【天生的求生高手 － 香港人】
相信最近不少人都擔心經濟下行，自己會飯碗不保。但香港人出名靈活變通，能屈能伸，就算面對逆境，關關難過都關關過。成日都話「做人最緊要有兩手準備」，話說我有位朋友，興趣嗜好特別多，一直打份全職文員工，閒時再接幾單Freelance job。對朋友而言，做Freelance job先係真正寓工作於娛樂，最近終於好勇把心一橫辭去全職工作。
朋友辭得工當然留有後著，興趣多又瓣數多，一人分飾多角，身兼化妝師、平面設計師、攝影師三職，成為Slasher全力發展個人事業。當中原因主要有幾個，第一，就算其中一個分身職業市場氣氛轉差，仍然有其他分支事業支撐住；第二，之前全職工作太困身，有Freelance job都無時間接，依家自由度大兼多勞多得；第三，朋友享受控制權同話事權，自己生意可以話晒事，由見客報價落手做都一腳踢。
舊時無固定全職工作，俾人一種事業欠長遠規劃、收入不穩定負面感覺。但今時今日，做Slasher只要有能力接到各類型工作，再排到密密麻麻，不廢青還非常標青，代表周身刀張張利。雖然Slasher無固定僱主，又無一條可預視Career path，聽落好無保障，但平心而論，你又擔保搵到一份直到退休而無被炒的工作嗎？再另一角度睇，做Slasher等同將事業分散投資，假如其中一個事業大爆發，再專注發展都未為晚也。
窮途未必係末路，絕處都可以逢生。講求生本能，香港人從來都係高手。
相片：《吉卜力的動畫世界》展覽
