我嘅職業係：血奴（下）
上集：https://bit.ly/2FhMGWx
總之，我搵咗份工，人工高過以前，再減少埋食同住嘅開支，個個月都儲到錢。
後來，我見到收購血液嘅廣告，賣一次B級血，居然係我一個月嘅人工。
我諗，喺血城生活咗一年，捐咗四次血，一啲都冇舒服，咁賣多少少血增加收入，都無傷大雅掛？
我初時嘅計劃，係每個月賣一次血，咁就有雙倍嘅收入。
但收入高咗，消費都多咗，漸漸地，我就改為一個星期賣一次血。
賣血嘅收入多過返工咁多，我直情辭咗職，專心賣血。
一星期一次、三日一次、隔日一次……我賣血愈嚟愈密，有時出街都覺得頭暈。
但係，望住銀行存款嘅數字，我又覺得充滿動力。
咁樣落去，我好快就可以買樓收租，達至財務自由！
直到有一日，我本來要去賣血。
過緊馬路嘅時候，我突然暈一暈，跌低咗，一架車迎面向我撞過嚟……
醒番嗰陣，我已經瞓喺醫院嘅病床上。
護士同我講：「先生，你失血過多，急需輸血。」
「咁咪輸囉。」我成身都好痛，頭又暈，咩都唔想諗。
「唔好意思，根據血城嘅規矩，輸血前要先收錢，價格係……」護士報咗一個價，用盡我嘅存款都畀唔起。
「咁貴？」我嚇咗一跳：「我賣過血，唔係呢個價㗎喎。」
護士解釋：「血液係血城嘅重要物資，長期供不應求，輸血嘅價格的確比較高昂，所以我哋推出咗分期付款……」
佢滔滔不絕咁講輸血嘅各種優惠，好明顯，我唔畀錢，就唔會有得輸血。
我根本冇得揀，結果我畀晒所有存款，再加埋分期貸款，先夠錢畀輸血費。
死裡逃生後，我好感慨：「又話血城福利好，估唔到醫藥費咁貴，有病只可以等死。」
隔離嘅病友搭嘴：「你輸咗血？呢度醫藥費唔貴，係輸血特別貴。始終話事嘅係吸血鬼，佢哋恨不得攞晒我哋啲血，點會想我哋輸血。」
我要講句公道說話：「吸血鬼又冇咁衰，我住咗一年幾，都冇吸血鬼夾硬吸我嘅血。」
「只係時代進步咗，佢哋唔用武力吸你血，而係用錢吸你血囉。」病友嗤之以鼻。
我之後嘅生活，就好似為呢句說話做註腳。
出院後，為咗償還分期貸款，我要繼續賣血。
還晒筆錢後，我本來搵咗份工，想老老實實打工，唔再賣血㗎。
但返咗幾日工，我忍唔住諗，賣血賺錢咁快，點解我要喺度浪費時間？針筒拮一拮，就係成個月嘅人工。
於是，我又辭咗職，變番全職賣血人。
賣血賣到頭暈暈嘅時候，我都會諗番起，阿忠曾經同我講，血城人人平等，我唔係嚟做「血奴」。
其實，我根本就做緊「血奴」，只係血城嘅奴隸制經過包裝，搞到成件事好似有得揀咁。
但知道真相，唔代表可以改變現實；賺過快錢嘅人，再都返唔到轉頭。
成為奴隸，未必係被武力逼迫、殘酷對待。
最可怕嘅奴隸制，係用好處腐蝕你嘅心，令你失去腳踏實地嘅能力。
從此，你明明有其他選擇，但偏偏自願成為奴隸。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #我嘅職業係血奴
