《媽媽！》影評
「愛是什麼？解放與束縛之辯」
—以愛情哲學進路解構
（含劇透，雖然我自己都唔知透唔透到）
（未睇戲嘅like/share咗佢定先啊～）
～
講呢套戲之前，比少少意見大家。
～
1.如果你覺得睇戲要度度都解得通，
咁你唔好去睇。
-
2.如果你抱驚慄片心態入場，
咁你都唔好去睇。
-
3.如果你想輕輕鬆鬆個半鍾，
可以放棄入場。
-
4.最好自己一個去睇，
唔係我驚你同朋友打交。
-
5.如果你對聖經有認識，
可以試吓入場。
-
6.如果你係一個腦補控，
睇完戲會周圍爬文搵解釋嘅，放心入場。
～
一套電影幾近掀起一場世界辯論大賽，連套戲自己都出咗張「世界大戰」POSTER，將正反意見羅列，夠薑咁樣做，真係要比個LIKE佢哋。
～
尋晚睇完套戲之後，我偶像大踩套戲，而唔少平台都對電影持負面態度，謂之「媽媽！」唔係戲名，而係你睇戲果陣會喺腦中不斷講嘅粗口云云，但另一邊廂同場嘅陳雲海大哥則大讚電影非常精彩。
～
而我作為一個讀咗好多年天主教基督教學校，但對聖經全無認識嘅人嚟講，對電影仍然係持「正面」嘅態度，因為我反而追源溯本，當佢係一套「愛情片」咁睇。
～
乜嘢愛情片？成套戲就係以我女神JENNIFER LAWERENCE嘅視角出發，講吓佢呢個怨婦對佢老公嘅不滿。例如人哋想攬攬，個死人老公就要話佢自己好臭，要去沖涼；例如人哋慾求不滿，本身講好咗話搞嘢，點知個男人一上到床就抱頭大睡。而珍妮花仲因為老公慷慨好客嘅行為而搞到自己眼火爆，例如MAN同WOMAN兩個老嘢都仲痴纏過我同個老公仔，又咀咀，又搞嘢，又有兩個仔，仲入埋嚟住，分薄曬自己同老公嘅相處空間，仲令到自己間屋烏煙漳氣，兩個仔嚟到仲打交死埋人，老公仔被迫要去醫院打點一切，有客到唔係仲掛住搞嘢嘛？
～
而JENNIFER LAWERENCE一直就係度諗究竟自己仲有咩地方做得唔足夠，所以一直以嚟其實佢都想同老公仔生個BB，但係老公一直就好似性冷感咁，唔願搞嘢，"you cant even fuxk me"係女方最大嘅控訊。所以女主角就寄情於間屋入面（如果大家有留意，女主角從來都無離開過間屋），修補返唔知點解爛咗嘅大屋，希望用呢種努力嚟換取男主角嘅愛。
～
而間屋可以整到咁妥貼，女主角自然就唔想有外人入嚟搞亂佢，因為每樣嘢都係用佢嘅愛灌溉而成。但偏偏作家男主角就唔知道伊人嘅心意，瘋狂叫人入嚟住同開P，例如搞追悼會，然後演變成強力嘅破壞；又或者係書迷嘅慶祝而造成嘅史詩級災難，最後甚至出現「食子」嘅場景，佢哋嘅結晶品比班書迷食咗，然後個老公竟然話要原諒班變態人！
～
當然，戲入面嘅情節係誇張到一個點，我亦無意為每一個情節去做什麼腦補嘅解釋，因為你永遠唔會解釋到FANS嚟影相會變成恐怖份子、打仗、性奴等等嘅出現，但喺我呢個對宗教無甚認識嘅人眼中，電影嘅命題只有一個：「愛情到底係解放定係束縛」。
～
對於JENNIFER LAWERENCE嚟講，愛情當然應該係「束縛」，佢好想要兩個人獨處嘅二人世界，但偏偏就三番四次比班仆街阻住，每次比人壞咗好事，佢都要衝去廁所食藥，因為佢搵唔到一個同樣願意「束縛」嘅對象，係忘年同無性戀嘅陰霾之下，屈住屈住終於屈出病來。
～
而對於男主角嚟講，愛情就係「解放」。佢希望同伴侶一齊感受更多嘅生命力，所以佢成日話要令間屋有番「生氣」，得兩個人死氣沉沉並唔OKAY。佢唔認為愛情要靠做愛，或者好外顯嘅行為去表達，女主角話男主角唔愛佢，但其實唔一定，只係個表達方式唔一定要一樣。
～
而兩個根本唔啱嘅人，其實做啲乜都係會唔啱。女主角唔係無嘗試過配合，但就屈出精神病，而「食子」就係女主角嘅不能容忍嘅爆發點，人哋一直以嚟都係想要個BB，點知比班人食埋，個老公都仲要話「原諒」咁痴膠花，然之後你會發覺，愛情呢樣嘢，從來都唔可以，亦唔應該由付出去得番嚟。
～
「結咗婚佢會變架喇」「生完仔佢會變架喇」「衰過佢會變架喇」「我做得未夠好」，可能喺一段關係入面，我哋都曾經浮現過呢啲諗法，所以用更大嘅付出去換取對方對自己嘅愛。但係「江山易改，品性難移」就係一個真理，因為從來都只係「你」覺得「間屋」或者「BB」重要，人哋其實完全唔係咁諗，男主角面對班人搗亂同殺埋自己個仔，都係要講句"I dont want them to go"，咁又點怪得人呢？
～
所以，兩個人之間如果唔啱真係無謂勉強，如果搞到JENNIFER LAWERENCE咁連仔都生埋，就真係會走投無路，走到最尾就係自毀之路，一把火燒曬自己建立嘅所有嘢，" I give you everything, you give it all away"，係幾多人嘅寫照。 而就算係咁，個男人都未必會太CARE，佢只係想喺你個心度拎番個蘋果，重新嚟試多次，因為，「下個更可愛嘛」！
—
（一篇影評其實要寫嘅時間真係頗長同相當費心力的，正如呢篇野都過左二千字了。如果你覺得文章係寫得好嘅，我一個人嘅力量真係非常有限的，唔好吝嗇你嘅like同share吖，甚至幫手推薦比朋友知道原來睇戲之後係可以有反思的，一齊傾，一齊分享同感受。網絡的力量可以很少，一篇千文字可以只像一粒沙，但同時亦可以很鉅大的，依靠的就是你，你，和你，感激不盡！）
—
Intercontinental Films Distributors (HK) Ltd.
Movie Express電影速遞
