關於 九龍寨城公園地圖 ，我們在網路上蒐集到這些相關的討論、資訊與評價

【九龍城寨的逃犯】（完）
　
（１）https://bit.ly/3t3FYWR
（２）https://bit.ly/3ecyT1T
（３）https://bit.ly/2PUXyyW
　
我戴上帽子後急步離開，跟一間電器店借用了電話報警。
　
「警察局嗎？我嗅到樓下傳出很大的腐臭味，我懷疑有屍體，你們趕快來看看。」
　
我向警察說出正確地址，這樣的話，那兩個女孩應該不會有事了。
　
就在這個時候，我感覺到有幾個身影站在我的背後，遮蔽著我前方的光線。
　
一回頭，便看到老大的小弟，他們一左一右架住我的膊：「終於找到你了。」
　
　
我想發難衝出店外，門外已被人完全堵住。電器店老闆走出來畢恭畢敬地說：「各位大哥，在外面弄好嗎？我什麼都沒看見，拜託拜託。」
　
之後，我被他們十多人帶到大廈天台，不難猜想他們想要對我做什麼。領頭的小弟問，我在社團中跟他有過幾面之緣，每次有危險的工作，他都會當敢死隊。
　
「你們想要錢吧？我可以把錢全都分給你們。」我試著尋找一線生機。
　
「不用了，現在你的人頭更加值錢，誰把你的人頭交出去，誰就是下任老大。」小弟挖著鼻孔說。
　
他們將我團團圍住，不斷推撞，我已被逼到天台邊緣，身後已經沒有退路。此時，我好像看到那個清朝的男人出現在天台上，他好像在等待我著我。
　
「你該不會以為躲進城寨就能逃得掉吧？」小弟。
　
逃不出去…
不管是那個吸毒死的女人，清朝男人都說著一樣的話…
　
＊＊＊＊＊＊＊
　
我與妹妹小時候在九龍城寨長大，因為發生了一些事成為孤兒。闖入屋的警察將我們帶走，並送進孤兒院。
　
成年後，我跟妹妹都選擇搬回九龍城居住，當我第一次回去，還以為自己走錯其他地方，因為這裏跟以前變得截然不同。
　
1984年12月19日，中英兩國簽訂《中英聯合聲明》，在聲明中表示，收回香港是全中國人民的共同願望，中華人民共和國將在1997年7月1日對香港恢復行使主權。聯合王國政府亦願意將香港交還。
　
另一方面，由於中華人民共同國所實行的「社會主義」，而香港則是個「資本主義」社會。在一國兩制的前題下，中國承諾制度與生活方式五十年不變。
　
在移交主權前的過渡期，還需要解決香港各項問題，在1987年兩國便共同決定拆卸罪惡的根源地「九龍城寨」，只保留部分歷史文物，並遷徙所有居民。
　
雖然遭到部分居民強烈反對，但在1993年，政府以巨大的錘石機器，用最原始暴力的方式對九龍城寨進行清拆。
　
由於大部分建築物都是非法僭建，只要其中一座大廈倒塌，其餘大廈也相繼倒下來。
　
1995年8月，於遺址建成九龍寨城公園，是一個有歷史展覽館以及單車徑結合而成的公園。
　
我不知道為何會搬回九龍城，也許就如母親生前所說，住進九龍城寨的人，根本沒法逃出去。
　
我還記得在她的屍體被人從屋內搬走時，我看著她死不閉目的雙眼。還有…那個莫名其妙住進我家的叔叔，他的身影從天台墮下，我亦對他的有一剎那的對視。
　
從他們的眼神彷彿在告訴我，他們自由了。
　
　
或許我們生於社會這巨大漩渦中，根本沒有人能夠逃出去。
　
（完）
用逃犯與女孩的故事介紹整個九龍城寨的歷史。
希望大家喜歡～
　
在香港被消失前，用故事將歷史留住。
６月將會推出《屬於香港人》這本書。
　
全書以故事瞭解歷史，用手繪地圖繪畫當時狀況！
為避免這本書「被消失」，唯一方法是「沒存在過」。
所以只接受預售，有多少預訂，就印多少本。
不會公開發售。
預售網址：（可寄海外）
https://bluegodzistore.boutir.com/

《無異之局》荒村異聞（三）
　　
【韋家聰視角】時間返去一個鐘頭前。當時我坐緊無二嘅小型貨車，準備前往「城寨幫」搵一位叫做凌永岳嘅人……希望可以同佢聯手對付狄陀。
　
「阿聰，我知你而家應該係一頭霧水……但放心喇，一程車絕對夠幫你搞清楚狀況。」無二邊踩盡油門邊解釋：「你仲記唔記得有段時間我去咗外國搵關於惡魔同詛咒嘅資料？」
　
「嗯……尾東樓事件之前。」
　
「雖然喺嗰邊只係搵到啲殘缺資料，研究到一半又要趕返嚟救你哋……」無二嘆咗口氣，「但之後我都有搵過唔同嘅專家做分析，包括我師父。」
　
無二其實甚少提起佢師父，對上一次已經係啱啱開始做助手嘅時候（即係半年前）……冇記錯係叫做黃天定，而家好似身處英國過緊退休生活。
　
「最後我得出一個結論──狄陀係古老惡魔，佢同普通惡魔唔同。喺一般情況下，就算你有本事消滅佢嘅本體，佢嘅靈魂依然接近永恆存在。只要佢同其他人類仲有契約連結又或者詛咒未解除，一段時間之後就可以復活……」
　
＝＝＝＝＝＝＝＝＝
《荒村異聞》連載中：
https://www.facebook.com/pg/Echo.of.Heart/photos/?tab=album&album_id=2067100083421797
