《淺談HR睇CV》
過完年，辭職信如雨落下後，搵工季節又即將降臨大地。唔知大家send CV 嘅時候有冇諗過份CV send出去後，到底HR有冇睇過呢？隻招聘廣告我明明句句都中晒㗎喎，一定係你地班邪惡嘅HR唔識貨掉左我份CV啦！NoNo! HR係要負責請人，你估我地唔想份份CV都啱駛咩？如果你真係樣樣中但都石沉大海，你可能要執執你份CV喇！
試想以一間大規模公司計，同時請嘅職位可能
達十幾二十個，如果每個職位只係收到10封，20個職位就已經有200封；有時係轉工季一個熱門職位一日可能收30封。至於小型公司HR可能得一兩個人，睇CV就更吃力。如果HR每份逐隻字去睇係可以十分費時失事，因此份CV嘅重點吸唔吸晴就變得好重要。
- 履歷表(CV)
一份CV最吸睛嘅當然係工作經驗同埋學歷。你可能會話「份份CV都有㗎啦」係！不過唔係個個都識得寫得吸晴。有啲人淨係寫自己讀邊間學校，但又唔寫讀到咩學歷或者讀咩科，有啲人寫公司名又會唔寫咩職位，即係寫咗等於冇寫。CV切忌表篇大論，最好point form點列介紹重點。另外，如果你唔係fresh grad，不妨將經驗以由近到遠時序寫係CV較前位置。如果係fresh grad，可以將學歷放在前面，工作經驗就可以寫下有冇做過part-time或intern。
- 求職信 (cover letter)
其實係CV咩都有晒啦，做咩仲要cover letter呀？我見而家好多人都懶寫cover letter，淨係send份CV嚟就算。冇錯，有時你份CV適合HR都有可能搵你見工，但有時cover letter卻可以起決定性嘅作用。試想下HR幾經辛苦搵到十份適合嘅CV，但佢只可以安排五位嚟見工，咁會點樣揀？除左學歷經驗，呢個時候就更重視cover letter嘅內容。一份好嘅cover letter唔需要長，連埋標題格式，一版A4紙就剛剛好，內容需要就住你申請嘅工作去寫，以突顯你對份工嘅誠意。不過香港人都係比較心急，通常都用一份cover letter走天涯，其實有冇誠意好易睇得出㗎。
係殘酷號辦公室裡，各大部門經理都會要求HR係最短嘅時間交出最適合嘅人。所以求職嘅大家不妨做多一點點，執靚仔份CV令佢吸晴啲，等我地可以容易啲發現到你啦。
#正所謂 #一理通馬國明 #CV靚過劉嘉玲 #見工電話收唔停
#個hashtag咁爛邊個諗出嚟？🤔
#HR #面試 #見工 #搵工 #HR小薯蓉
嚴禁非法轉載
Copyright © HR小薯蓉. All rights reserved.
