［Any Given Sunday］沙特阿拉伯股市崩盤，跌7.5%
1. 舊文都寫過，星期日都係有股市的，唔係個個都信基督教（雖然我唔係好明做乜亞洲中日韓越泰之類都星期日放假）。邊度開？咪就係中東開
2. 但亦都寫過，但凡中東股市（https://bit.ly/2YtfrGR）星期日上頭條，十居其九都唔係好嘢。反正冇人買，點會有人期日關心？唯一就係大跌，大家只係關心會唔會拖累亞洲星期一開市（最早澳紐，之後日本韓國，香港新加坡大陸台灣咁咯）。
3. 今次原因，都係不太明。某程度上承接咗上星期五美股跌勢，侵侵又話加關稅呀又話報復呀又話取消中國啲美債唔找數云云。不過又望下，其他中東股市未算太差（https://bit.ly/3b5Jmrv），3-4%頂盡，就似乎係沙特獨有嘅問題了。
4. 沙特最出名嘅公司？當然係沙特阿美。油價跌？一早都跌架啦，況且沙特阿美跌得最少喎。你見其他一大堆乜乜水泥跌到反艇。
5. 似乎係因為財政部話要「緊縮」措施（預咗啦下話），咁呢個都係油價大跌嘅後遺症嚟嘅。
6. 另外，補一句，雖則石油嘅嘢識條鐵。但你見好多人講，油價攬炒戰，邊個最先跪低？冇錯，基於種種原因（同啲石油難唔難拎出嚟都有關），沙特阿美（亦即係沙特政府）開採成本極低，應該全球最低，幾蚊雞一桶都迫伊汾。人人錢佢都未蝕
7. 但凡事梗係唔係咁表面。諗真啲？真係咁？你成本低，就笑到最後？未聽過以本傷人？人地輸十蚊你輸一蚊，但人地幾千萬身家，你得幾百，邊個死先？
8. 要明白嘅係，沙特除咗石油，基本係係vegetable乜七都冇，甚至同俄羅斯相比都爭一大截。你計及要個國家開支迫伊汾，就係兩回事。某啲估計，沙特要油價去到80蚊先得，俄羅斯大約40蚊，你估邊個死先？
9. 俄羅斯，始終係G8，大工業國，核彈頭，億幾人。雖然大家都冇民主，但俄羅斯總統／總理（差不多啦，執位啫）普京，一路都有一定民意認同，亦都才智過人，就唔係啲包頭中東佬可比。
10. 沙特本身個政府就一路都唔係好有認受性（即使同俄羅斯比），亦都之前受肺炎打擊。最重要係產業單一，又有內鬥。之前就話有錢收買人心，到冇錢派點算？
11. 當然，大家都知（你唔知我話你知），沙特有美國撐，你見呀MBS在領事館生鋸（真係生鋸）個美國大報記者都冇事，仲可以大搖大擺去買紐卡素（順手買影響力）。拉登固然係沙特阿拉伯人，九一一19個劫機者，冇伊朗冇伊拉克（震驚未？），15個係沙特阿拉伯，兩件阿聯猶，一件埃及一件黎巴嫰。你有冇見美國制裁沙特？不過，講朋友多，普京朋友應該仲多過中東佬嘅
12. 另外，沙特用嘅貨幣係利亞爾，riyal，實務上係同美金掛勾嘅。其實年頭已經有人賭會脫勾，而家只會越嚟越多。
13. 至於對香港影響嘛？我估，係冇乜嘅。沙特內政啫（好奇嘅係，既然咁，佢地啲增產可以玩得幾耐？）。咪話你見其他中東股市都係3-4%，咁可能香港都係咁，咪一千點，但就唔係咩7%之類…….掛
———————
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