　
《惡夢島》全集：
https://www.facebook.com/pg/Echo.of.Heart/photos/?tab=album&album_id=1861298627335278
　
《極樂謊園》全集：
https://www.facebook.com/pg/Echo.of.Heart/photos/?tab=album&album_id=1736011713197304
　
【廣告】《無異之初》、《無異之地》各大書局有售！
＝＝＝＝＝＝＝＝＝
　　
「你咁講……即係我哋要先知道狄陀同過咩人訂立契約，再逐一幫呢班人解除連繫……最後先可以消滅佢？」
　
先唔好講成個過程好似大海撈針，就算搵到呢班人，都唔知可以用咩方法解釋連繫。退一百步講，假設真係做到，無二應該早就幫咗我同華哥。
　
「其實唔一定諗計解除，只要殺晒呢批人，然後再殺狄陀亦係一種解決方法。」我透過後鏡見到無二露出一個壞笑。
　
「你……應該唔會咁做？」我唔太確認咁問。
　
「如果我會咁做，仲洗唔洗冒住俾差佬影快相嘅危機揸到咁快？」無二反問：「我之所以帶你去『城寨幫』，就係因為我發現到更有效率嘅方法……」
　
「嗰個凌永岳……真係咁有本事？」
　
「佢嘅實力我其實唔清楚，我只係知佢手上有件特殊工具可以幫到我哋──叫做『斷緣玉』。
　
「斷緣玉？」我腦海浮現一個綠色玉鐲嘅模樣。
　
「傳說中嘅『神器』之一，可以用嚟創造出一個同外界完全斷絕因果連繫嘅結界。只要將狄陀困喺裡面再殺死佢……就可以斷絕所有復活嘅可能性，完完全全咁消滅佢。」
　
「即係最後都要有人喺裡面消滅佢……」
　
「呢層自然會有人負責。」雖然冇講清，但無二明顯指佢
自己。
　
「但我哋貿貿然闖入去，會唔會好似『極樂園』嗰陣咁……受到不歡迎對待？」
　
「所以我先會揀呢個時間，減低俾外人發現嘅風險。」無二解釋：「至於凌永岳最後會點決定……就要睇佢想唔想報仇喇。」
　
「吓？」我不解。
　
「因為『城寨幫』嘅上任幫主就係俾狄陀殺死……而呢個人正好係佢親生老豆。所以無論在公在私，佢都係應該要報仇。」
　
既然係殺父仇人，咁照計佢願意幫手嘅可能性應該好大。但經歷完「極樂園」一事之後，都係唔好事前抱有太大期望比較好。
　
講到呢度，無二已經揸到入界限街。再轉多兩個街口之後，就隨便搵個位置停低落嚟。
　
「大致係咁多……你有冇嘢想問？」落車之際佢突然問。
　
老實講，我腦海裡面嘅疑問足夠寫滿一張紙。但最想搞清楚嘅，當然只有一條。
　
「你突然消失咗一個星期，到底係發生咗咩事？」
　　
雖然一星期話長唔長，但對我嚟講卻係相當煎熬。
　
最初見到佢寫「離港數天」，頭兩日都仲係可以好理性，覺得無二真係有急事所以先行開。但到咗第三第四日，就會開始擔心……佢係咪出咗咩意外？會唔會係「白色秩序」班人終於搵上佢？抑或我喺「極樂園」呢件事上面激嬲咗佢？
　
到咗最後幾日，擔心終於轉化成為恐懼。如果無二真係消失咗永遠唔會再出現，咁即係我要一個人面對狄陀……面對呢個隨時都有能力殺死我嘅惡魔。
　
恐懼感，就係隨住呢個想法越趨強烈。但我擔心嘅唔係自己嘅生命安全，而係如初……我甚至有晚發夢夢見自己去返「極樂園」嘅VIP房，聽到如初喺門嘅另一邊崩潰大喊……
　
我真係好驚自己會先走一步，然後剩低佢一個孤苦伶仃。
　
「反正仲有啲時間，應該夠解釋埋。」無二本身已經想推門出去，但最後又收返手，「我去咗救阿杏。」
　
「救杏姐？」我驚訝。
　
「佢之前咪話自己喺『惡夢島』做緊嘢……結果嗰邊出意外搞到一鑊粥要我執手尾。」
　
「即係呢張紙係佢留低？」我喺銀包裡面拎出當日貼喺辦公室門口嘅紙條，然後遞俾無二睇。
　
「既然畫得心心，咁九成係。」無二無奈咁講：「雖然話救，但成個過程我都係半被迫嘅狀況下幫手，所以就連電話都用唔到……大致係咁，要完完整整解釋嘅話應該要講到天光。」
　
「嗯……」
　
「咁你呢個星期有冇偷懶冇練習？」無二所指嘅當然係「萬化紙」。
　
「你畀我嗰本已經用完……本來已經準備上辦公室拎本新嘅。」我回應。
　
呢個係事實。無二消失嘅呢段時間，我只有練習嗰陣先可以清空思緒。我想盡快提高自己嘅實力……等喺最壞情況來臨嘅時候有能力一博。
　
「嗱，呢度仲有半本，遇到特殊情況就用住先。」無二喺車箱裡面拎出半本然後交俾我，「行喇。」
　
「但咁夜會唔會驚搵佢唔到？」
　
「哈哈，冇問題喇……我直覺認為佢同我哋一樣都係夜鬼嚟。」
　
畫面一轉，我哋已經嚟到寨城公園外圍。因為已經就快凌晨十二點，所以周圍基本上係一個人都冇。而寨城公園過咗十一點係會關閘，所以正常係入唔到去。
　
「我哋係咪要偷入去？」我望向圍欄裡面，「唔知裡面有冇保安睇住……」
　
「唔需要，我哋喺外圍入去就得。」無二將一個酒杯墊交俾我，「你先背咗呢組數字，等我搵個合適嘅入口。」
　
