力唔強。
耐世特(1316)質素算是中等。就算投資也不會太多資金。
上述的股,現時你可以分注買入,但就一定要同時留有資金。
------------------------------------------------
Q17429:
想問下究竟止蝕或溝貨應該係買入價的多少?
龔成老師:
止蝕,最重要是睇企業的本質,如果企業一直都是優質股,只因中短期問題或外圍市況,令股價跌,這反而是一個平的價位。
持貨者不止不應賣出,更應該買入!
只有當企業質素改變,變成無質素,才要止蝕。
------------------------------------------------
Q17430:
龔成老師:你好,朋友介紹下認識到你的書和facebook 專頁
今年41,每月扣除支出只可儲到$3000,
月供了兩個月的2800 (盈富)現有37股,
00006 (電能實業)19股,繼續進行中。
每月每隻供$500,
今個月加了供1810(小米集團),
1398 (工商銀行),
1928 (金沙中國)。
因為月儲$3000,還利剩下$500想供多一隻股票,老師可按我年齡可再供哪隻股票?
有一手2382(舜光)@$105買入,有一手12(恆地)@$31.85買入,還有一手00006(電能)@$50.35買入。
我以上月供的都是優質股嗎?
我想月供多一隻股票可供哪隻高增長股?
適合我嗎?
如果再節省一點能儲到每月$5000,老師又有什麼可建議我呢?
謝謝老師,不急的,有空才回。
龔成老師:
月供是長期進行先有效果,因此唔需要理這刻的情況,保持進行就得。
以你的年齡,財富仍有增長力,你可以集中供一些平穩增長股,小小潛力股。現時月供及持有的,基本上都是優質股,大致無問題,不過工行(1398)就只是收息股,增長力不強,電能(0006)都是。
你可以考慮加入潛力股,如阿里(9988)、中生製藥(1177)。雖然現價唔算平,但你月供,只要金額不多,長期進行,就可以有效平均買入價,因此都可以進行。
如果想平穩,或當你有一定資金想投資,最好就是投資盈富(2800)。
另外,建議你多增加投資知識,在選股、企業估值、投資時機上落功夫,對你長遠財富有好大影響。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q17431:
龔成老師 我宜家嘅情況想請教吓你 希望三年內可以有100萬可以讀書進修同留低啲開支錢比屋企人
28歲 月入3萬 每月扣除開支儲8千蚊 有現金25萬 手持
AAPL股票約15萬(分段入手價150-200)
希望龔成老師可以比啲指引
以往一向都淨係識買啲股收息 曾經儲過3988,1398
之前朋友推薦就入手咗啲AAPL一直到宜家
龔成老師:
你28歲,唔需要太保守。
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
你這個年齡,是財富增值的黃金時期,要好好把握,盡你一切的力量去儲蓄、投資、學投資知識。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先,潛力股只能小注。
因此,工行(1398)、中行(3988)等,以你的年齡來說,並不適合。
至於蘋果AAPL,有質素的,有增長力,你可以持有。
但要留意,太集中單一股票,不是正確的投資做法,你應該建立一個更平衡的組合。
之後,你可以考慮盈富(2800)、銀娛(0027)、恆基(0012)、中銀(2388)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果想增長力高少少,可考慮:阿里(9988)、騰訊(0700)、港交所(0388)、舜宇光學(2382),但就要明白波動性比上述會高少少。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q17432:
你好,請問如果想長期穩定收息,是否可以入中電(0002)? 點解佢係好的收息股?
龔成老師:
中電(0002)是不差的收息股。
我地買股票就是買企業,企業有錢賺先能夠持續派息,中電業務就是收電費,就算經濟差都有錢賺,最多只是賺少D,佢過往的業務與派息穩定,所以作為收息股,可以。
------------------------------------------------
Q17433:
龔成sir我想問下,如果恆指成份股有變動(eg. 加入9988 3690 等) 之後,盈富基金會如何反應?佢會沽出被踢出藍籌既股票然後買入新藍籌股嗎?
