慢半拍死亡——中國社會崩解前奏
中國歌手薜之謙近年紅歌紅人，人在江湖，生活中難免聽到佢嘅歌。認真分析佢某首作品嘅歌詞，我發現流行文化會反映政治現實之說確實好有道理，因為中國人正正係處身於失去自由嘅社會，對未來嘅絕望已經令佢地不得不放棄追求生命意義，收起真我，飾演演員，努力偽裝，就係中國人嘅生存法則。以下加以說明，希望大家理解歌詞含義之後，可以反思自己同呢種處境點解會有所共鳴。
身處於槍打出頭鳥嘅中國文化，掩藏個性以自保，合理不過。加上極權統治深入日常，系統監察無處不在，唔跟拍子做人，故作無知，根本就連生存嘅空間都會消失。因為自由自幼已經遭到剝奪，公民權利之概念又極為陌生，中國人喺經歷一定社教化之後，可以揀嘅路就係「對過往的自己／敬個禮」同埋「對潔白的自己／敬個禮」，然後告別。告別之後，佢地自我安慰，以「從此／再傷害我也沒關係」以及「從此／再描寫我也沒關係」去為社會上嘅無情無義搵理由，而唔再執著保護弱者，爭取公道。
習近平推出中國夢，要全體中國人民為國效力，平民就算內心不平，都只可以自我審查，若無其事。「濃妝豔抹／是我的心意／獻給時代審美統一」令人聯想起樣板戲，更聯想起當年毛澤東離世，民眾要以唾為淚，強裝悲慟，而「和人潮一起／偶爾還躍起／隨便找個主題」所流露嘅集體主義，亦係顯見中國特色。現代社會提倡個人主義，民主政治，意在嚴防政府集中權力，扭曲民意，因此每個人嘅意見都應當得到重視，而政府亦應當順應民眾，保護國家主體意識，而非自上而下灌輸意識形態，要求民眾跟隨聖上旨意機械行走。中國反其道而行，要求民眾忠誠，民眾無從反抗，就得出「我們模仿／慢半拍的／芭比／我們移動／慢半拍的／身體」嘅求生模式。
自由無法伸張，生命受到威脅，盡力賺錢，盡力消費，就成為咗中國人獲得快樂嘅唯一途徑。如果「漫天紙醉金迷／這算不上滑稽」係源於「反正這世界早已那麼差強人意」，咁到底係點樣嘅社會，會令到民眾覺得無可救藥，連撥亂反正都懶得嘗試？佢地選擇「我們要原諒／慢半拍的情敵／無視他們／慢半拍／的遊戲」，而非指出問題，解決問題，正正反映社會並非公民社會，因此缺乏民權，所謂無視，其實只係不忍直視嘅委婉表達。究其原因，大家都意識到，「這年頭誰挑剔／反正一片狼藉／我沒興趣和你講大道理」已成常態，無謂同唔重視人權嘅政府去泥漿摔角。中國人不顧一切，以電子訊息麻痺理智，以牆內嘅世界為現實世界，就係「端莊的形體／廉價的話題／要樂此不疲」嘅體現。
表面上，歌詞係批評緊消費主義，批評緊審美標準，彷彿舉世皆然。但細心思考，若然人係處身於自由國家，大家都有各自生存方式，可以貪婪，可以安貧，可以打扮，可以樸素，其實根本唔會因主流思想制肘而陷入無止境嘅痛苦。我不滿，我疲勞，可以批評現世，可以上街示威，但種種「可以」，喺中國都會變成「唔可以」。少數人感到壓抑，試圖從主旋律中掙扎，「我們懷念慢半拍的愛情」，但又發現「我們失去慢半拍的勇氣」大局已定，無力回天，陷入生存危機。清醒嘅人，生存最難，所以中國人就以「還好這世界早已那麼褒貶不一」去自欺欺人，為虛無開脫。最終，佢地學識控制情緒，學識聞歌至准起舞，「要面無表情的去接受驚喜／痛也毫不經意／避開致命問題」，十三億人奴化工程，至此亦大功告成，而〈醜八怪〉同〈演員〉所要傳達嘅鬱悶，其實都係來自同一源頭。
現代世界物慾橫流，工作壓力沉重，固然會造成人心失落，但對中國人而言，社會係一部巨大嘅影印機呢個比喻，係份外貼切，因為佢地真正面對緊嘅，係自我無法定位，只好從眾。人人都係倒模生產，下場只有盲目合群，忘記真我，之所以成為佢地對於成長嘅常見解讀，就係因為佢地內心知道個體差異不容於世，唯有借助集體去保護自己。一般而言，人類係因為群體夠強大，至選擇加入，但中國人只係唔想承擔責任，先至蜂擁而至，加入群體。呢股盲流縱容中國人逃避現實，當泡沫爆破，佢地就會因為失去依靠而意志崩潰，永不超生。
上世紀七十年代，日本嬰兒潮世代因尋求自我確認而紛紛投身學運，但日本經濟欣欣向榮，根本毋須大幅改革，示威只係為咗與他者重新建立關係，逃避空虛感，而非真係認同學運理念，甚或改變局面。最終，學運人士分成兩類，一類就係逐漸脫離運動，回歸大眾，而另一類就係堅持左翼路線，走向極端，最終自相殘殺。對應中國目前現實，前一類就係搵錢至上賺夠就走之流，而後一類就係無力移民坐以待斃之輩，他日終局如何，可想而知。
身為香港人，我對薜之謙呢啲作品嘅中心思想，難有共鳴，因為我無意向過去嘅自己敬禮道別，只想從錯誤中學習，精進自身，追求理想，創造生之意義。即使撇開政治問題，作品之中處理感情嘅態度其實亦極之心理不平衡——唔講道理，點樣溝通？視感情為遊戲，點樣自省？如此文化輸出，除非聽眾有力善用逆向思維加以消化，否則只會更加偏離愛情嘅真義，陷入更深迷惘。想要美好愛情，大家不妨回歸人性，多加自省，相信當你傾盡全力去做好自己，適當時候，真愛就會迎門聽候。
gnimmm.com/2019/07/20/irresponsive/
印時代影印輸出社 在 [請益] 大里/ 太平/ 霧峰便宜影印店- 看板TaichungBun 的推薦與評價