等我接過杯墊之後，佢邊行邊繼續解釋：「『城寨幫』本身係一個大型結界，每晚十二點就會更改一次『通行密碼』，如果唔知密碼格硬闖入去嘅話應該馬上就會俾人發現……情況就好似上次『極樂園』咁樣。」
　
「係杏姐畀呢個密碼你？」我嘗試將前面提到嘅事串連埋一齊，最後得出呢個想法。
　
「嗯。」無二點頭回應，伸手掂落一道石牆，「應該係呢度喇。你過嚟，好似我咁做。」
　　
我行過去，學佢咁伸出左手掂落石牆，一開始係完全冇事發生。好彩附近冇人，唔係夜媽媽睇落成個畫面應該係幾詭異。
　
「密碼係咪已經記住咗？」佢問。
　　
「記得……4117891。」我喺佢面前背一次，「一陣我哋係咪會穿過呢道牆？」
　
「穿過？」無二一笑，「當然唔係，你唔好放手……慢慢擰轉頭望下後面。」
　
我轉身一望，赫然發現身後公園居然變成一片空曠嘅大平地，而且前方一望無際，一棟建築都見唔到。當我仲驚嘆緊變化太大嘅時候，左手嘅粗糙觸感突然起變化。
　　
望返正面，可以見到石牆開始化成飛灰，最後眼前出現一條道路，而路嘅左右兩側係約莫十層高嘅舊式樓宇。抬頭一望，仲可以見到大廈外圍鋪滿咗鐵皮、廣告牌、左穿右插嘅電線以及各式各類好似隨時都會跌落嚟嘅僭建物。
　
「佢哋……」我一睇到呢度即刻恍然大悟，「將成個城寨複製咗喺結界裡面？」
　
「冇錯。」無二將一包香口膠遞俾我，「你拎一舊咬住，呢個係用嚟隱藏氣息。今次太趕……等有機會我再教你點樣唔用道具自己做到。」
　
準備就緒後，我哋開始沿住大街深入「城寨」嘅中心。
　
「你呢個年紀……應該啱睇唔到舊城寨嘅清拆。」
　
「嗯。」我行咗陣終於注意到有路牌，上面寫住「大井街」，「你呢？」
　
「我嗰陣喺孤兒院同外界隔絕所以都完全唔知呢件事……係十幾年之後先有機會睇返『城寨幫』嘅發展史。」無二開始娓娓道來：「當年中英兩個政府傾緊要拆城寨嘅時候，內部當然有好多不滿聲音。但見呢件事似係勢在必行，所以當時勢力最大嘅凌氏同董氏決定放低分歧，再聯合其他派別組成一個大幫會，決心進行『拯救方案』。佢哋花咗一堆人力物力，邀請咗好多有能人士，過程中仲死咗唔少人……結果用咗一年時間，喺清拆開始前將成個九龍城寨完美複製喺一個結界裡面。」
　
我哋由大井街轉入龍津路，可以見到兩側都有唔少騎樓。一種猶如去咗片場嘅感覺油然而生，又彷彿好似回到過去咁。可惜係夜晚而且燈光唔夠，唔係肯定可以發挖到更多特別嘅地方。
　
「如果係當年，呢條街道應該時時刻刻都係好熱鬧。」無二繼續解說：「因為當年政府有做好安置計劃，所以大部分原居民就算知道有個複製城寨，實際願意留低嘅人都唔多……反而後期吸引咗唔少喺外地逃難嚟嘅人住喺度，一路加加減減，而且應該有五六百人仲住喺度。」
　
講到呢度，佢再轉入一條窄巷。因為呢條巷更加暗，所以感覺無二係有確實目標先會選擇呢條路。
　
「你真係知道凌永岳而家喺邊？」
　
「身為一個老闆，每次見客前當然係做足準備。」無二轉彎走入其中一座大廈嘅後門。
　
我哋先上一層，再行完筆直嘅長走廊，最後嚟到大廈嘅中庭位。其實我離遠已經見到一個疑似攀石場嘅巨型石板，直到行近先更加確認自己冇睇錯……
　
「但呢度唔係攀石場咩？你會唔會搵錯地方……」我不安咁問。
　
「放心喇，阿聰，係呢度冇錯。」無二微笑道：「嗱，佢果然喺度。」
　
當我行到可以見到攀石場正面嘅位置，終於見到有個著住黑衫嘅後生男人，呢刻佢單手握實岩點，一注意到我同無二就即刻鬆開手直接跌落地面，明明離地差唔多四五米高，但佢卻沉穩落地。單憑呢一下，我已經肯定佢唔係普通人……
　
換轉係我，肯定已經斷腳起唔返身……諗到呢度，我不禁回想起中學打籃球俾人踢斷腳嘅不愉快經歷。
　
「我知道你係邊個。」男人抬起頭望向無二，「你就係無二。」
　
「冇錯。」無二回應：「城寨嘅少幫主凌永岳，我今次嚟係想搵你傾下合作。」
　
「合作……做啲咩？」凌永岳皺起眉頭問。
　
「對付我哋嘅共同仇人……狄陀。」
　
凌永岳聽完眉頭皺得更深，隔咗陣先再講：「呢幾年我已經聽過類似嘅說話差唔多十次……幾乎每一個人嘅目的都係想利用我。」
　
「你既然知我係邊個，就應該清楚我同其他人唔一樣。」無二接住講，雖然佢一臉自信，但從我角度睇其實係好冇說服力。
　
凌永岳聽完並冇即時回應，而係行埋去執起地下嘅水樽，再從旁邊嘅樓梯行上嚟，最後嚟到我哋面前盯實無二講：
　
「齋講係冇用，我只會憑自己雙眼睇清楚你係咪可信。」
　
「咁你即管望呀。」
　
佢哋再次盯實對方，呢刻氣氛突然變到咁僵，等我仲以為呢個計劃又會失敗收場，但我錯了……
　
幾秒後，凌永岳轉身行入走廊同時講：「跟我嚟。」
　
雖然好意外，但我當然冇發呆企喺度，跟住佢同無二繼續行。
　
「你哋點解會知道『城寨』嘅密碼？」凌永岳突然問。
　
頭先近距離再望清楚，可以確定佢嘅年紀應該比我細，大約係二十出頭……難怪會叫做「少幫主」。雖然唔知佢要面對啲咩，但感覺壓力肯定係相當大。
　
「係仇雪杏俾我。」無二如誠回答。