如果係咁,2800會否因而下跌?9988 3690等會否因此而再升?謝謝
龔成老師:
盈富(2800)會賣出被踢出藍籌既股票,然後買入新藍籌股。
這是一個換股過程,如果盈富買入新藍籌的一刻,這些股升到最高點,之後下跌,這樣盈富都會跌。不過這只是一些中短期因素,我地睇長期就得。
而這些新藍籌,由於盈富到時一定要買,所以理論上股價會升的,但這只是中短期因素,同時市場一早預左這情況。
------------------------------------------------
Q17434:
你好,想問0006同2800邊個現價比較合理,想入,因用十萬港元炒美股時蝕左8000hkd, 希望能夠部署一下
同埋0006會唔會有利息但係蝕價?見佢跌左好耐
龔成老師:
唔好因過往的賺蝕影響你的投資策略,平常心、理性,是投資好重要的。
盈富(2800)與電能(0006)都合理,盈富有基本增長力,同時由於有50股,因此較平衡。至於電能,收息股,唔好對股價有太大期望。因此,要睇你的投資目標。
現價都合理,相信長線電能唔會賺息蝕價。
------------------------------------------------
Q17435:
成哥你好,我係你進階同基礎班的學生,今年三月雖然都加大力度入市,但沒有盡入,但我有小小失望。
就係因為我原本係半個月睇一次股價,但經歷今次V型反彈後覺得低位唔成日睇係捕捉唔到,但成日睇又覺得影響生活,對著d虛無縹緲既股價覺得人生失去意義。
我唔知要點算,唔睇又好快錯過,睇又好辛苦。唉
龔成老師:
首先,你要明白無人能捉到大市,我地在3月時,見到市場出現恐慌,加大力度入市,這已是正確的做法,不過大市會唔會再跌,無人知。
就算而家翻轉頭,我都會用之前的方法,加大力度分注入貨,而不是一次過動用所有資金。
如果你後悔無用盡資金,這就是犯了一般散戶會犯的「馬後炮」。所以,我當時都只是加大力度入貨,同時有現金剩,但這已是「當時已有資訊所做的最好分析決定」,因此根本無問題。
我地無人能捉到最底,只是分析平貴,以及用有系統的方法去進行投資。
所以,如果你認為成日睇股價可以捉到最底,這是天真的想法。
我過往做了10年銀行同證券行,見到唔少散戶分分秒秒睇股價,佢地正是輸得最多的一群,根本我地全行都知,但唔會有人講。
------------------------------------------------
Q17436:
多謝龔sir 回覆。我股票上有分開一筆用作短炒一筆用作長線的,現持有阿里巴巴6手(212入)網易2手(134入)盈富2手(26入)中國水務2000股(6.1時蟹貨)港交所1手(354入)。呢個組合ok 嗎
龔成老師:
組合無問題,上述都是有質素的股,新經濟類雖然有潛力,但風險同時存在,你要控制這部分的資金。
這個組合適合長線持有的。
只要你這刻同時留有一定的現金就得。
------------------------------------------------
Q17437:
老師,我今日好想特別同你講聲多謝,今日$75.5 沽出比亞迪 (平均 $37-44 供),因你講話他開始貴,雖然長期持有比較正確學你話齋,佢有機會倍升多幾倍,但似終小弟等唔到想食糊先。
小弟要繼續跟你學習點分平與貴!再一次多謝你!!
龔成老師:
好呀!
我會比較建議留部分貨,用「升一倍放一半」的策略。
不過唔緊要,因為你起碼都賺一倍,這是我一向都建議的,一般散戶只會賺10%就賣,而我強調要長線投資,就是希望起碼能睇一倍以上,而這點你都做到。
可以見到你獲得理想回報,實在太好!
------------------------------------------------
Q17438:
阿sir 想請問你點睇880同2282?咩價啱入?
2282睇你講話有潛力 但之前有新聞首季蝕1.7億 料可撐一年 而家疫情二三波嚟緊 一日未通關都好似未確實到對啲賭場有幾大影響
龔成老師:
澳博控股(0880)有質素,雖然增長力唔算好強,但有新項目會對佢有正面影響。賭業在中短期一定弱,但長遠仍是好好賺的行業,現價合理區中下部,其實有投資價值,可長線。
至於美高梅中國(2282),你預中短期一定弱,但正是這因素,投資價值才出現,但就要耐心持有,等到疫情與經濟好轉至得,因此一定是長線投資。
資金足夠支持的,就算唔夠,仍可以以不同的方式存市場集資。
當然,由於中短期仍有風險,所以投資時都要控制注碼。
------------------------------------------------
Q17439:
龔成老師本人有100萬現金,3月跌巿時將一半50萬投入股票巿場。之後再有增持。
這個比例是否太大風險。
現手持:
9988(1000),買入$182
6186(3000),買入$16
0410(20,000),買入$3.4
1928(2000),買入$29
9999(800),買入$130
6060(1000),買入$40
6178(5000),買入$11
由巿向好,有幾隻股賺超過20%,但又係你所講既潛力股,我應該吐現部分,還是繼續持有以上股票
龔成老師:
3月當時是股市的恐慌期,入市是正確的決定。但要留意你持股的質素。
阿里(9988)、中國飛鶴(6186)、金沙(1928)、網易(9999)有質素,基本上無問題,可以持有。
SOHO中國(0410)、眾安(6060)、光大證券(6178),質素中等,持有都可,但就唔建議太多。
我地繼續持有一隻股票與否,不是睇買入價,而是睇企業的質素、前景,以及現價平貴。
------------------------------------------------
Q17440:
阿sir,我上完五月班學到好多野,thank you~
近排個市又升返,我到底應該等佢落返先入市,定照現價入1手2800,當月供股票咁做好呢?
我現在有
100股 388 (259蚊入)
400股 823 (69蚊入)
1000股 2800 (22.88入)
實戰都係會有卡關位呀,唔該晒你先~
龔成老師:
你現時的持股,可以持有,如果這刻你想加注,唔太建加一些較熱的版塊,而一般的版塊,其實大致仍在合理區,盈富(2800)都在合理區,可以分注投資。
當然,都要睇翻你現金的情況,如果你現金唔多,就唔好心急加,如較多,就可以現時加,但都要同時留有現金。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。