穿越張三豐（上）
我一直相信，每個男人，都曾經有一個武俠夢。
我哋會幻想自己擁有絕世武功、崇高嘅江湖地位，然後行俠仗義，當然會遇到靚女，然後英雄救美……嘿嘿嘿嘿。
我又一次發呢個美夢，但呢一次，當我睜開眼，我身處一間古色古香嘅房。
而且，我仲感受到一道氣喺身體上運行，甚至合埋眼，都感受到全身嘅經絡穴位，好似透視一樣。
我嘗試控制嗰道氣，一時失控，道氣從手心發出嚟，射咗落張木凳度。
轉眼間，張凳化成碎粉，我望住自己隻手，目瞪口呆。
我馬上意識到，我穿越咗，而且我呢個身體仲自帶絕世武功。
我好興奮，打開房門，就見到兩個道童企喺門口，問我：「太師父，我哋可以入去打掃嗎？」
睇佢哋恭敬嘅態度，我相信，我呢副身體應該幾有地位。
我故作高深咁點點頭，佢哋入咗去打掃。
咪住先，佢哋叫我太師父，我咪好老？
我即刻搵塊銅鏡，望吓自己個樣，果然係一個白鬚白髮嘅阿伯。
我按捺住心中嘅驚慌，扮晒友善咁同其他人講嘢，不經意地打聽「我」嘅身份。
然後發現，我係張三豐。
簡介一下張三豐嘅情況，論武功，絕世無雙；論地位，武當派掌門，係武林嘅泰山北斗；論名聲，俠義之名傳遍天下，人人都讚。
以上嘅設定，唔係「贏咗起跑線」咁簡單，而係「早就到咗終點線」。
論年齡，已經過咗一百歲，呢個都唔係問題，據我所知，張三豐係有二百幾歲命，即係話我仲有一世人流流長。
而且我感受到，自己嘅身體超級好，飛簷走壁都唔成問題。
唯一嘅問題係，愛情。
唉，其實男人想有武功有地位，多多少少都係想吸引女人嘅。
穿越前嘅我，廿幾年冇拍過拖，已經好Dry。
至於張三豐，佢百幾年嚟都冇拍過拖，只係佢本身清心寡欲，可能唔覺得Dry。
而我只係一個來自廿一世紀嘅普通宅男，登上人生巔峰後，當然想結識吓異性。
我喺武當派生活咗一個月，已經熟習咗自己嘅武功，然後我開始悶。
門派嘅事務，早已經交晒畀徒子徒孫打理，武林中又風平浪靜，唔通我日日坐喺度打坐咩？
我決定下山尋找愛情，我去到最近嘅城鎮，正想向街邊嘅攤販打聽吓消息。
點知攤販一見到我，就大叫：「係張真人啊！」
然後一堆老百姓圍埋嚟，吱吱喳喳咁講嘢，有人講武當派行俠仗義，幫咗佢哋好多；有人請教我長壽嘅秘訣；仲有人想學武功……
我好不容易先從人海中脫身，睇嚟出名都唔完全係好事，至少唔方便識女仔。
有見及此，我剃晒自己啲鬚，再搵咗啲植物染髮劑，將頭髮染黑。
果然，路人冇再圍埋嚟。
我四處行俠仗義，都試過幾次英雄救美。
但每次啲靚女知道我係張三豐，都會用一種敬仰嘅眼神望住我，當我係仁慈嘅長輩，然後......再也沒有然後。
比「Friend Zone」更可怕嘅，係「長輩Zone」。
你睇武俠小說，靚女的確會鍾意武功高強嘅大俠，但佢哋鍾意嘅係「大師兄」，唔會有人鍾意「太師父」㗎嘛。
可能有人會講，點解我要話畀佢哋知，我係張三豐？
一來唔想呃人，二來都呃唔到太耐，武當派有好多俗家弟子，哪怕我換咗造型，間中都會俾人認出，再叫番聲「太師父」。
我唔再奢望愛情，我甚至冇再染髮，我周遊天下，我有絕世武功，可以去危險嘅地方探險。
當我路過一座深山嘅時候，我遇到阿草。
佢自細被父母遺棄，被野狼養大，長大後都一直住喺深山，狩獵為生。
阿草有時會用獵物，同山下嘅人交換生活用品，所以佢都勉強識講人話，但都只限於識講人話，對人情世故一竅不通。
阿草騎住狼，披住獸皮，出現喺我面前。
佢指住我：「我要你，做我嘅雄性。」
咁直接嘅表白，我都係第一次見。
佢生得唔算靚，但佢對眼充滿熱情，佢嘅熱情好似一把火，將我個心點燃。
我問阿草，願唔願意跟我返武當派。
佢唔知咩叫武當派、咩叫張三豐，佢只知道，佢鍾意我，就要同我一齊，去任何地方。
我帶佢返武當派，我想為佢舉辦一場盛大嘅婚禮。
下集：https://bit.ly/3d7VTvd
將專頁設定為「搶先看」/ "See first"，最新故仔馬上睇！
唔開心係一種傳染病：https://goo.gl/RGsEqg
我係拇指姑娘：http://bit.do/fhWja
#短故 #短篇 #小說 #陳美濤 #廣東話 #粵語 #tomatochan #穿越張三豐