　
「杏姐？」從佢呢個反應，證明佢都係識得杏姐，「我同佢對上一次聯絡已經兩年前，佢呢期過得好唔好？」
　
「唔計俾人開槍射中嘅話，都算係過得唔錯嘅。」
　
「吓？」凌永岳一臉錯愕，「點解嘅？」
　
其實我嘅反應都係一樣，睇嚟「惡夢島」發生嘅事應該係相當嚴重……
　
「一匹布咁長，我建議你主動打畀佢……佢而家應該幾得閒，應該好方便同人傾電話。」
　
「哼，」凌永岳打側身望咗我一眼，「咁你旁邊呢個人係邊個？」
　
「韋家聰，我嘅助手。」無二回應：「佢就係狄陀想解決嘅對象。」
　
「唔好怪我直接，感覺阿聰並唔算係一個特別嘅人……點解你會想幫佢？」
　　
「對你嚟講唔特別，但對我仲有其他人嚟講就唔同。」
　
「無二……」我聽到呢度有啲意外。
　
「至少佢平時出去做清潔係幾勤力，幫咗我唔少忙。」
　
就好似被潑冷水一樣，頭先一瞬間嘅感動當堂煙消雲散。
　
凌永岳帶我哋行返出龍津路，走咗大約半條街嚟到一座叫做義學大樓嘅地方，最後去到大樓入面嘅其中一間房。
　
呢間房並唔大，左右兩側擺咗兩個擺滿書嘅書櫃。而正前方係一張書台，雖然書台上面擺咗好多嘢相當凌亂，但我馬上就俾一張地圖吸引住……同之前喺無二辦公室見到標住「異地」嘅地圖款式係一模一樣。
　
「頭先喺外面講嘢唔太方便……呢度會好好多。」凌永岳解釋：「直接入正題喇，你哋嚟得搵我，應該係想借我嘅『斷緣玉』去對付狄陀？」
　
「冇錯。」
　
「咁我就先從結論講起……可以，但你哋要先等半個月。因為我喺『城寨』呢邊仲有事處理緊，而且『斷緣玉』呢刻都唔喺我身上。」
　
「當然冇問題，反正呢件事已經纏繞咗好耐，唔差在多半個月……」無二回應，我點頭表示同意，冇諗過事情會咁順利？
　
「但就算你哋得到『斷緣玉』，狄陀一日唔現身你哋都係解決唔到佢。」凌永岳接住講：「據我所知，佢而家根本就唔喺香港，而係身處喺外國……不斷吞噬『異地』增加實力。」
　
（待續）
　
　
解釋埋下集開始加速，暫定星期日或一有文。睇完記住幫手留個嬲同分享開去呀！
　
p.s. 實體版更正返「萬變紙」做「萬化紙」。
　
【廣告】《無異之初》、《無異之地》各大書局有售！
　
Patreon 都開咗啦，八月中正式開始！
https://www.patreon.com/echoofheart?
　
－－－－－－－－－－－－－－－－
　
【地方的無默媽資助計劃】（試行中）
　
近年作者生存空間越收越窄，大眾結業更加似係雪上加霜。所以推出資助計劃，希望各位可以直接課金支持。計劃並唔係強制性，一蚊可以，想繼續免費睇亦無妨，有心就可。
　
Payme 連結：
https://payme.hsbc/echoofheart
　
轉數快 FPS ID：6065460
　
計畫緣由及詳細內容：
https://bit.ly/39b5Fuw
　
－－－－－－－－－－－－－－－－－
　
IG：echoofheart

《無異之地》極樂謊園（完）
　　
如果我唔係堅持出嚟睇嘅話，真係可能永遠都唔會知道呢個真相──原來極樂園嘅園長，就係當初救Cheryl出嚟嘅陳伯。
　
「我唔信……」Cheryl顯然接受唔到呢個事實，「陳、陳伯，你答我……你係咪俾人威脅先至咁講？」
　
「當然唔係。」陳園長搖搖頭，「從來冇人可以喺樂園裡面要脅到我。」
　
呢刻回想返轉頭，之前被困喺摩天塔嘅時候，Cheryl一醒返佢就冇再出聲，可能就係唔想咁快揭露身份……
　
「但你嗰陣……提到樂樂嘅時候，我明明睇得出你係真心……」Cheryl難受到跪喺地上面。
　
「因為我同妳講嘅全部都係真話，只係冇將事實嘅全部講晒出嚟。」陳園長嘅表情變得凝重起嚟，「十四年前，我的確係帶過樂樂嚟到極樂園。希望佢可以見返自己嘅親生媽媽，然後同我一樣愛上呢個地方……但事與願違，佢偏偏就係樂園有史以嚟最冇辦法接受嘅『異類』。」
　
＝＝＝＝＝＝＝＝＝
一至十三集：
https://www.facebook.com/pg/Echo.of.Heart/photos/?tab=album&album_id=1736011713197304
　
【廣告時間】《無異之初》、《時間守衡者》、《絕命上映》、《絕望走廊》、《絕無轉機》各大書局有售！
＝＝＝＝＝＝＝＝＝
　　　　
講到一半，Cheryl身後嘅旋轉木馬忽然運作起嚟。其中一隻木馬上面仲坐咗一個小女孩，雖然隔咗一段距離睇唔清楚佢嘅樣貌，但佢玩木馬時發出嘅笑聲，確實係令我感到毛骨悚然。
　
──嘻嘻──
　
「我永遠都唔會忘記，當時其他人係用幾厭惡嘅眼神望向樂樂……唯獨一個人唔同，佢就係上任嘅園長，只有佢係一臉善悲咁望住我兩父女。」陳園長合埋雙眼回想起嚟，「跟住嘅事就好似我之前所講咁，就算我點跪點求，佢哋最後都係帶走咗樂樂……」
　
──哈哈──嗚──嗚──
　
