【負能量系列：無口德茶餐廳阿嬸】
話說尋晚OT到飛起，晚餐都無胃口，今朝起身就決定食個大早餐。蒲到茶餐廳，問：「唔該想要個火腿通粉外賣。我唔要餐同野飲，淨通粉得啦。」
茶餐廳阿嬸：三十蚊。
問：我唔要套餐喎，都要三十？
茶餐廳阿嬸：係呀。你要唔要套餐都係咁多錢。
問：但我要少咗野都係咁計？
阿嬸：係。
心諗：咁唔抵，不如過隔離果間買。
答：咁我唔要啦，唔該。
一行出門口，阿嬸係後面大聲講：「俾唔起錢就唔好學人嚟買早餐，三十蚊都俾唔起。食西北風啦，買乜鬼！」
(怒)轉身答：「唔係我俾唔起錢，而係我係消費者，我有權選擇買咩同衡量抵唔抵，應唔應該買。對於你咁嘅服務態度同埋開價，我唔買都好正常啦。做人幾廿歲積下口德啦！」
語畢，轉身再走。
阿嬸盛怒追罵：「%^&($&*&#，無錢買野食唔好係度發爛，我大把人幫趁呀！三十蚊都俾唔起學咩人買早餐......」(都唔明做咩鬧嚟鬧去都係得呢句)
答：「唔係俾唔起，係唔想俾你賺啫。」
其實今時今日經濟環境又唔係咁好，格下價都好正常啫。公關仔明白每間餐廳有佢定價嘅準則，雖然覺得一個通粉同成個餐價錢一樣好詭異，但唔買咪無野囉，做咩要咁問候人同埋唔尊重地話人呢？
#積下口德 #晨早流流總係迫人出手 #做人俾啲禮貌得唔得
