關於 中大pe籃球 ，我們在網路上蒐集到這些相關的討論、資訊與評價

【快跑，否則無PE分】
作為中文大學校友，看到這句「快跑，否則無PE分」時，笑中有淚。

記得初入中大時，組爸媽（迎新營中負責帶領小組的師兄師姐）就跟我們一群新鮮人介紹學校，談到PE堂時，大家的反應都不甚正面，一句「仲要著埋PE衫，好似中學生㗎」，就盡見當中的嘲諷與無奈。

因為中大有一規定：每位一年級新生都需要在入學第一年的上下學期，修讀一個學分的體育課（二年級入學的，好像也要讀一個學分），是必修課，不及格不能畢業；而課堂的種類也不算少：足球、籃球、兵乓球、羽毛球、壁球、手球、田徑、游泳和體能鍛鍊等等，確實能讓學生在讀書以外，有些許鍛鍊身體的機會，只是對於沒有體育天分的同學來說，體育課不但是苦差事，更是拖累GPA的兇手。

然而，除了正正經經的上體育課外，評定分數的部分還特設一欄「體育參與分」（也就是PE分），要成功取得這些PE分，學生需要參與課外的活動，有是成為學校代表隊、書院代表隊的成員並積極參加訓練，也有是參加書院的活動，例如水運會、校運會等，其中，「環校跑」就是我所屬書院的一大熱門攞分活動——因為聰明的參加者總會有辦法，以最舒服的方式完成整個賽事，具體如何，我就不拆穿了。

但也正因為我知道「環校跑」的秘密，看見這句話時，才特別的感觸：會笑，因為這句話很有中大特色，非中大人看了會不明所以，也印證了各師弟妹在抗爭之餘也不忘幽默；帶淚，因為參加這場跑步的師弟妹們，可能是在跑著一場最認真的「環校跑」，不過贏了沒有奬，輸了會有罰。

他們跑，不是為分數，而是為了守住校園，守住香港。

========================

本文的Medium 連結：http://bit.ly/34QLfFC，歡迎入內支持

========================
其他文章
O Camp，是咁的：http://bit.ly/34QCfA9
學校之所以為學校：http://bit.ly/36UzVKh

大家好，係時候分享我 #孤毒遊東京系列 嘅Day 1 - 定Day 2？又好似係Day 1，妖是但啦，我都唔知自己講緊乜嘞；可能因為全日到而家講咗唔夠十句嘢，喺組織說話方面出咗啲問題。喺呢個唔知Day 1定Day 2入面，我走咗去睇波打發時間；J League已經睇過好幾次，今次就轉下口味，睇下日本籃球。

日本而家最高水平嘅籃球聯賽叫B.League，喺2016年由日本籃球聯盟同bJ聯盟合併而成；嚟到之後Check賽程，見到東京電擊有主場比賽，咁就上網買飛嘞。

東京電擊嘅主場喺立川市，近八王子嗰邊，由新宿坐JR轉私營鐵路，再加埋啲搵路呀睇水牌呀研究點轉車呀，就大概一個鐘頭鬆啲啦。星期日波，開晏晝三點一個字，我就一點左右由新宿出發。場館喺正車站隔離，唔算難搵。

B.League而家打到常規賽尾，排緊第二嘅東京電擊想爭上第一，非常之咁落力，呢場對三遠鳳凰早早就拉開咗。好唔好睇？講水平，當然冇得同上個月頭喺美國睇NBA比；不過相信大家都知，講媽劇停、講氣氛、講球迷嘅投入程度，日本真係有保証。同J League一樣，唔止係睇波，直頭係嗰個城市入面嘅假日小型嘉年華：場入面有嘢食、有啤酒雞尾酒飲、有「場館限定」嘅MXXter Donut；老豆睇波，阿媽同小朋友點算？場入面有個地方畀你泊BB車，仲有個小型籃球架畀細路仔放電，細細個開始培養當地人對球會嘅歸屬感同入場習慣，高招。

水準方面，日本喺亞洲算前列，東京電擊陣中就有日本國手田中大貴，果然名不虛傳：傳射分配做得非常之出色，真係做到應傳就傳應射就射(呢句嘢講就容易，要做得好係超級困難)；從幾次Pick and Roll之後交畀隊友Alley opp，就睇得出佢有極高嘅Basketball IQ；而且得分效率驚人，印象中只係見過佢炒咗三四球左右，難怪全隊得佢一個有得著專屬PE波鞋。

另一樣印象深刻嘅，就係外援同本地球員嘅分工。日本職業球隊都用外援，但係以東京電擊為例吖，現場所見，外援嘅作用主要係增加內線對抗性同高度多過用嚟狽飛，隊波嘅重心始終喺番土炮身上。相比好多地方都只係花盡心思搵高汁外援，為咗贏波用一鬼走天涯 - 邊個先睇得夠長遠？答案好明顯。

今日有成八成幾滿，都係得二千人鬆啲。場館其實唔大，嚴格嚟講仲有啲舊，分牌都仲係用推出嚟嗰隻(不過B.League個網Update得好快，數據睇到晒)，但氣氛好正；或者有人會問，咁嘅入場人數點養一支球隊？其實亞洲好多地方，大型企業投資體育就可以減稅，你望望佢哋嗰堆贊助，或者可以睇到啲端倪。

總括而言，今次呢個體驗非常唔錯，一來一回加睇波搞咗足足一個下晝，但係值嘅；惟一比較麻煩嘅係買飛，因為如果你想網上買嘅話，就一定要去佢哋個網登記做會員先，手續都幾煩下，又平假名又片假名又日本地址電話又剩；好嘞做咗會員買咗飛，又要單撈B.League個App用嚟喺現場Show QR Code，之但係個App喺香港嘅AXX Store或者GXXgle Play都冇，又要Reg個日本a/c，搞足我幾粒鐘；去到現場先發現有Ticket Office喺場館隔離，激死。不過又咁講，山長水又遠，我真係冇興趣坐一粒鐘車嚟摸門釘，萬一賣晒我咪捉蟲？其實係上網買定穩陣嘅；買得遲，得番啲貴飛，Court Side第三行，盛惠8500yen。

嘩，乜寫到咁鬼長嗱？可能自己一條友實在太冇嘢可以做嘞；本來今日想跑完步先去睇波嘅，但由於之前嗰晚搞買飛搞到好夜，結果唔知醒，希望聽朝可以早啲起身去跑啦！病況方面，今日繼續自己同自己講嘢，同其他人講嘅就唔知有冇十句，都係啲唔該啊多謝啊之類咁啦。由於阿太唔喺身邊，我返酒店之後寫完毛筆字，背多三兩首新詩同睇埋嗰幾頁莎士比亞之後，就去瞓覺lu。(好似病得越嚟越嚴重🤦🏻‍♂️)

#毒不可耐
#毒自睇波
#BLeague
#AlvarkTokyo