呢個堅係專業分析：從幅相各種細微資訊推敲出究竟美國海軍係用幾貴嘅相機影出黎，甚至連各種攝影數據都有埋；然後再同解放軍同日公佈嘅圖片做比較。
1. 好多人誤解咗幅相只係影倒遼寧號，就以為佢身邊竟然無護航艦──其實邊有可能丫任何航母都一定係以編隊出航，影唔倒護航艦只不過係因為攝影距離太近──而呢個當然係美國海軍想藉幅相帶出嘅訊息。
2. 中共解放軍一早已講明，遼寧號只限作訓練同研究用途，所以根本唔係乜嘢軍事威脅；遼寧號之於中共，其實可以當係Walking Chrimas Tree，睇得唔打得。
3. 不過中共堅持起航母呢個策略其實錯唔哂，因為只要美軍唔敢擊沈遼寧號，都無人可以證實佢打唔打得，解放軍繼續可以尻吹自己海軍戰力幾咁犀利，你唔信唔緊要，國內嘅人信就得。
同埋響現時中美海軍有共識絕對唔開火嘅前提下，對峙期間唯一可以做嘅就係鬥撞，呢個時候艦隻噸位就遠比戰力重要。
美國海軍之所以花咁多心機，又搵艦隊高層擺Pose，又搵專業級攝影機set哂鏡影輯相，其實就係知道反正無辦法擊沈遼寧號，咁不如花心機響軟實力公關宣傳上面，將解放軍果堆P圖相比下去。
4. 而家成班時事KOL成日響度尻吹台海局勢緊張隨時打仗，其實遼寧號就偏偏係一個最好嘅和平指標：因為對於任何國家黎講，佢地都無辦法承受一架航空母艦被擊沈嘅事實──即使獨裁專權如習近平，如果山東號遼寧號是但一艘被打沈，佢都應該好快被質疑領導能力，最後被政變推翻落台只係時間問題。
所以如果解放軍真係打算開戰的話，第一件事會做嘅就係立刻將兩艘航母縮響軍港入面，如果夠膽放出黎示威，即係代表佢地根本無開戰準備。正如解放軍如果真係準備攻擊台灣／釣魚台，仲邊會咁撚得閒成日放軍機／漁政船去示威，所以資源梗係集中哂響戰爭準備啦。
