［都話入港版納指！］TLDR：王維基市值唔止過咗777頭，夠入「港版納指」。仲超過晒所有香港傳媒股……加埋！係加埋！一個打十個！真係十間！
1. 少少標題黨，但真係冇呃你。王維基隻香港電視HKTVMall 1137，越升越有，今日12蚊都破埋。109.7億市值。留意一般我鍾意齊頭數，106億我都會寫110億，但今次冇，自然有原因
2. 過咗777頭，亦真係冇呃你，隻網龍777，呢排係咁跌，最新市值已經去到109.1億。係喎，王維基過咗頭。
3. 咁本身唔係特別拎777出嚟講，但點解係將王維基同呢隻比？因為，而家777係「港版納指」，恒生科技指數入面最低市值嘅一間。王維基市值過咗佢頭，即係已經打入指數門檻。嘩！
4. 係喎，有人7月已經咁講。邊個？之唔係區區在下我本人。計登咗出媒體嘅（網媒都計，但唔計你飲大咗同人講），本人全球（講到好似香港以外有人理咁）第一。（https://bityl.co/3Iaj），服未？當時都有人話不可能。我寫嗰時（7月24日），1137係網龍嘅一半咁滯。本人就話think big，估佢一年內就過頭。「他們說沒可能」，話香港市場咁細。結果？只係用咗兩個月。
5. 所以，真係記得睇本人Patreon，更多正嘢，真的（https://bit.ly/31QmYj7）。冇正嘢都當支持下（＊）近500人訂咗了（＊＊）
6. 好，廣告完飛機完，都畀多啲資料你。
7. 留意返，恒指季檢，下次係11月中，「港版納指」一齊，所以至少都等多兩個月先。
8. 另外，詳細我冇睇。但到時真係落選，都唔使即時鬧住。因為之前有人話港版納指全部大陸股（其實唔係，有ASM太平洋 522），型住可能呢啲考慮唔會畀1137入喎。
9. 呢啲本人不能代答，但可以講嘅係幾樣嘢。首先，都話11月中「港版納指」先季檢，咁如果1137忽然大跌，或者777忽然大升，就另一回事啦，呢個大家會明。
10. 另外，嚟緊仲有大型科企上市，例如隻螞蟻。基本上必入「港版納指」。咁死啦，你限死30隻喎，咁即係點都要踢走一隻。變相王維基唔只要大過包尾嗰隻（呢刻係網龍777），仲要大過尾二嗰隻（呢刻應係丘鈦1478）。所以我篇文都寫明，「看看是港視升得快，還是巨企上得快。」。事實如果指數限咗成份股數目，門檻多數會越嚟越高，你睇恒指就係。有啲被踢走嘅公司根本唔係市值冇增長，問題係有啲阿里巴巴之類嘅巨無霸一入嚟，又限住50隻，咁榜尾個門檻就高咗。
11. 仲有個point，technical小小，我冇睇詳細。但例如之前話50億市值可以入滬港通（即係大陸佬/北水可買），呢50億市值，都唔係計落閘嗰日—否則好易畀人game the system（香港國技）。我記得係用過去12個月每個月月尾嘅平均。至少要game 足十二日。我冇細睇「港版納指」有冇呢個機制，但想講市值未必只睇一日。
12. 當然了，最後恒指公司都有一個discretion（好東西，誰不愛？），所以次次都有啲意外，任你大行點計（以前我都玩過），有時都估唔到邊隻出邊隻入。例如上次季檢都有呢個問題。
13. 如果下次王維基個市值夠大而冇入，就少不免又會有好多人去問了。不過以我理解，恒指公司過往作風都係畀啲官腔答案你，不評論個別個案，只係話你知唔只係睇數字，咁咯。
14. 講開又講，嚟緊文會寫，如果我冇記錯，人人愛炒嘅 任天堂，係不在日經平均指數成份股入面的。225隻喎！原因？我都唔肯定，市值肯定夠大，係有歷史原因。下篇文解。
———————————————————————————————
15. Bonus：王維基嘅市值，唔止大過網龍777。其實呢，佢仲係大過晒所有香港傳媒股，加埋！真係十隻！一個打十個！甚麼鳳凰衞視我都唔知當唔當香港傳媒股，冇所謂，豪埋畀你。有線呢，除咗電視，入面仲有惡名昭彰但其實賺到錢嘅有線寬頻，冇所謂，豪埋畀你。正如世界華文媒體入面仲有新加坡馬來西亞，冇所謂，豪埋畀你。全部加埋晒，都未夠1137大！
16. Viu同Now？唔得，冇獨立上市。
17. 當然，冇可比性啦，1137個名就香港電視，實則係宋子豪，冇做大佬，冇做電視好耐。但又返返我篇舊文嘅主旨：王維基電視夢碎 焉知非福（https://bityl.co/3Ibw）。佢繼續搞電視，可能係觀眾嘅幸福，但佢本人就應該唔多幸福了。
18. 事實亦係一個milestone，1137市值超過TVB時，我寫過篇文（https://fbook.cc/3Esq），而家大過晒所有傳媒股夾埋，再寫多呢篇。
19. 正如Amazon市值當年過咗Wal-mart頭，成為最大市值零售商，都係一單大新聞（https://bityl.co/3IcB）（但留意Wal-mart冇死到）
20. 同樣道理，冇耐前Tesla市值過咗Toyota 頭，成為世界第一，都係單新聞（https://fbook.cc/3Esr），咁啱嗰日我生日，特別記得（仲記得生日都要寫文）
21. 而家？其實剛好2個月後（你嚟請我食生日飯都仲得的），Tesla嘅市值超過咗……GM，福特，Fiat Chrysler，本田，現代，Daimler，法拉利，寶馬，福士………全部加埋！
（＊）雖則無聊，但都要講，其實早幾日開我冇再在文入面加插廣告。因為月尾，而Patreon係月頭收多次錢嘅。不幸地有人今朝走去訂（美國時間仲係8月呀！），我係有主動聯絡佢，私下退返錢的。良心作者。不過而家9月啦！插入廣告又回來了！
（＊＊）明明就454人都話500，都話鍾意齊頭數
—————————————————————
Ivan Patreon 狼耳街華人，一個星期至少三篇，一個月一舊水唔使，三星期已經近500人訂，仲有兩篇免費試睇：https://bit.ly/31QmYj7
————————————————————
［收費短片第八擊］美國總統大選買股部署
課程資訊:https://homebloggerhk.com/course_detail/?code=CC008
到上link會見到紅色按扭直接購買及觀看
題目:「美國總統大選買股部署」 /cc008
內容:
*美國總統大選買股部署
*美股8月終極一升，然後…
*制裁美國上市中資股，有乜後果？
*蘋果2萬億市值，之後點？。下間2萬億市值係？
*未買記得買返CCO06（下半年選股）同CC007（買金）
本星期內特惠售價: $80
課程編號：CC008
觀看期限：首次播放後一星期及限每影片４次
客服whatsapp: 63832145
利寶tesla 在 Liberty Insurance Hong Kong 利寶保險- 【貴為Tesla 車主 的推薦與評價
利寶 保險現為Tesla 車主提供更廣泛的汽車綜合保險保障，包括高達港幣二千萬元居所充電器公衆責任意外保障及三十萬元公共充電站公衆責任意外保額，並加設以下保障優惠。 ... <看更多>