讀者投稿《天下烏鴉一樣黑澳洲奶奶篇》
好多人都會覺得外國既老爺奶奶同屋企人一定好好，可能係我唔好彩，呢幾年令我見識唔少。本身我個人都係蠢蠢地，唸住既然係老公既家人就係自己家人啦，話晒我一個人過到黎澳洲生活，朋友唔多個，我就只有佢地。我老公本身係一個好老實同可靠既人，唔煙唔酒，只係有時老實得過份同太信佢屋企人。
初初老公屋企人(大家族，有澳洲本土，英國，法國，非洲人) 對我好nice, 次次開party都會預埋我，我都會整野食去，但次次都會有說話聽，始終佢地都係睇唔起亞洲人。
佢地好鍾意等我老公唔喺度先講，有次老公阿嫲(皇太后) 同阿姨(有錢) 同我一齊睇電視，講緊收緊移民政策，有錢阿姨就話"If this policy is really happen, you should go back to your fucking country. "
我果下呆左，抱住個女仲坐喺度唔敢出聲。有同我老公反影，佢咪叫我唔好理。
結婚頭兩年都係出面租屋住。兩年後有一日，有錢阿姨話想租間屋俾我地住，我地住上層，老爺住下層。皇太后(老公阿嫲，老爺阿媽) 住隔離屋，以為有個照應。初頭以為有大屋有泳池有花園，好筍啦。
只嘆"當年真係太年輕"
其實係幫佢供屋。佢自己同老公再買多間屋住。後來先知有錢阿姨老公頂唔順佢外母(皇太后), 所以先搬，而又唔想白白供多間屋，又怕租唔出去，所以揾自己人住入去。
搬入去第一日，原來上層要留間房俾細叔仔。即係我地只有兩間房，其實我都ok, 只係本來以為上層係自己住，會方便好多。
老爺原來有吸大麻，吸煙同酗酒既習慣，仲慘係唔沖涼，基本上唔識照顧自己。同埋係唔話得佢，如果唔係佢會同佢阿媽投訴，之後全家就會話我。
搬左入去就係惡夢嘅開始，二叔仔同佢女友(加埋女友兄弟姐妹8人), 自出自入間屋，成日上黎樓上用我地個廁所，夏天差唔多日日過黎游水，老爺係唔鍾意沖涼，所以跳入泳池"沖涼"係指定動作。D水費係我同老公俾。仲要好"金"。
二叔仔同佢女友同我老爺friend過打band, 齊齊吸草吸煙。要明白煙係向上飄既，結果我同個大女吸唔少二手煙同二手大麻。有向皇太后同有錢阿姨反影，佢地二口同聲話d煙無問題，絕對唔會影響健康。仲覺得我搞是非，做咩話我老爺。
我本身係一個好乾淨既人，我每日就做清潔，因為老爺唔鍾意沖廁所，所以我要日日去佢個廁所幫佢沖廁同洗廁所。日日要煮幾餐，二叔仔同佢女友就隔日黎食飯，次次煮同洗碗都係我，我覺得自己同工人係無分別(仲要貼錢，係無人俾番d火食費我地兩公婆)
重點係照顧唔好老公一家，我係會俾人話。久而久之我只會默默工作，唔會出聲有怨言，但又要笑，對老爺同各大長輩恭敬。
老爺好鍾意開住度門睇4仔，成日開住電視瞓覺，我有多次落樓聽到好大"聲浪", 要叫我老公去熄左部電視，我先可以去煮早餐。
老爺有時會飲完酒/食左丸仔發顛，佢試過同人打交返黎，d血由門口滴到個廳同廚房地下，都係我清理。我擔心老爺有事，叫老公了解吓，結果俾老爺用粗口問候。試過佢同人打交去警署，要我老公去保釋佢。同埋老爺鍾意去巴士站或者行行下街，請人返黎飲酒食煙。我真係驚，老公又返左工，又要保護自己小朋友。所以每次有陌生人，我會鎖自己同小朋友喺房入面。
到我陀第二胎，無人幫我不特止，仲有說話聽。(老公唔駛返工，就會幫手煮飯。)有時又暈又嘔，起唔到身煮飯，皇太后就會出聲。"你煮唔到飯俾你老爺食，佢咪過黎我煮俾佢食。"所以我爬到起身既話，我都會煮。
千祈唔好羨慕有花園草地，因為打理唔易又多蚊。我大住個肚去剷草，因為老公返六日工，日頭返工，所以係無人剷草。阿老爺坐喺門口張sofa度，一手煙一手啤酒，睇住我剷草，仲話"果邊剷得唔好呀，呢邊又唔好。。。。"其實部剷草機係用汽油，所以好大味，陀住bb聞到真係頂唔順。我去剷草已經好好，唔需要讚我，但唔好指指點點會比較好。
陀第二胎呢40星期，我基本上係無停過照顧老公一家。到生完二仔，莫講話坐月，我坐左一日醫院咁大把。出院第一餐，麥記，老爺話"你無煮飯嘛，咪唯有食麥記囉。"我老公又要照顧大女又要黎醫院接我，所以無煮飯。之後幾日都係老公煮，但因為佢唔返工，就唔夠錢應付日常開支。所以佢都係放左三日假就返工。
跟住落黎就照顧老公一家再加我兩個小朋友，當時我係餵全人奶，日日瞓得一兩個鐘。結果有產後抑鬱症，因為要餵人奶，所以我無食藥，日喊夜喊。生完傷口未癒合，就要上上落落樓梯。
所以依家我三十幾歲身體係差到無朋友。
過左兩年非人生活，終於我老公肯搬走，之前我老公一直唔肯搬，話要同屋企人住。但二手煙令到大女呼吸系統有問題，越黎越嚴重，加上多左個b, 所以我堅持要搬。
搬前一星期，皇太后話，其實你老爺識照顧自己，唔駛你地同佢一齊住，佢都會過得好好。即係呢兩年係我自己攞嚟衰，無野做揾野黎做啦。明晒，完全係我既錯。
之後我地搬走左，二叔仔同佢女友入住，細叔仔同我地講佢地好慘，阿女友成日用粗口問候老爺，無啖好食，間屋污糟到爆。
跟住仲有太多太多太複雜既事發生。
總之天下烏鴉一樣黑，喺外國見到既其實都係同一個月亮。"相處好，同住難。"去到邊度都一樣。
#退一步海闊天高
#我的極品四大長老
#好彩投稿者已脫離險境