「當刻我可以話係萬念俱灰，但上任園長並冇放棄到我。佢等到其他人離開晒之後，行埋嚟用溫暖嘅手扶起我，然後同我講：瀚洋啊，你知道我一直對你寄予厚望，就算發生咗呢件事，都冇改變我對你嘅睇法。而你，除咗忘記之外，仲有一個方法可以幫到樂樂──就係成為我嘅繼承人，管理極樂園，然後改變呢一切。」
　
「哼。」無二不禁冷笑一聲，自言自語咁講：「果然做得園長都係老奸巨猾，識得收買人心。」
　
「就喺嗰一瞬間，我就好似得到救贖一樣……最後毫不猶豫就應承咗佢。」陳園長講到呢度用力握緊雙拳。
　
就喺下一刻，企喺陳園長同Cheryl周圍嘅人居然感動到鼓掌起嚟。我當然理解唔到感動嘅地方喺邊，而Cheryl都係一樣……
　
「咁樂樂呢？你最後邊有救到佢！？」Cheryl激動咁講：「我只係見到佢俾你哋困住，然後每日都俾人折磨同研究……只有一個熊公仔陪住佢……」
　
「呢個正正就係妳誤會嘅地方。」
　
「我冇！雖然只係零散嘅片段，但我係親眼見到……」
　
「當時我仲未成為極樂園嘅園長，所以根本唔到我控制。」陳園長凝視住旋轉木馬上面嘅小女孩，「直到一年後，正好係我上任成為園長嘅嗰一日，居然有個神秘人闖入樂園，拐帶咗樂樂。」
　
「佢話係拐帶，但我會話係救走。」無二繼續壓低聲講。
　
「你知道係邊個人救走咗佢？」我問。
　
「唔知。」無二聳聳肩，「但可以令佢擺脫呢個地獄，點睇都唔算係『拐帶』。」
　
「往後嘅日子，就算我點落力，都係搵唔返樂樂……我甚至冇能力搞清楚嗰個神秘人係邊個。」陳園長自責咁講：「原來，就算我做咗園長，都係一樣救唔到自己個女──呢份愧疚感，就係咁一直長留喺我心裡面。小妹妹，嗰陣帶妳暫避嘅地下室，就係我為咗銘記自己嘅過錯而起出嚟。」
　
終於，旋轉木馬慢慢減速然後停落嚟，而小女孩亦化成灰燼……消逝於風中。
　
「咁點解……點解你要呃我？」Cheryl質問：「我明明咁信你……仲打算……打算嚟救你出去……」
　
「小妹妹，我就係知妳心地好。所以先同員工一齊安排呢場大龍鳳……」陳園長慢慢行到佢面前，「……為嘅就係想幫妳啊。」
　
想幫你──我即刻諗返起佢都同我講過同一番說話。雖然接住落嚟發生嘅事或多或少證明咗佢冇打算害我，但我始終都係信佢唔過……
　
「幫……我？」
　
「小妹妹，妳離開樂園之後，有冇曾經諗過，點解自己會特別唔同？明明其他人都已經接受咗樂園，點解唯獨妳係同呢度過唔去？」
　
「我……」Cheryl垂低頭，表現得好痛苦，「我唔知……」
　
「等我代妳答──妳有。」陳園長加重咗語氣，「妳仲因為咁覺得好痛苦，因為妳唔想成為異類。而妳確實唔應該係異類……小妹妹，真相係──妳俾人利用咗。」
　
「吓？」Cheryl聽完一臉錯愕。
　
我聽完一樣好意外，然而無二卻係一臉「早就知道」嘅表情。
　
「自從個神秘人拐走咗樂樂之後。極樂園每隔一段時間就會出現新嘅『異類』──佢哋同妳一樣，總係冇辦法接受樂園，而且呢種質疑仲好似有傳染力一樣……呢班人初初確實係對樂園做成好大損害，慶幸我有班優秀嘅員工，就算情況幾嚴峻，最後都總係可以成功解決……而慢慢，我哋都搵到呢班人嘅共通點。」陳園長眼神變得銳利起嚟，「佢哋事前都接觸過一個年輕嘅女仔……嗰個女仔就係樂樂。」
　
「樂樂？但我……咦？」Cheryl嘗試回想起嚟，「唔通……我雖然係見過一個女仔，但已經係我離開樂園之後嘅事……佢仲畀咗把遮我……」
　
「咁妳仲記唔記得，係邊個朋友同妳講阿海同Zoey偷食嘅事？」突然有另一個少女喺人群裡面走出嚟問。
　
「Alice……妳果然冇去到歐洲……」Cheryl見返熟悉嘅友人後，不禁露出鬆口氣嘅表情。
　
「對唔住，我只係照園長嘅說話做。」Alice道歉：「Cheryl，妳試下諗返，到底嗰個『朋友』係邊個？」
　
「佢……佢係……」Cheryl越諗越苦惱，「點解我會醒唔起？明明……明明我仲記我哋係去邊間Cafe見面……但就係記唔起佢係邊個……」
　
「抱歉，係我個女搞成妳咁。」陳園長接住講落去：「係佢擾亂咗你嘅記憶，將佢嘅『異端』思想植入妳腦海裡面，然後促成成件事……而佢嘅最終目的就係想摧毀極樂園。」
　
「摧毀極樂園……」Cheryl茫然咁重複：「就因為呢度曾經折磨過佢？」
　
「其一，但最大嘅理由，係因為我係極樂園嘅園長……而樂樂佢，呢世人最憎嘅人就係我。」陳園長無奈咁一笑，「我諗，佢應該覺得我係為咗攀上園長呢個位置先係拋棄佢……但我唔係。呢十幾年以嚟，我每分每秒都希望可以同佢親口解釋……」
　
「哼。」無二聽到呢度不禁嗤之以鼻。
　
「小妹妹，妳記唔記得地下室裡面嗰本簿仔？即使事隔咁多年，我同佢嘅比試依然係不停進行緊──佢想盡辦法破壞樂園，而我就見招拆招、攪盡腦汁去保護呢度。」
　
「咁我呢……我算係咩？」Cheryl痛苦咁問：「你兩父女任意操控嘅玩具？」
　
「當然唔係！我點會咁諗呢？」陳園長態度非常認真，「我頭先都講咗，我係想幫妳。」
　
