《若干年前，我考AL中化口試MOCK，題目係「唔怕生壞命， 最怕改壞名」》
無記錯，我講嘅係...
中國人改名，盛載住前人嘅傳統同對後人嘅寄語。標誌來自同一民族同地區，會依據族譜，有序咁同仔女改名，例如何鴻燊一系列嘅女兒，何超瓊，何超雲，何超蓮，何超欣。又例如富貴迫人來肥姐同驃叔想生仔，於是佢哋嘅女，分別叫來弟，招弟，帶弟，都有為家族帶來男丁嘅寓意。
(記得當時中化科老師俾我嘅評語尚算正面，讚我可以連繫到改命同中國文化傳統，仲舉到生活化嘅例子。但佢見我純熟咁rap 哂何鴻燊一系列嘅女兒，佢勸我就考試，唔好睇咁多八婆雜誌)
今日見到黃之鋒公佈新政黨嘅名，Demosisto ，中文係香港眾志，無論中文定英文，都唔見得係好名。第一次見到 Demosisto，驟眼睇，真係好似 Delifrance 加 risotto，真係以為係 Delifrance bistro 嘅分店名。呢種將兩個英文字砌埋一齊，幻化成原創英文名嘅做法真係好 Kellyjackie，好Angelababy，好有當年MK妹改英文名嘅風範。
除左英文，大家都仲笑緊「眾志」二字聽落好似(香港)中箭，呢類改錯名嘅後遺，真係唔多老黎。正如每次見到高圓圓，戚黛黛，鄭元暢呢啲名，都總會有啲負面嘅聯想。
有人話個名唔重要，名只係盛載一個組織嘅意義，將來做嘅實事先值得評價，然而，個名就係政黨嘅頭炮，係政黨嘅首個決定，首個決定都好似決定得麻麻嘅時候，就難免令人擔心佢哋往後都麻麻。
PS. 有人話，點解當年 TBB 奧運六星當中，黎諾懿捧極都無其他五個咁紅，唔多唔少都係因為佢個名難寫難讀難記。唔好笑 gphone 啦，一開波就俾人笑，又真係會唔好老脾嘅。
