打橫嚟講：由代客拜山看政經演員
報載，天朝強國日前又有異行，就係在清明時節搵快錢。神州大地各省各市之墳場墓地，有批手持3G視像手機的「攝製隊」，忙於拍攝「孝子賢孫」的掃墓情景；原來，這批人是趁中國傳統習俗「清明拜山」的慎終追遠之義舉時刻，化為一門生意商機，推出「代客掃墓」服務，只要有金主畀得起錢，莫說上香、敬花、鞠躬，清理雜草墳頭，即使跪拜叩頭，甚至哭墳也可以！
今天，科技發達，出錢請人拜山的老細，唔使怕那些假孝子收咗錢唔做嘢，因有3G直播，故此，嗰啲攜大批現金移居英美加澳的強國富豪，為保祖先繼續射住，便請人代勞，一盡孝心囉！
據說，代為燒衣、獻花、畀禮，套餐收費一千銀，extra加料，另議，有menu睇，兼有專人跟進報價，顧客至上，包保稱心安心！
這類外聘孝子演員，並非今日新鮮事，清末佛山就有一位仁兄，名叫阿昆，專職替人擔幡買水扮孝子的。請阿昆的苦主，不一定係有錢人，有啲可能族中無男丁，或唯一男丁年事太老，不宜操勞，遂找人代勞。
阿昆演藝出眾，要眼淚有眼淚，要鼻涕有鼻涕，在墳前揼蹄揼爪嚎哭慘叫，可以勁過北韓的群眾之呼天搶地，所以，出現了一句廣東歇後語：「佛山孝子」，是為「似層層」。
家陣，香港亦有一批阿昆的疑似物體，只要有人肯科水，佢哋亦能角色扮演，由上街遊行、嗌口號、致電電台烽煙節目，甚或扮義工助選呢啲都係低層次啫！
高啲的，直情做埋大佬，等電話做嘢！強權的世界係咁o架嘞！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