佢舉起雙手拍一拍，下一秒即刻有幾個人喺人群裡而走出嚟……如果我係冇估錯，佢哋應該就係當初同Cheryl一齊進入樂園嘅幾位朋友。
　
「Cheryl，加入我哋啦。」慶仔笑住講：「就係呢度嘅人幫我追到個女同事。」
　
「呢個樂園真係好犀利，我照『疑幻』區裡面學到嘅嘢去做，果然變得受歡迎咗。」朱少接住講：「妳好快就會見證我成為一個著名嘅youtuber。」
　
「我同阿廉都喺度搵到好多樂趣。」Bella牽住阿廉隻手講：「係外面世界絕對唔會有……」
　
「Cheryl，我知妳對我有誤會。」Zoey用誠懇嘅態度講：「但我同阿海真係咩都冇發生過。」
　
「冇錯。」阿海點點頭，「全部都係嗰個人誤導妳。」
　
「係真嘅……？」Cheryl望向佢哋，睇得佢內心真係動搖緊，「但我真係唔知……我腦海好混亂……唔知邊個先值得相信……我好想……」
　
「忘記呢一切，係唔係？」Alice指向旋轉木馬嗰邊，「Cheryl，呢度正正就係為咗妳而設。」
　
「吓？」
　
就喺下一刻，陳園長慢慢伸出右手，微笑住講：「只要妳願意坐上旋轉木馬，轉一個圈……妳就會忘記晒所有唔好嘅嘢，同時腦海裡面嘅『異端』思想都會被消除。之後，妳就可以無憂無慮就加入我哋……就好似之前嘅其他『異類』一樣。」
　
「無二！？」聽到呢度，我終於忍唔住出聲，「你真係唔諗住阻止佢哋！？」
　
「阻止？」無二皺起眉，「阿聰，你同Cheryl好熟咩？你覺得你真係清楚佢內心想要啲咩？」
　
「吓？」
　
彷彿回應我哋一樣，Cheryl終於忍唔住喊住講：「我……嗚……自從離開樂園之後一直都好痛苦……阿海變到好陌生……Alice又消失咗，成個世界就好似剩係得返我自己一個……」
　
「但而家唔係喇。」陳園長慢慢扶起Cheryl，再將佢隻手交俾阿海，「妳嘅愛人朋友全部都喺度，而妳……馬上就會加入我哋呢個大家庭。」
　
阿海先溫柔咁幫Cheryl抹走眼淚，然後就帶佢一步步咁行上旋轉木馬。最後兩個人一齊坐上一隻較大嘅木馬上面。
　
「Cheryl……」而我，只能眼白白睇住成件事發生。
　
因為，最有能力嘅人，呢刻都已經選擇咗唔會出手。
　
「阿聰。」無二拍一拍我嘅肩膀，「無論真相係點……阿海同Zoey有冇偷食，其實結果都係一樣。總有啲人，佢嘅世界只係圍住一個『情』字而轉──愛情、友情、親情，就係佢哋嘅一切。」
　
確認兩人坐穩後，旋轉木馬又重新啟動起嚟。剛開始轉嘅時候，可以見到Cheryl依然仲喊緊，阿海就喺背後安慰佢。直到佢哋轉到去被中心柱遮住嘅位置，再重新出現嘅時候，Cheryl居然可以開懷大笑起嚟。彷彿越過中心柱嘅短短一瞬間就變成第二個人咁……
　
望見呢一幕，我內心突然覺得好震撼。
到底邊個啱、邊個錯？
邊句係真話、邊句係大話？
邊個係好人、邊個係壞人？
喺呢個地方，就好似唔會搵到答案一樣……
　
大概，唯一可以肯定嘅，就係我永遠都唔會接受到呢個地方。
　
我就係咁一直茫然咁望住木馬不停旋轉，直到陳園長行到嚟我哋面前。
　
「兩位嘉賓，需唔需要我送你哋走？」佢客氣問。
　
「唔需要喇，我應該識路，嗰邊嘛。」無二隨手指向左手邊，「我感覺到嗰邊有個結界裂縫……應該就喺嗰間荒廢小屋裡面？」
　
「冇錯，咁我就唔打擾你哋。」陳園長點點頭，「其實作為園長係唔應該講呢句，但我真心希望唔會再喺樂園裡面見到你哋。雖然你哋呢班人鍾意叫呢度做『異地』……但好明顯，呢度係冇任何異常，冇嘢需要係哋清理。」
　
無二今次聽完之後並冇回應，而係輕輕拍向我背脊講：「走喇。」
　
臨走之際，我見到遠處嘅Cheryl已經同返一眾朋友會合。呢刻嘅佢確實係笑得好開朗……就如園長所講，無憂無慮。
　
離開極樂園嘅呢段路，老實講並唔算特別。我同無二喺冇人阻礙嘅情況下，好順利就搵到荒廢小屋，然後入到去樂樂曾經被困嘅嗰間房裡面。接著，經歷完一下天旋地轉，我哋就返到去海盜船旁邊……
　
令我意外嘅係，原來太陽已經落山準備入黑。不過周圍嘅遊客依然係非常多，但佢哋都冇注意到我同無二憑空出現，而係沉醉喺歡樂嘅氛圍裡面。
　
「總算出返嚟……其實我已經餓咗好耐喇。」無二講完就繼續行。
　
「你係咪一早知道件事會係咁發展？」其實前面一段路我幾乎係冇講到任何嘢，係直到呢刻去到安全地方，先至忍唔住出聲。
　
「點可能？起馬我唔知個園長會畀咩你試……」無二冷酷咁一笑：「但估得中六七成已經足夠。」
　
「既然我可以安全離開樂園，唔洗好似Cheryl咁消除記憶……即係園長冇講錯，你係有能力毀滅成個樂園。點解你唔咁做？明明……明明嗰度點睇都好唔正常！」
　
因為我喺最後一句加重咗語氣，所以有幾位遊客行過時都嚇咗一跳。呢刻喺佢哋眼中我同無二應該係好奇怪……兩個大男人，居然喺樂園裡面鬧交。
　
幾秒後，無二先嘆咗口氣，然後回答：「你跟我嚟，等我話畀俾你知點解。」
　
為咗聽個答案，我當然係跟住佢行……一直行到去海馬公園入口嘅位置，無二突然拎出一支新嘅荒靈木，然後無視周圍嘅途人直接點著佢。今次燒出嚟嘅煙一樣係好濃烈，而煙味喺短短一瞬間就蔓延開去……
