［鴨洲、吉澳一天遊］
今日去左鴨洲、吉澳一天遊。
晨咁早，九點就去到馬料水碼頭上船，之後就坐大約一個半小時船去到鴨洲。船票$90來回，可以帶狗狗一齊，都係$90來回。
鴨洲
一落船，先攻頂，去到鴨洲最高點，映下個無敵大海景。之後就過去鴨頭果邊打卡，沿路係碎石、高低不平嘅岩石層，但絕對唔難應付，大人小朋友都行得掂。呢度大家可以映下海景，石牆，鴨眼，各式各樣嘅打卡好位，應有盡有！
鴨洲上面有間士多，賣冰菠蘿，仲有砵仔糕，我無試到，但個銷量非常好，因為由落船到再上船呢短短一個半小時，已經賣晒！鍾意食砵仔糕嘅，記得去試吓啦！
吉澳
上到吉澳就係食午餐嘅時候，我地揀左益民酒家，食左馳名墨魚丸，仲有其他特色小菜，位位$80，抵啊！（遲吓再獨立出post 講）
食飽飽就出發行吉澳，景點唔算多，主要係睇吓天后廟、水月宮同姻緣樹。傳聞只要企係姻緣樹下，當有綠葉瓢落，就用手接住，咁就會有一段好姻緣架啦。
之後就漫無目的咁周圍行，呼吸下大自然嘅空氣，到差不多三點半就上船回程返馬料水。
兩度地方景點唔算多，但都係假日外出放鬆好去處，風景夠靚映相打卡一流，最重要係收唔到本地網絡，大家可以真正放低部電話，好好咁俾自己遠離塵囂，俾個腦同眼睛休息。
#吉澳 #鴨洲 #毛孩好去處 #假日好去處 #親子好去處 #放假 #郊遊 #遠足
吉澳景點 在 吉澳故事館- Explore 的推薦與評價
吉澳 位於香港東北面印洲塘特別地區之內，係香港聯合國教科文組織世界地質公園嘅熱門景點 🏞️ 。吉澳多年嚟變化不大，遊客到訪時可以體驗到傳統漁民嘅生活文化同歷史 ... ... <看更多>