早上的記憶科門診，通常 11時開始。看過所有舊症，一位叔叔緩緩地走進診症室，緊隨其後的應該是他的太太。
根據記錄，叔叔 78歲，有糖尿病和甲狀腺素缺乏問題，一直在內科門診覆診。年多前叔叔太太發現他記性大不如前，故此最近被轉介到記憶科門診跟進。
「叔叔，你同邊個住㗎？」跟叔叔打過招呼，我先問他一些基本資料。
「我地兩個一齊住嘅。」太太搶着回答。
「咁你地住邊呢？」其實我想了解叔叔大概居所環境，和有沒有電梯直達。
「下面街個楝大廈囉。」
「哦，係唔係租唐樓個啲單位？有無𨋢㗎你個度？」我再問。
「我個度幾十年前買嘅，個時平平地，宜家緊係買唔起啦。有𨋢㗎我個度。」太太答道，叔叔繼續不發一言。
「咁你地有無仔女？」
「唉！醫生，我地就係正所謂百無個啲啦，無人無物無親無故個啲呢，無人幫到手㗎。」太太突然顯得有點激動，眼泛着淚光似的。
「咁叔叔都有你呀。」我嘗試换個角度。
「醫生，你當可憐吓我地，簽張紙俾我唔使錢睇醫生同攞藥呀。我地個啲公援長者生活津貼又攞唔到。」太太說着說着，突然哭起來。
「太太，我地負責評核身體狀況，批唔批到醫療費用豁免係社署話事㗎。」坦白說，醫生也不是萬能的。
「你有無攞長者生活津貼？你户口有無錢？如果攞到高額津貼有機會申請豁免。」我嘗試幫他們想辦法。若夫婦資產低於$235000，可申請高額長者生活津貼。有長者生活津貼，再加上到達某個歲數，可得醫療費用豁免，接受醫管局醫療服務，或拿取藥物都不用付款。
「我攞唔到㗎，我户口個啲棺材本嚟㗎，慳埋慳埋唔可以亂用㗎。」簡單說，她意思即是兩老積蓄多過廿幾萬。又說實話，生活在現今香港，兩老相依為命，廿幾萬積蓄亦不算多。
長者生活津貼不合資格，綜援也不用想了，綜援資產上限是 $50000。
「不如我問埋其他嘢先，呢個一間再諗辦法呀。」見問題難以即時解決，我還是先處理記性問題。
「佢以前做乜工㗎？」我再問。
「佢做小販嘅，幾十年前攞落個牌，咪宜家仲做緊攞。」
「但係又話佢記性唔好嘅？佢做唔做得掂？」
「做唔掂㗎。」太太反應甚大: 「佢呢一兩年成日講完啲嘢又唔記得，試過人地俾一百蚊買嘢又找番一百蚊俾人呀，好彩我係度呀，咁蝕法點得呀。有時話落貨又唔記得。唉，根本佢做唔嚟㗎。唔俾佢做佢無細藝又唔係辦法，仲衰。啲客係由細幫襯佢先特登同佢買吓啲豆豉、梅菜咁。。。」
一邊說着聽着，的確能感受到他們的困難。生活捉襟見肘，能力又大不如前，太太辛苦，叔叔亦不容易。
問完症，檢查過後，我再問太太:
「咁傷殘津貼個啲你攞唔攞，不過坦白佢仲做緊嘢係有啲尷尬。」我很坦白。
如果長者由醫生評核有身體缺損而影響生活和工作能力，可以申請傷殘津貼，每月會得到$1835。
「我唔係話佢傷殘要攞傷殘金，我淨係想睇醫生攞藥唔收錢，每次嚟覆診都唔小錢，人地話你寫張紙就唔使俾錢，醫生你幫吓我地啦。」生活上已經很勉强，當然希望盡量省得幾多得幾多。
在香港，没有資格領取綜援的老友記，未必代表生活是很富足的。要達到領取綜援的標準，要求相當高，要從正途跌入這個安全網並不容易。基層市民的生活仍然是困難的，尤其現在物價絶對不低。
我轉介叔叔見社工，看看有沒有其它可以幫忙的。
安享晚年，除了身心健康外，經濟穩定其實也是重要的一環。究竟幾時我們才可以有一個完善的退休保障呢？
傷殘津貼資產 在 領傷殘津貼1935港元已是按公義該給的？不應領傷殘綜援？ 的推薦與評價
長者生活津貼申請上限入息2022年3月更新版本上限$3915 金額上調 資產 審查生果金英文70歲 傷殘津貼 綜援长者生活津贴公共福利金計劃合併 資產 轉移夫婦單身 ... ... <看更多>