呢一篇係中伏千字文，但都想同大家分享一下，以免有更多人中招。
或說父親節我已經打算訂刺身拼盤+日本水果係屋企同老公同桐桐舒舒服服係屋企慶祝，而之前就睇到一間係Facebook賣廣告，望過d相又靚靚仔仔、拼盤又精緻，仲要係日本九州直送香港送到上門，所以我沒有懷疑之下就訂咗，如是者就過咗幾日，係一個中伏飲食群組有人分享過同一間嘅中伏經歷，係霉同臭同壞，我已經有不良嘅預感，但老公話可能無事呢，然後我睇哂中伏人嘅評語同留言，我就決定當日一收貨就會拍定片等店家無得賴。
父親節當日早上8:10就收到司機電話表示即將送貨，而司機就9:27成功送到屋企，我就一直拍住片，一打開果然好驚喜，成盤刺身拼盤係冰嘅，硬掘掘，我就打開保鮮紙同透明蓋影相作實，因為未退冰嘅關係完全睇唔到刺身有無變色變壞，我立即放入雪櫃等退冰，而店家係Facebook表示有問題要收到貨品後30分鐘要表示，否則當妥當論，我一拎起盒海膽，已經變黑仲要係冰嘅，係完全結冰，我立即send相whatsapp比店家，店家表示因為係無添加海膽所以樣子有點醜（心諗你當香港人未食過海膽咩，變壞咗變哂色仲要兜？）反正盒海膽係跟刺身拼盤送嘅我就唔追究，不過我想講佢送嘅海膽絕對絕對係賣唔哂嘅過期貨拎嚟做雪貨以為可以瞞天過海。
1）唔會有海膽雪成急凍，只要海膽表面出水就已經唔新鮮即將變壞更何況係冰？
2）盒內有冰塊證明海膽已反覆溶雪再急凍。
3）新鮮海膽木盒一定係乾身，如果發現木盒有濕透即表示海膽已出水。
4）盒上有表示會有食用日期，但我睇勻都無，好明顯店家撕走咗，如果唔係過期貨又點會撕走貼紙。
海膽一睇都知有問題，我即管做勇者試一啖，勁臭同腥，我立即掉入垃圾桶，真心，送唔送無所謂但唔好送垃圾食壞人地個肚（店家表示無問題呢下先好嘢）
刺身拼盤 $2188
白子 $498
太陽之子芒果 $258 x 2
蜜柑 $118
熊本蜜瓜 $298
總共：$3626
芒果正常但偏細，蜜柑同一盒係一田先$68，蜜瓜過熟尾已經爛，仲話係父親節前一晚凌晨上機係新鮮貨，真心唔覺。
到夜晚7:30睇睇個刺身拼盤只係退咗一半冰，足足由朝早9:30再夜晚7:30都未退哂冰，但盤內已開始有融冰積水，店家表示食之前30分鐘放室溫，魚會開始標魚油係最佳嘅食用時候。
我一打開一睇魚唔新鮮、無光澤、色澤暗淡，其實一望都唔係咩靚質素，好多人都叫我唔好食，但我唔食出文有人總會挑骨頭話可能無事呢只係唔靚啫，好，咁我就每樣食一片，拖羅口感粗糙，一食係完住散開，因為冰完再溶個纖維改變口感已經唔同哂，而且比較腥，其餘嘅真係腥夾臭，仲要勁重雪味，成盤刺身拼盤可以令我完全對刺身失去欲望都真係有本事，我放棄喇。
好多讀者叫我退錢，我覺得我無本事叫佢退，因為尋日係其他Facebook群組都有人話一收到有問題同店家反晒，店家堅持無問題叫客人繼續食、一係就賴物流，加上日本直送真係無仇報，所以我寧願講出嚟等大家唔好中伏，幾千蚊當跌咗算喇。
原本呢篇文係想尋晚打，我8:00左右做勇者試食，去到10:30唔多妥，沾寒沾凍咁就去沖個熱水涼啦，點知愈沖愈唔妥，忽冷忽熱、作發燒、嘔、手軟腳軟、我就開始意識到賴嘢喇，立即搽油食藥狂飲水休息，折磨到我今朝先好少少🤮
大家睇完笑下算喇😂😂😂我下次會醒架喇
但大家真心唔好訂，以為日本直送就係好嘢，真係無仇報架。
我係呢間訂嘅 九州農副產品直送
只要whatsapp係 +81 70-2398-1024 唔好訂
佢仲有一間分身 @日本九州產物直送
#九州農副產品直送 #日本直送 #日本刺身 #海膽
