《法羅群島冷知識-生老病死篇》
有左燒賣之後，發現法羅群島有好關於生bb嘅有趣冷知識。今日就一次過同大家分享由法羅人都出世到過世嘅冷知識！
1.「嬰兒嘅名字唔到阿爸阿媽甚至自己話事？」
相信大家都聽過「激烈的海膽」或者「荷蘭勁」呢d咁搞笑嘅名。喺香港，大家身分證嘅中文名只要唔超過六個字，英文名唔超過40個字母，加上唔係粗言穢語等，基本上幾搞笑嘅名都可以隨意改。但係喺法羅群島，就無呢支歌仔唱啦。法羅群島有本姓名冊，入面有唔同男性同女性嘅名，法律規定所有喺法羅群島出世嘅bb嘅名字都要喺姓名冊中選擇。而且男仔就一定要用返男仔名，女仔就要用返女仔名。咁究竟點解呢？原來係語言學嘅原因，法律上只係好簡單咁講，係為左大家嘅名字唔會偏離左法羅語。例如，Micheal 喺法羅語係Mikkjal。例如Richard喺法羅語係Rikard。
2.「爸媽最鐘意畀bb食風」
你走喺法羅群島路上，唔難發現家家戶戶會將嬰兒車放喺門口。走埋去睇睇，入面真係有個bb嘅？法羅群島天氣變幻莫測，成日風大雨大，但係爸媽好鐘意自己喺屋入面嘆咖啡，bb就放喺屋外受盡風吹雨打。因為法羅人相信bb喺屋外呼吸到新鮮嘅空氣，而且會訓得更好更冧。加上法羅群島治安好，大家都好放心將bb放喺室外。所以多數嘅嬰兒車都係又大部又穩如泰山同有雨罩，等bb可以平躺安穩咁喺室外訓覺。
3.「法羅群島唔容許墮胎」
法羅群島係一個有濃厚宗教信仰嘅國家，主要係基督教。好多法例都係因為宗教而訂立。例如規定大型超市星期日唔可以開門，星期日唔應該工作。而喺法羅群島，法律係唔容許墮胎。所以喺呢度政府係唔會刻意去幫孕婦做唐氏檢測等，如果孕婦發現bb有問題想墮胎就要去丹麥進行手術。
4.「法羅群島人人受洗」
浸禮喺法羅群島比較似係一個傳統。大多數法羅群島嘅bb喺幾個月大嘅時候就會喺教堂進行浸禮，即使父母並無宗教信仰。
5.「醫療有保障」
法羅群島嘅國民由25歲開始，每個月需要支付175丹麥克朗嘅醫護費用直至退休。咁當你生病嘅時候，所病醫療費用就會全免。例如大地之子有個朋友嘅爸爸有肺病，每個月嘅藥費高達20000丹麥克朗，政府基本上會全數支付。（但病人仍要支付每個月數百元藥費，視乎總藥費多少，以及病人嘅歲數，喺度我就唔詳細講啦）
6.「大型手術要到丹麥進行」
很多大型手術喺法羅群島係無辦法進行，醫院就會安排飛機同酒店畀病人到丹麥進行手術。喺哥本哈根，有間酒店叫Hotel Tórshavn，就係專畀要到丹麥進行手術嘅法羅群島人同家屬住嘅。機票同酒店費用都係全免。
7.「電台每日公布死者名單」
法羅群島嘅國家電台每日喺大概中午12點左右會有個環節，公布國家喺過往幾日過左身嘅國民嘅名字、歲數、來自邊個鎮、過身嘅地方以及黎緊喪禮嘅地點同日期等。
8.「生前唔使擔心住屋問題，死後亦然。」
法羅群島嘅國民並唔需要購買墓地。墓地屬於市政府，而市政府免費為國民提供墓地。法羅群島只有土葬，並無火葬嘅。而政府每月會喺國民薪金裡面收取等於薪金0.9%嘅教堂稅。國民喺過身嘅時候就會得到免費嘅喪禮服務，由教堂嘅喪禮到運送棺木到下葬，國民都無需支付費用。但國民仍需要自行購買墓碑、棺木同花朵。（教堂稅可交可唔交，但政府會先自動設置大家都係交嘅，如果唔想交就要自己取消）
大地之友覺得邊個冷知識最有趣呢？留言講低大家再討論下☺️覺得有趣就畀個like再share畀朋友仔知啦😁
***圖為大地之子小時候偷偷地將媽媽嘅唇膏搽落自己個頭度，最後要將所有頭髮剪晒🤣🤣🤣🤣🤣🤣🤣🤣🤣
---------------------------------------------------
❤️我從九龍半島搬到法羅群島出左網頁啦！想知道更多法羅群島旅遊資訊或者想分享法羅群遊記，記得去 www.whereisfaroeislands.com
❤️如果想睇更多大地之嫂同大地之子嘅無聊小故事，大家記得去我個page度較返See first 呀！
❤️仲有要記得follow埋ig: whereisfaroeislands ，
https://www.instagram.com/whereisfaroeislands