　
「喂！」咁大動靜，我當然係怕驚到保安，「你唔驚……」
　
「放心。」無二打斷我，「荒靈木有個特性，就係只有曾經用過嘅人先會見到煙同聞到味。」
　
本來我聽完都未明佢點煙嘅用意。但就喺下一瞬間，我突然感到背後傳嚟一陣寒意，當然即刻轉身望過去──原來，附近居然有接近三份一嘅遊客都停低腳步，佢哋都不約而同咁轉過嚟望向我同無二呢邊。
　
佢哋有人皺起眉、有人竊竊私語、有人神情不安、有人睜大雙眼，就好似無二做緊一件威脅緊佢哋嘅事咁。
　
「阿聰，你見到未？假如我試圖去消滅樂園，阻止我嘅人就唔止嗰位園長……仲有呢度所有望住我哋嘅人，同埋外面社會一堆有頭有勢嘅人。」佢講到呢度整熄荒靈木，順勢收埋入煙盒裡面，「就算有能力都唔代表要做，因為後果可以係非常沉重──阿聰，呢個就係我今日想教你嘅嘢。」
　
雖然我內心確實係難受同有不滿，但望到呢幕……都不由得冷靜落嚟。毫無疑問，呢次係一場震撼教育。
　
*
　
之後又係另一段長時間嘅沉默。直到上車駛咗差唔多一半路程，無二先開聲講：
　
「阿聰，你今日嘅表現確實係令我另眼相看。」
　
因為佢揸緊車背對住我望唔到表情，所以分唔到佢係講真話定係揶揄緊我。
　
「之前我一直認為你未準備好去接受更多資訊，但事實證明我錯咗。再加上頭先經歷嘅事，有啲嘢你係有必要知道……」無二停咗幾秒再講落去：「你仲記唔記得頭先園長有提到『異地』呢個字？」
　
我點咗下頭，但唔知無二睇唔睇到。
　
「所謂『異地』，係指某個本身正常嘅地方，受到人為因素又或者詛咒影響而大規模變異。不過根據我以往嘅觀察所得，多數係由一班心術不正嘅人創造出嚟。至於之前尾東樓嘅結界，因為規模較細，維持嘅時間又短，所以未夠資格稱為『異地』。」
　
我諗返起之前喺佢辦公室見到嘅地圖，原來上面標咗嘅就係其中幾個「異地」嘅位置──白湖村、西營盤、九龍城……仲有一個我哋啱啱先到訪過嘅極樂園。
　
「香港總共有九個『異地』，然後仲有四個擁有龐大勢力嘅『異幫』──包括我哋頭先見識過嘅『極樂客』、一直喺地下發展緊嘅『城寨幫』、幾乎全世界都有分部嘅『中途塔』、最後就係連我都唔敢得罪，可以話係喺背後操控成個社會嘅『白色秩序』。」
　
「白色秩序……你之前話過有班人會為咗阻止『最壞情況』而去滅口同滅聲，就係指佢哋？」我問。
　
「冇錯，雖則我從來都唔怕死……但我盡可能都唔會惹到佢哋。萬一俾佢哋搞到連扮個正常人都唔得，咁就真係生不如死。｣
　
我聽到呢度不禁吞咗啖口水。呢刻，雖然呢班「異幫」只係一堆陌生嘅名稱，但我不禁有種預感，他朝一日係會同佢哋扯上關係……
　
「雖然係叫『異幫』。對呢班人嚟講，正常定係變異只係觀點角度嘅問題……世人會覺得有『異』，只係因為唔了解，或者受到認知嘅局限，先會有呢種杞人憂天嘅諗法。而佢哋當中嘅一小撮人，甚至會非常極端咁認為……我哋先係呢個『自然發展』下嘅『異端』。只要我哋消失、或者加入佢哋，一切就可以恢復『正常』。」
　
「所以，Cheryl就選擇咗加入，而陳園長個女……就係消失。」我茫然咁講。
　
原來，我哋一直自以為「正常」嘅現實世界，背後原來係不斷發生緊咁荒謬嘅事。
　
「話就話消失，但其實就係不斷密謀去毀滅極樂園，甚至想利用我去做佢打手。」無二忍唔住笑咗下，「但我份人就係唔鍾意成為人哋嘅棋子。」
　
「咁佢做嘅嘢……到底係啱定錯？」我茫然咁問。
　
「我冇資格去作出判斷。我只會話……我唔會用佢呢種方法。」無二意味深長咁講。
　
不知不覺我哋就出返市區，可能見我冇胃口，所以無二就直接駛到我屋企樓下。離開車廂臨閂門之際，佢探過頭出嚟同我講：
　
「阿聰，無論你有咩想法，甚至嬲我唔出手都好……都唔好忘記最緊要嘅事。」無二將一本新嘅萬變紙拋畀我，「我知你攰㗎喇，聽日就放你一日無薪假……後日記得準時返工。」
　
等到佢離開之後，我不禁望向手上嘅萬變紙。
　
雖然，經歷完呢件事我係成長咗，亦明白到好多嘢。但原來到最後，有好多嘢都係注定改變唔到。
　
無力感，依依深陷喺我內心之中。
　
*
　
*
　
*
　
【？視角】
　
呢晚，突然毫無預兆咁落起滂沱大雨，仲要短短半個鐘就去到紅雨級別。因為天晴咗大半日，所以好多人都冇帶到遮出街，少女亦唔係例外。
　
少女搵咗一個有瓦遮頭嘅地方停低落嚟。雖然喺旁人眼中佢似係避雨，但其實佢係等緊一個人……正確嚟講係一對情侶出現。
　
等咗大約十分鐘，嗰對情侶果然出現了。可以見到女方笑得非常燦爛，肯定係喺「樂園」玩得非常盡興。
　
幾秒後，呢對情侶就行到去少女面前。少女其實並冇開口叫停佢哋，但嗰對情侶卻主動停低落嚟，女方隨即開口問：「妳係咪冇遮？」
　
見少女點咗下頭，女方即刻喺袋裡面拎出一把縮骨遮，遞畀佢嘅同時笑住講：「妳拎去用吖。」
　
「但我拎咗，之後點還畀妳？」少女接過把遮之後問。
