【 #他們的愛情故事 - 約定退休後一齊旅行！有種男仔嘅友情叫池錫辰同劉在錫 】
「男仔嘅友情，就係你男朋友總有個好兄弟比你更似佢條女...」
.
望住男朋友同佢好兄弟日日糖黐豆，打機嗰陣突然聽到男友大叫一聲「我保護你」，可能唔少女仔都曾經懷疑過自己係咪煙幕嚟：「其實BB你同牙明係咪先係一對？」因為的而且確，有時你望住佢好兄弟，內心覺得佢比你更似你男朋友條女... 而呢種男仔之間嘅友情，或者最適合形容國民MC劉在錫同池錫辰，呢兩位大叔嘅愛。
.
「出去玩默默幫在錫畀錢 一齊度過艱難嘅無名時期」
劉大神早前迎來出道30週年嘅大日子，節目《劉QUIZ ON THE BLOCK》特登邀請咗佢識咗30年嘅好友，鼻子叔池錫辰上嚟講下兩人後生嘅搞笑往事。兩人都係喺各自嘅20幾歲認識對方，最不懂事嘅年紀，但兩人都懷抱住成為一個諧星MC嘅大理想。當時錫辰已經喺幾個節目入面擔任固定MC，而在錫就只獲邀擔當一啲邊緣角色，更加係連樣都無得出，只能帶住個草蜢頭套跳啲搞笑舞蹈助興。
.
但兩人都正處於貪玩嘅年紀，所以成日結伴去歌舞廳，又會一齊去卡啦OK。錫辰知道在錫收入唔多，成日都會暗暗幫佢畀錢，然後兩個人就叫每人一杯嘢飲，一直坐到人地閂門，而每次錫辰都同身為細佬嘅在錫講：「你下次先畀返錢我喇」，但其實無一次真係收返佢錢。咁辛苦嘅時間一過就10年，期間劉在錫一直未受肯定，唯一攞過嘅獎牌更加係年尾一塊人人都有嘅紀念牌。喺呢段無名時期，池錫辰始終都相信在錫嘅能力，總係同佢講：「在錫啊，我相信你會紅」，簡而有力嘅一句，一度令在錫非常感動。或者男仔嘅友情就係，我唔叻講嘢，但就算全世界都話你唔得，我都願意盲撐你。
.
「風雨不改笑住接返工 池錫辰形容劉在錫『對我好得像女友』」
好在之後在錫終於熬出頭，憑機智嘅主持風格成為「國民MC」，仲同鼻子叔主持大家都耳熟能詳嘅節目《Running Man》。節目播放到而家已經10年，但池錫辰透露即使到而家，只要錄影前無其他行程，在錫都會由自己屋企江南，特登揸車去王鼻子屋企日山，接佢返工。錄影結束後又再送返佢返屋企，仲會喺路上討論錄影啲趣事。此話一出，隨即被其他嘉賓揶揄話呢個程度根本就係拍緊拖，而錫辰亦笑住表示劉在錫對佢好貼心，根本就好似女朋友咁...咁sweet，唔知阿嫂睇到會唔會呷醋呢？？？
.
「一齊經歷30年開心唔開心！約定退休後一齊去旅行」
一對識咗30年嘅好朋友，一齊經歷過好多起起跌跌，見過對方失戀喊到豬頭個樣，亦見過對方苦盡甘來、事業有成嘅模樣，過得差嗰陣有我撐住，過得好嗰陣我亦都唔會妒忌，或者就係友情最好嘅模樣吧！2018年時池錫辰嘅爸爸過身令佢陷入低潮，當時忙到癲嘅在錫更連推2日行程，通宵陪對方守靈。無論有幾忙，只要你有需要，一個電話我就可以推晒所有嘢即到。
節目臨近尾聲有個單獨談話嘅環節，錫辰罕有向呢位30年好友喊話：「很多年前，不懂事的劉在錫與不懂事的池錫辰相遇了，從那之後便是相互扶持著，一路走來已經到了『中年』。」其後又提及兩人退休一齊去旅行嘅約定，可以唔使擔心行程，可以放心好似後生嗰陣去玩，喺酒店飲返杯。唔知係出於對退休嘅感概，定對兩人友誼嘅感激，抑或why not both，錫辰仲一度講到哽咽。「呢個畫面睇落都幾美好」，鼻子叔如是補充。
.
一個年紀細啲但最愛囉嗦，一個年紀大啲但點笑佢都唔嬲，或者就係因為咁唔同，一凹一凸，先可以成就一段互相扶持咗成30年嘅友情。有時男仔嘅友誼就係無原因、無條件嘅盲撐，你問佢點解，佢答你：「因為你係我個Friend」，件事即刻變得有啲gay，然後我大大力拍咗你一嘢，你又即刻變返平時個恥笑mode。
能成為密友大概總帶着愛，友情或者統統都好似上面兩位大叔咁，笑住喊住，唔驚唔覺我哋已經一齊老去，到咗會緬懷舊時嘅年紀～
.
#有時真係會懷疑自己係煙幕 #打機嗰時直頭覺得自己係第三者 #要唔要掉低牙嫂同我共赴巫山 #哇哈哈哈哈 #講緊召喚峽谷姐其實 #愛 #愛情 #語錄 #拍拖 #香港 #搞笑 #hongkong #劉在錫 #池錫辰 #runningman #友情 #友情語錄
.
即like 港式情侶 HKstyleCouple 緊貼更多港式愛情生活資訊❤️！
IG : https://instagram.com/hkstylecouple
歡迎Dm投稿戀愛趣事，我哋等緊你㗎😙！
