《魔術師的表演時間 車路士對錫菲聯賽後分析》
.
雖然不失球紀錄已破，亦無阻車路士喺主場反勝錫菲聯，當中薛耶治既表現更可以話技驚四座，交出兩球助攻之下成為球隊全取三分既關鍵，而同時堤亞高施華亦成功於英超開齋取得第一個聯賽入球，可以話喺國際賽週期前先以一場勝仗作收結。
.
喺佩利錫繼續養傷以及夏弗斯確診肺炎下，林伯特喺前場並無太多懸念作其他選擇，繼續源用添姆雲拿兼任左翼，而艾巴咸同薛耶治就擔任箭頭同右翼角色，中場方面亦有高華錫重返正選之列，配合簡迪以及蒙特合組三中場，而四人防線就繼續選用堤亞高施華與蘇馬哩對組合，左右兩閘亦係捷維爾以及尼爾斯占士，繼續維持一個433陣式。
.
雖然開波初段球隊經已先失一球，不過並不過份牽涉於防務問題，只係對方把握得到一次流暢既組織，而球隊喺落後之下亦無過份進取地選擇長傳急攻，相反繼續保持固有打法維持賽前既戰術部署，喺佐真奴不在場底下，堤亞高施華成為中後場既發動第一人，控制住後場節奏以及發動攻勢，巴西人既表現當然相當稱職，而攻入既果一球頭槌亦要一讚佢既後防拍檔蘇馬，以一敵二阻攔對手令施華走空跳頂。
.
而球隊左右二路既配合亦相當出色，蒙特與捷維爾配合雲拿於左路既合作愈見成熟，而右邊薛耶治夾高華錫兩者就主打技術流，雙方亦係今季首次同場正選合作，已經交出一次耀目既進攻配合，相信黎緊將會有更多既合作機會，同時高華錫今場波亦有兩次相當近門既入球機會，喺被林伯特被偏為後備後實在要爭取更多機會表現自己；而貴為今場波主角既薛耶治就以身作則交出兩球助攻，多次利用左腳交出手術刀式傳送，質素上令球迷們拍手叫好，亦好耐未見過藍軍能夠打得出哩家波。
.
不過喺領先下林伯特既臨場部署亦相對較為保守，基奧特亦要去到完場前至得到後備出場機會，而球隊亦無用盡三個換人名額，其實喺場上堤亞高施華同捷維爾既體能都經已流失得七七八八可以替換，林伯特都無安排魯迪加或艾斯派古達作替換實在令人無從稽考，再加上黎緊仲要國際賽期，場上大部份球員都得到所屬國家徵召，有必要得到更多休息時間。
.
同時林伯特亦有必要為夏弗斯既位置作出決定，喺球員缺陣底下明顯哩兩場波都進攻都較為流暢，當中牽涉到德國人喺陣中運作流程上與其他隊友配合等要素，林伯特實在需要為球員於依加既穩定陣容上尋找一個適合位置，而國際賽期哩兩星期亦正係一個得宜既時間可作考量。
.
《岩睇既比個Like支持我地啊！》
作者 : BluexLion車迷手記
圖片來源 : Daily Express
-------------------------------
同場加映《令車迷們「瘋狂」的一個暑假 淺談藍軍大灑金錢的一個轉會窗 – 中前場篇》
https://bit.ly/3esVUMS
.
#Chelsea #車路士 #錫菲聯 #英超
https://s.fanpiece.com/ZmI30pi
