本身係無總結2018嘅打算，不過年頭係903《有誰共鳴》節目入面分享左一啲對我成長影響好大嘅歌，想係度用文字紀錄一下~
-長文慎入-
1/ A17 -始終一天
講起點解宜家自已會研究整樂器，係因為自已由細個開始已經對音樂呢方面有興趣，我記得讀緊幼稚園嘅時候自已同家人提出想學鋼琴 (但當時係唔知道要考試的)，於是由幼稚園開始學，一直都係鋼琴老師上門教琴，直到升左上中學之後因為鋼琴老師添置左一部三角琴，由那時開始每個週末都會搭地鐵過海去學琴。無幾耐就興起左MD機，哥哥送左一部比我，我記得MD 帶應該係一面可以入到一隻碟12首歌度啦，而我第一隻MD 放嘅就係At17 嘅碟，佢地嘅歌陪伴住我好多個一個人搭車過海去學琴嘅日子。
2/ Linkin Park -In the end
頭先有提過中學嘅時候得到第一部MD機，當時未有咁多平台，接觸音樂嘅媒介除左收音機就係雜誌，而係我哥嘅影響之下我開始聽Linkin Park，及至後來讀設計嘅時候第一次係香港睇佢地嘅Show。到上年佢地嘅主音過身，非常震驚，我諗左好耐到底10年前睇band show 影嘅相到底放左係邊，我用左好耐時間搵返自已封左塵嘅Blog Spot, flickr account, 最後終於係Xanga 搵返啲相，而常時仲係用緊DC去影...佢地嘅歌可以話係我成長嘅一部份，亦都好影響今日嘅我。
3/ Hocc -絕對
介紹返點解我會開一個叫認真做無聊事嘅page 呢，呢個page 嘅英文名係一個Chinglish, “Waste Time Waste Life”，直譯係”浪費時間浪費生命”。我讀嘅中學係一間好傳統嘅學校，大家只係注重學術上嘅成績，而我呢啲對讀書一啲興趣都無嘅人呢，就用晒所有時間去做家人同老師都覺得係無意義同價值嘅無聊野，好似畫畫呀運動呀等等。所以我媽經常用"浪費時間浪費生命"黎形容我。到後來讀完中學之後，媽媽竟然比我選擇自已嘅興趣，讀設計呢一科，我明白我嘅呢個選擇係真係會令佢長憂99嘅，因為係香港唔係做金融地產政府類別嘅工作就好似會叫做無前途賺唔到大錢，我好感激可以係家人嘅支持同包容下，做自已鐘意做嘅事，而最後就算係失敗左我都知道自已仲可以返屋企。
4/ 電影Once OST -Falling Slowly
開始讀設計之後係老師同朋輩嘅影響之下開始接觸唔同種類嘅電影，有部份比較小眾，由於以前從來無接觸過，好多電影都令我大開眼界。作為一個設計師，接觸多啲唔同種類嘅創作係非常重要。亦同時都係學生先可以有咁奢侈嘅時間去睇咁多電影節入面嘅電影，自從出來工作之後就無咁嘅機會，所以宜家好懷念以前讀書嘅日子 :D
呢首係其中一套我好喜歡嘅電影入面，充滿回憶嘅歌。
5/ Beatles -A Hard Day's Night
讀緊時裝設計2年級嘅時候開始參加唔同嘅公開比賽，加上學校嘅功課同埋一啲同同學相處嘅問題，當時面對嘅壓力係前所未有咁大，情緒亦到好受到影響，好似隨時都可以崩潰咁，自已唔識處理呢啲壓力，所以經常都會不自覺地對家人發脾氣。有一次又係咁樣發左一個好大嘅脾氣，媽媽好冷靜咁同我講左一個佢嘅故事。以前我爸同我媽係開公司嘅，每次做野做到好辛苦嘅時候，只要諗起收工返屋企可以見到我地，就覺得點辛苦都係值得。呢個故事對我衝擊好大，係一個覺悟，因為自已從來都無諗過呢啲一直都視為理所當然嘅野原來對自己咁重要，無論面對幾大嘅壓力，屋企就係自已嘅shelter。
6/ Gotye -Somebody that I used to know
係時裝設計系畢業之後入左一個本地品牌做設計師，因為工作需要每星期都要長駐內地工廠，亦都係係呢段時間更加了解生產一件衫嘅流程，由sourcing 去到最後賣到客人手上經過非常多嘅工序同人力，以及當中嘅浪費，呢個體驗係其中一個令我做up-cycling同手製樂器 嘅原因。
呢首歌係其中一首陪伴住我發配邊疆工作嘅日子~
7/ 野仔 -相約在八王子
第一次將up-cycle 概念做成實物係係2012年，當時因為係同一間公司工作而認識左Mandy, 佢離開左當時間公司之後邀請我同佢一齊參加YMCA Art 嘅自發作programme 一齊出一本書，而我地最後嘅成品就係一本手作月歷，每個月同大家分享一件用廢物重新製作成為一件有用嘅產品。係製作呢本月歷嘅幾個月入面我地基本上每個週末都係趕緊呢本書，當時陪伴住我地嘅有廣播劇讀賣Sunday <前女友>，少爺占嘅廣播劇除左陪伴住我地兩個成長之外，亦令我回憶起當時好熱血咁將概念變成實物嘅時光 :D
8/ Keane -Everybody's Changing, Somewhere only we know
宜家有全職工作，而自已呢個手造樂器嘅興趣基本上已經佔有晒所有放假休息嘅時間，通常週末都係做樂器development，好多時係呢啲無休息而又面對製作失敗嘅時候係好想放棄，係失落嘅時候就會諗自已點解要做得咁辛苦，又唔係為左賺錢，同時又好攰好眼訓。係呢啲時候我會聽返呢首歌黎令自已振作，呢隻碟係以前讀緊design好青蔥嘅歲月時不停聽的，一聽返就會令我回憶返以前好不為什麼咁向前衝嘅日子，之後心情就會好返然後埋位再做過！
後記：
好耐之前幻想過如果自已錄《有誰共鳴》會講啲咩歌，
有一日終於真係錄左，完。
#2018
