［倫敦乜都貴，除咗食嘢］
FT 原文呢度 : https://on.ft.com/2UuMxWg Leaving London: voices from the financial front lines of Brexit
金融時報的文，講脫歐鬧劇搞咗咁耐，倫敦城嘅金融職位固然有啲流失咗去歐洲大陸，但其實唔多，比預期少。無論如何，就訪問下啲搬咗去其也歐洲金融中心嘅人 （只係呢種報導已經唔係普通傳媒做到）
但最有趣，反而係個圖。比較不同地方嘅物價。講到尾金融都係睇人材。而家先知？點解金融工高人工？除左因為人嘅貪念幾千年冇變過，亦因為金融工作係比較重視individual talent，你可以同演員或者足球員相比下，絶對冇咩他媽的同工同酬。一個分析員搵皮幾至幾十萬個月都可以。
而金融人，特別係要relocate嗰啲，梗係才俊啦。咁佢地嘅消費模式同你去食譚仔當然唔同。最關心嘅當然係屋租，樓價，寫字樓租，仲有國際學校學費（唔通金融才俊嘅仔女讀意大利啲濕鳩本地學校整意粉？），同埋，食飯。食飯呢度好modest啫，唔使食靜岡蜜瓜米芝蓮，三度菜，中級餐廳（咩叫中級餐廳就好隨意啦）
結果不細講，只講幾個點
一， 好嘢梗係貴。倫敦差不多在所有項目都拋離對手，最貴。但這是常識。因為全球得兩個半環球金融中心，一個紐約一個倫敦半個香港。全世界最勁嘅金融人都去晒呢啲地方，呢啲地方唔貴就假。根本你之前睇咩全球最貴城市，宜居同貴，係有極強正相關。好少有好貴嘅垃圾地方（有嘅，安哥拉盧安達咯），亦好少有平嘅大城市（台北？）。當中原因講過好多次，首先就係簡單供求，人人搶。另外，生活水準高嘅地方一定係高人工高物價，唔會係低人工低物價，因為仲有啲嘢，例如LV呀埃瘋呀，全球同價。你仲要一年去幾次日本。我當你在索馬里一千蚊港紙好好洗可以租四千尺屋—但儲幾耐先去到次東京？
二， 倫敦唯一唔係最貴嘅，登登，就係午餐，嘻嘻。你諗下都幾反智，明明倫敦人工最貴，租金又最貴，點解午餐唔係最貴？應該都係啲嘢實在係唔掂。大家留返去旅行先食（好似香港咁）。定因為其他稅？
三．當然戀英青會話英國有乜名廚或乜（我諗起名句：法國人有美食，但我地英國人有table manner），完全唔關事，而家講中價餐廳。不過又公平講句，仲貴過倫敦嘅，米蘭就算啦，意大利人有軟實力嘛（就係冇其他實力先講軟實力）。但阿姆斯特丹同都柏林， well
四．相比之下，德國嘢食一樣惡名昭彰（根本同英國人難兄難弟，英國皇室都係德國人，英文德文都係同語系）。但平啲。真正抵玩嘅係美食之都巴黎，仲平過倫敦，不過其實爭幾蚊有幾大意義？而明顯最平嘅係馬德里，當年去過，的確啲中價餐廳膽正命平有水準，同意大利一樣有軟實力（因為冇硬實力就講呢啲）
五．對唔住，掛住講食，因為其他唔多熟又唔多關我事。講教育，就冇得傾，倫敦贏幾條街，我甚至認為可以繼續拉開。當年我在英國讀大學，隔離房係個十分愛國的意大利佬，見到我夜晚飲Cappuccino好震驚，發現我飲三合一（窮學生呀大佬）更加畀佢成盒掉咗我然後話返我知咩先係咖啡，睇親波佢都鬧英格蘭冇料到意大利拎咗三次（時為2000年）根本66年嗰次都係西德嘅（都話軸心之盟，此人除左意大利波外就只會讚德國波，醜惡但有用，佢話），見利物浦淘汰羅馬佢幾乎掟爆電視機（時為2001年，利物浦拎埋足協盃冠軍，意大利佬居然冇跳樓）。總之就係咁嘅一個好卡通嘅意大利佬。但佢雖則覺得祖國女人又靚嘢又好食酒又靚又有文化踢波又叻，但都不得不承認意大利大學垃圾，都係要嚟英國讀。商學院都係咁，小學雞國際學校更唔使講。吾友話齋，讀意大利國際學校教啲小朋友乜？整PIZZA，亂渣車，定借錢唔好還？
六．其他嗰啲，都冇乜特別。剩返堆歐洲城市中，一海之隔嘅巴黎都係乜都貴，唯讀國際學校唔係最貴，開餐又平。法蘭克福樣樣都OK平，唯獨國際學校貴，原因不明，學元首教育？
七．明顯地樣樣嘢都平嘅係馬德里。襟芒，真係幾十個球星（畀你計埋馬體會），不足以養起個城市，遊客甚至唔夠巴塞多。乜都平。但當然平嘢冇好。不過再講一次，西班牙食飯不錯的說，特別係中價嘢。更正點嘅係十點十一點去食都得，啱晒我（亦因為咁我在12年前搞到在馬德里撞地鐵，旅遊保險商務位送返香港開刀，而家左手仲有塊金屬片）
八．當然，呢個咩三道菜中價餐廳，實在可以好彈性。鍾意嘅餐前畀碟酸瓜你又計唔計一道？連埋送粒蜜蜂糖做甜品。你在百人一朱都有湯有御飯有果物啦。但好概括嚟講，其實應該香港食嘢仲平？我唔知咩叫中價餐廳啦。但我食開嗰啲我理解嘅中價餐廳，午餐三道菜，絶大多數都唔使去到四至六舊水喎？問題又嚟啦，明明話香港租貴喎。典解呢又？我估係因為，香港可以做好多枱客。西班牙嗰啲十一點食午餐食到兩點返公司。上陣網六點放工去飲酒飲到九點食飯食到十二點，你間餐廳可能一日做兩枱客咋！邊似香港咁，真係一晚都「五輪真弓」（有關「五輪真弓」：http://bit.ly/2FYhtUw）
