前幾日先寫完個傳銷騙案真人真事，今日睇新聞又見到星探搵人做model嘅騙案，呢類呃人嘅手法喺十幾年前已經出現過，而家都2018年啦，究竟係騙徒嘅手法退步？定係成個社會都冇進步呢？並非向受害人嘅傷口灑鹽，只係奇怪一個資訊咁發達嘅城市，竟然仲容得下咁陳舊嘅騙案模式。
好多年前，我有位同學去咗模特兒公司做暑期工，佢嘅角色唔係畀人呃，而係做呃人嗰個，Title正正就係星探，因為細細個咩都唔識，以為係正當職業，點知返咗幾日工已經發覺唔對路，跟手辭職連份糧都唔要，佢仲分享咗呢類模特兒公司嘅運作手法。
一) 星探有咩做？
10點幾11點先返工，每日先入房開會，報下前一日喺街攞咗幾多個人嘅contact？幾時約人上嚟試鏡？簡單啲講就係一個捽數大會，然後就要落去各自嘅「地盤」做嘢，邊度係地盤？據講當年主力係銅鑼灣Sogo附近同埋尖東噴水池嗰頭，當然有啲星探會進取啲，喺地鐵站同埋街上面打游擊啦！
二) 點樣揀目標？
嗱，靚唔靚呢啲嘢見仁見智，亦唔係星探搵人嘅重要因素，因為講到底都係想呃錢，所以佢間公司亦喺內部會議中畫公仔畫出腸，講明要喺街上面搵啲戴靚錶或者孭靚袋嘅人，雖然內裡唔知對方係咪窮光蛋，但起碼證明咗有消費力先，如果有人喺街上收過星探卡片，不妨諗下自己當日著咩衫、戴咩錶，同埋孭乜嘢袋出街。
三) 呃錢流程
當然係先讚對方好上鏡，好適合個客嘅廣告......來來去去都係呢類on9對白，拎完電話就會即日或隔日做嘢，例如約目標人物上嚟試鏡，嚟到會錄一條自我介紹嘅video，甚至係試下唱歌，繼而就會講下你有咩不足之處，好似做戲唔自然，口才唔得，唱歌有潛質但未夠好，然後就話公司有導師或課堂提供，再唔係就叫你影一輯專業嘅相，不過要自費搵攝影師，化妝同set頭之類，當然佢哋公司有相熟嘅人安排畀你啦！
雖然舊同學返咗工只係幾日，但都見到唔少男男女女上嚟試鏡試音，佢話其中一個唔係嚟見Model，係嚟見幕後代唱，條友唱得非常好，在場人士都呆一呆，不過公司真係冇諗過捧紅人，更加冇呢個能力，呃錢永遠都係大前提，當時有個職員就同呢位應徵者講：「你唱得好好，不過國語咬字唔正 (當時條友唱張學友一首國語歌)，公司有個國語課程，你要上咗堂先。」
記憶所及，當時舊同學呢份星探工作嘅底薪係5至6千蚊，攞到電話係冇用，要約到人上嚟試鏡試音兼畀錢報堂先有佣分。
想防止畀人呃錢，大家要記住以下幾樣嘢:
A) 如果係正當模特兒或者唱片娛樂公司，唔會叫你自費畀一筆錢上堂先，呢啲係佢哋嘅cost，唔應該轉嫁喺應徵者身上，即係你去見一份office工，你唔識excel一係唔請你，請得你就預咗教你，或者叫你自己出去學，唔會話收錢教你excel，然後先正式返工。
B ) 若然你真係覺得自己好上鏡，或者好好歌喉，唔上去人哋公司一轉唔心息，咁首先祝你好運，其次就係擺低晒你啲信用卡同提款卡喺屋企，只袋少量現金就算喇，坦白講呢類公司都唔係省油的燈，背後隨時係古惑仔開，無論佢間公司裝修得幾靚都好，其實只係假象，避免帶任何值錢或攞到錢嘅嘢上去。
C) 而家有身份證同眼耳口鼻已經係模特兒，大把人等緊機會，唔見得真正嘅Model公司或者唱片公司要喺街周圍搵人，唔好見到啲明星嘅個別例子就以為咁多神話，正如報紙只會報道C朗、美斯，碧咸點威點勁，好多人踢波搵唔到食，一世踢乙丙組仲要兼職維持生計嘅例子，其實多如天上繁星，只係冇人去講啫！
D) 如果啲公司畀好多報紙雜誌剪報或File你睇，話佢哋公司有晒經驗同出街嘅作品，千祈唔好輕信，要上報紙雜誌其實唔係太難，有時佢哋只係互惠互利間出一個欄目位，擺幾張相再出返個credit就得，冇你諗得咁高難度同埋咁神聖，咪以為出現喺媒體就等於間公司好有實力。我有朋友做雜誌編輯，每日都收好多不同公司send嚟嘅公關文同相片，有時刊登都係為咗塞一塞啲版位。
畀人呃錢已經係不幸中之大幸，過往見唔少新聞係有人應徵Model畀人非禮，嗰啲公司嘅更衣室仲有雙面鏡，即係你以為照緊鏡，可能鏡嘅另一面有人睇緊你換衫。總之記住「邊有咁大隻蛤乸隨街跳」呢個道理就得喇，香港地真係好危險架，你愈想搵快錢，就愈容易跌入呢類陷阱。
傳銷騙案 在 解密傳銷中心洗腦騙財過程相關人員更稱陸偉雄是集團法律顧問？ 的推薦與評價
【鹹濕吸水機】東張西望| 交友App援交騙局 騙案 過程大公開. TVB USA Official. TVB USA Official. •. •. 98K views 2 years ago ... ... <看更多>