　
「唔洗喇，反正都唔係咩貴遮。」女方講完之後揮手道別：「咁再見喇。」
　
等到對情侶再行多幾步後，男方終於忍唔住問：「Cheryl，妳可以留個聯絡方法畀佢嘛。」
　
「費時麻煩人啦……但講起上嚟又奇怪，我好似喺邊度見過佢咁。」
　
「唔會係撞鬼嘛？聽講呢條街曾經死過人……」
　
「你又嚇我啦……死阿海！」
　
少女一直望住佢哋離開，直到完全消失喺視野範圍後，先至慢慢打開遮。但佢開遮嘅最大目的並唔係為咗避雨，而係想遮掩佢臉上嘅怒意。
　
「嘖。」少女嬲得咬牙切齒，因為事前仲深信今次嘅結果會同之前唔一樣。
　
係因為高估咗「嗰個人」？抑或……佢係遠比自己想像中更加犀利？
　
「哈囉，總算搵到妳喇……始作俑者。」就喺下一刻，背後突然傳嚟一把輕鬆嘅男聲，「我冇中到妳嘅驅虎吞狼之計，妳係咪好失望呢？」
　
少女知道呢個男人係邊個，但佢冇打算擰轉身俾佢見到自己。
　
「無二……先生。」少女用禮貌嘅語氣講：「我的確係失望，因為你居然仲未俾白色秩序班人追殺。」
　
「嘩，估唔到妳年紀輕輕但咁黑心……」無二確實感到些少寒意，「據我所知，妳全名好似叫做陳以樂？」
　
「自從嗰一日之後，我就再唔係姓陳。」少女淡淡咁回應。
　
「咁妳叫人嚟搵我幫手嗰陣，點解要話自己係『如初』？」
　
「我唔咁講，你呢刻又點會主動嚟搵我？」少女意味深長咁講。
　
「我明白喇。」無二點咗下頭，睇嚟冇打算尋根究底，「點都好，我勸妳唔好再玩呢啲小聰明啦……難得脫離咗地獄，就應該好好咁過生活。」
　
無二之所以選擇勸喻，而唔係採取其他行動，係因為佢真心覺得少女嘅本性係唔壞。
　
「你明明同我一樣都係俾父親拋棄，點解你可以講得咁輕鬆？」少女質問：「你真係冇諗過報仇？」
　
「我當然有諗過。但為咗我嘅『長遠目標』，支節真係可免則免。」無二冷酷咁講，隨即轉身準備離開，「希望我哋後會無期啦。」
　
少女聽到呢度不禁微笑起嚟，等到佢確認無二真係離開之後，佢先至壓低講：
　
「睇怕做唔到，因為我同你嘅連繫，十幾年前已經決定喇……」
　
　
　
「……『哥哥』。」
　
*　
　
猶記得十三年嘅嗰一日，當時嘅小女孩早就對離開牢房失去希望，唯一盼望嘅就係下一次研究可以冇咁痛苦……
　
據說，呢種研究係可以令到人變返「正常」──但從小女孩嘅角度，佢哋所謂嘅「正常」就係同其他人一齊講大話。明明係蘋果，但偏偏講成為橙；明明係錯，但又要講成啱……
　
「熊先生，到底幾時開始……講真話係錯？」小女孩躺喺床上面，抱住熊公仔問：「明明，學校老師係教我哋做個正直嘅小朋友……」
　
就喺下一瞬間，房間大門突然俾人粗暴咁打開。踢門嘅人係樂園嘅員工February，仲有一直對小女孩態度好差，一位姓許嘅醫生。
　
「我哋仲有幾耐時間？」許醫生問。
　
「唔多……」February回應：「你要速戰速決，總之唔可以俾佢離開呢度。」
　
「可惡，最難搞嘅嘢偏偏由我做。」許醫生走到小女孩面前，強行搶走佢手上嘅熊公仔。
　
「吖……公仔！？」見到好朋友熊先生嘅右眼甩開，小女孩當然好心痛。
　
「雖然好想繼續研究妳……」許醫生拎出一枝針筒，「但對唔住喇，上頭已經決定咗要放棄妳嘅生命。」
　
當刻，稍為開始懂事嘅小女孩仲以為自己肯定會死。
　
但就喺下一刻，又有另一個身影出現係門前──係一個陌生嘅中年男人，佢先一掌打暈咗February。然後趕過嚟從慌張嘅許醫生手上搶過針筒，然後毫不猶豫咁插落佢條頸度……只係短短幾秒鐘，許醫生嘅臉色就由青變紫，最後倒喺地上面一動不動。
　
「妳就係陳以樂？」中年男人問。當時嘅小女孩，絕對冇諗到呢個男人將會改變佢一生。
　
小女孩雖然仲係驚魂未定，但最後都係勉強點咗下頭。
　
「聽住，叔叔係嚟救妳嘅……妳而家起唔起到身？」
　
見小女孩搖搖頭，再加上聽到外面有動靜，中年男人即刻抱起小女孩，然後不慌不亂咁講：
　
「以樂，妳要聽叔叔話，合埋眼、揞住耳仔，無論發生咩事都唔好理……叔叔會一邊擋住佢哋，一邊打開一個結界裂縫，等我哋可以離開呢度……啊，其實冇必要交代得咁詳細……老先病發作。」
　
「嗯。」雖然一頭霧水，但小女孩當時都係照佢說話做。佢先合埋眼，臨將隻手擺喺耳邊之前好奇咁問：「叔叔，你叫做咩名？」
　
「妳先叫我司叔叔喇……其他有命出去先再講。」中年男人笑道。
　
之後嘅事，就係另一個故事了。
　
（完）
　
　
月尾，第二章──惡夢島。
　
　
感謝一直追開連載既朋友，我保證下一章一定會加速！而第二章前既一段時間，如無意外會玩個迷你故～快啲加我 IG 準備支持啦。
　
睇完又鍾意呢個故事嘅朋友，不妨分享出去同埋留句 #留言派嬲 。
　
＝＝＝＝＝＝＝＝＝＝＝＝＝＝＝＝＝＝＝
　
【非呃嬲植入式廣告時間】《無異之初》《時間守衡者》《絕命上映》《絕望走廊》《絕無轉機》《無限次告白》《醉後的藍》已經登錄各大書局。
　
IG: echoofheart