又到講故事的時候了。
幾年前，我與一位電視台小生相約出去尖沙咀飲野，兩個男人出去飲野吹水，佢懶神秘咁話酒吧有另一位朋友介紹我識。後來，到了酒吧中，一位男士早已坐著等候，我認得呢位男紅星，但基於禮貌，我冇第一時間叫佢，小生拉埋我地兩個，叫我地自己介紹。
我就隨即介紹自己：「你好，我叫八神」
男紅星回應一句：「你好」，然後坐低。
其實，佢由頭到尾冇講過佢個名，就expect我知道。
我想講，無論呢位所謂男紅星有幾紅都好，你嘅知名度係有限的，唔係你走到街上就100%有人認得你，你係紅，但唔代表你可以冇禮貌，唔代表你可以唔駛介紹自己。好彩我自己真係認得你，但係其實你有冇諗過，如果我真係見識少唔知你係邊個時，我就會在你講完句「你好」之後，好自然咁追問返你一句「先生，其實你叫咩名？我真係唔識你」時，到時樣衰嘅絕對係你，唔係我。
你可以喺演藝圈撈到大紅大紫，但係請不要忘記禮貌及人格，終有一日你唔再紅果陣，係要還的。
我識唔少圈中人，當中不乏影圈大哥老前輩，我想講，反而愈老愈得高望重果D甘草，會比你呢D公仔箱所謂男主腳禮貌好多，貼地好多，所以我一直都會尊重果D值得我尊重的人。即使佢地知道全港冇人唔識自己時，見到新朋友，佢地都會照樣介紹自己的。你呢位所謂男紅星，人格決定命運，今日我真係唔知你去左邊度了，祝你好運。
