打完針，好開心（下）
上集：https://bit.ly/3yO1gLG
快樂針唔似毒品，唔會有戒斷反應，唔會令我生理上覺得痛苦。
但嘗試過嗰種快樂，就會念念不忘。
就好似你遇過最愛嘅人，之後再同其他人拍拖，你都知自己冇咁愛佢。
可惜，我冇得揀，我只可以戒除快樂針。
我嘅戒除好成功，我控制到自己，冇再打過一針。
我繼續返工，繼續生活，繼續儲錢。
我開始覺得，戒快樂針都唔係一件好難嘅事，只要有意志，咩都會做到。
直到我老豆病咗，入咗醫院。
佢嘅情況唔算最差，但佢嘅病，為佢嘅身體帶嚟好多痛苦，亦為唔富裕嘅家庭增加咗一筆開支。
我雖然傷心，但都未到絕望，唏，成年人個個都會面對父母有病，又唔係病到就死，冇嘢嘅。
我估唔到，我老豆唔係咁諗。
醫院再打畀我嘅時候，唔係佢病情惡化，而係佢自殺未遂，俾醫院發現咗。
我趕去醫院嘅時候，老豆好絕望咁望住我：「仔，你畀我死啦。」
我問：「發生咩事？」
老豆萬念俱灰：「我身體咁差，就算我出到院，都冇能力再返工，我就係一個廢人。除咗令你更辛苦之外，根本冇用。」
我講咗好多野安慰我老豆，但佢依然係一臉絕望。
醫院話，老豆有自殺傾向，可能要著安全背心綁住佢。
但醫生都話，病人咁消極嘅情緒，不利於治療。
護士細細聲同我講：「你可以考慮吓，畀病人打快樂針。」
「吓？」我完全冇想像過。
「快樂針同療程冇衝突，會令病人感受到快樂同希望。你都明啦，心情好咗，治療都會更順利，而且應該唔會再自殺。」護士話：「不過費用方面……」
費用方面，當然要我畀晒。
我冇得揀，我只可以畀錢畀老豆打快樂針，唔通睇住佢自殺咩？
打針後，老豆好開心，對人生充滿希望，仲計劃出院後，同老友去邊度玩。
望住老豆嘅笑容，我都鬆一口氣，呢個錢都洗得值嘅。
但唔知幾時開始，我望住老豆，親情嘅快樂漸漸褪去，我忽然產生咗一種……嫉妒。
或者係因為，每個月一出糧，我就畀晒份糧佢打針，連生活都要靠積蓄。
或者係因為，老豆嘅笑容太過燦爛。
然後，瑤瑤講咗一個好消息畀我知。
佢間公司新增咗一項員工福利，每個月免費為員工打一次快樂針。
即係每個月，佢都有一個星期嘅免費快樂。
因為係免費，瑤瑤當然打咗第一針。
「原來真係好正㗎，有時俾上司鬧，我都覺得好快就過去啦，會好樂觀咁。」瑤瑤話鋒一轉：「可惜太貴，一個星期得一針。」
突然間，我嘅憤怒去到臨界點，我大喝一聲：「我連一針都冇啊！我睇住你哋打啊！」
「你做乜嘢？你係咪唔開心？有咩都可以同我分享㗎。」瑤瑤依然保持住輕快嘅語氣。
如果係以前嘅瑤瑤，俾我咁樣喝一聲，佢一定同我嘈交。
但佢依加仲係咁樂觀，因為……佢打咗針，打咗我冇得打嘅針。
然後，我終於破咗戒，衝去打咗一支快樂針。
老豆嘅打針錢點算？今個月嘅生活費點算？會唔會俾瑤瑤鬧？
我已經唔再諗啦，總之，我要打針，我要快樂！
結果，我抵抗得住快樂針嘅誘惑，但抵抗唔住「人人都有針打，得我冇得打」嘅攻勢。
比毒品更腐蝕人心嘅，係嫉妒。
我哋可以接受自己冇，但好難接受大家付出同樣努力，偏偏人人都有，就係自己冇。
—完—
新書《真實虛擬一鏡過》已經出版了，現正發售中，
詳情可點擊這裡：https://bit.ly/3eTPuHL
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #打完針好開心
你做乜嘢 在 你做乜嘢呀… 嘿畀你啦畀你啦｜ わしょく言葉 - YouTube 的推薦與評價
你做乜嘢 呀… 嘿畀你啦畀你啦｜ わしょく言葉わしょく言葉https://www.facebook.com/418856634933851. ... <看更多>