【再見樂樂】
今日黑色星期五早上九時多，樂樂喺睡夢中離開了，返咗去天堂做小天使。由佢身體狀況急轉直下到離開世界，前後不足二十四小時，咁就一世，好突然好急，我完全無諗過會失去佢，畢竟我收養佢仲差大半個月才五年，太短了，我一路以為我哋仲有大把時間，佢前半生嗰六年都被困於無良繁殖場中被迫生BB，我一路都希望佢嚟我哋度可以享多幾年福。。。雖然而家都已經接受了，但當然係非常唔捨得啦 😭😭
好多人話樂樂好彩有我收養，但其實我真心認為係我好彩樂樂嚟咗我哋屋企。因為樂樂，令我學懂如何做一個盡責嘅主人及如何無條件付出愛心，佢令我返到屋企覺得温暖，有佢愛護我，痴住我，需要我，依賴我，撫慰我嘅內心深處。老老實實，我一直有同樂樂講，其實係我需要佢多過佢需要我，佢曾經陪我度過一段沒有正職嘅日子，嗰陣我全心全意照顧佢唔會亂諗嘢，我哋又一齊試過去遊車河、買外賣、出街食飯、行山頂、做訪問、帶你去做動物老師等，我哋實在有好多共同體驗及回憶；每朝風雨不改同你 walk walk 係我極度放鬆嘅時候，我永遠唔帶電話，專心同你一邊walk一邊傾吓計唱吓歌仔，其實我都好快樂。我慶幸除咗因為受外遊、工作或痛風影響外，每朝我一定自己同你walk，從來唔俾藉口自己唔起身（最多之後瞓返！）我好珍惜我哋嘅相處時間，可以行到你臨終前嘅最後一朝，好感恩。
我記得你2016年9月8日初來我家時對我不瞅不睬，只係跟住工人姐姐，又唔肯食嘢又唔吠，我當時好擔心，以為你無聲音又驚你生活得唔開心，直至你開始肯食我餵嘅糧，開始肯跟住我周圍行，仲要喺廁所門口等我，我就知道你終於肯承認我呢個爸爸啦，好感動。當然，後來我就知道你點會係無聲吖，仲好大聲添，每朝六點吠醒我，催我開飯又吠我，仲有每次入屋都有小猛犬式嘅吠叫，我就知道你喺屋企信心十足。其實我一直都好珍惜聽到你嘅吠叫聲，因為咁樣代表你精神健康，直到最後一朝你無叫醒我，又唔吠我入屋又唔食嘢，我就好擔心知道唔妥喇 。
我好感恩我最後能夠把握機會親自車你去睇醫生，喺等醫生及轉診所時我可以一直陪住你，仲同你搭埋最後一次私家車當遊車河，算係我哋嘅福氣，我也無憾了。你一直都係一隻好易湊嘅狗狗，脾氣又好，反而如果爸爸喺呢四年幾照顧得未夠好，請你原諒我 🙏🙏
我真係好想多謝你嚟到我屋企，將幸福帶俾我哋，又好錫洋洋成日任佢欺負，睇見你哋兩個成日一時糖痴豆一時水溝油就知道兩姊妹感情好好。你係好家姐，我嘅好女女。放心，我哋會好好照顧洋洋。
你到最後都係咁生性咁乖，唔想我哋擔心就咁急離開，唔想我去做痛苦嘅決定，亦唔希望我哋要照顧長期病患，但講真如果你可以仲喺度，我一啲都唔介意。希望您而家已經再無痛苦，又可以睇到嘢自由自在咁盡情玩盡情食嘢。樂樂豬，唔使掛心爸爸，我會繼續努力生活，Life must go on，我知道你唔想我哋唔開心，我盡量唔喊，但一定會好掛住你，你永遠都會活喺我心裏面，保重，爸爸最錫你 ❤
Love You Forever.
R.I.P. 樂樂
（8/9/2016 - 13/8/2021）
P.S.
1. 感謝 NPV 非牟利獸醫服務協會 (Non-Profit Making veterinary services society Ltd) 及 西區獸醫診所 QueenWest Veterinary Clinic 嘅醫護團隊最後對樂樂嘅細心照顧，還有 Veterinary Specialty Hospital of Hong Kong - VSH - 香港專科獸醫醫院 一直照顧住佢嘅眼晴，我代表樂樂多謝各位。
2. 感謝各位曾遇上樂樂嘅朋友，你哋對佢嘅愛錫佢一定感受到嘅。
3. 今日喺工作場合遇到嘅朋友真係唔好意思，我比較少傾偈，因為我驚我會忍唔住喊，始終做司儀要保持專業。
4. 衷心感謝 黎諾懿 Lokyi Lai 、記者朋友及同事星期四下午頂替我嘅工作，令我可以趕返屋企帶樂樂去睇醫生，共渡最後時光。
Thank you.
工人姐姐 入屋 在 第一次請工人姐姐，請問工人入屋前需要注意同做啲咩？謝謝 的推薦與評價
有冇試過同工人姐姐終止合約嘅時候個姐姐唔肯簽名？如果有經驗嘅話可唔可以分享吓之後嘅手續或者情況會係點樣？ ... <看更多>