關於 平版nike高筒波boot ，我們在網路上蒐集到這些相關的討論、資訊與評價

平版Mercurial CR7 高筒釘boot現身香港？

CR7再一次出特別版，以往Nike都會以CR7做生招牌，放响Nike Mercurial Superfly同Vapor到。小編本身唔係C朗迷，又唔會特登留意球星系列嘅波Boot，不過今日去開波鞋街睇下鞋，見到呢對CR7，再望多幾眼。咦，今款CR7香港竟然有入平版？仲要係Nike第一對Mercurial Victory嘅高筒Boot！亦都係因為咁，價錢只係賣六百幾，無得唔入啦！

呢對Boot個全名叫Nike Mercurial Victory VI CR7 DF FG，個名的確係好長。佢係CR7系列嘅Chapter 3，紀念自己响士砵亭對曼聯嘅一場友誼賽，個場比賽令當時曼聯嘅領隊費格遜對C朗十分欣賞，繼而簽咗佢，仲改變咗佢嘅命運添～佢果日係2003年嘅8月6日，呢三個數字分別印咗響Superfly（貴版）同Veloce（中價版）到，Victory呢對就淨係響塊鞋墊到有。

一對平版嘅高筒Mecurial，皮上面就無Flyknit架喇，佢係用普通嘅合成皮，摸上手帶點膠質。呢對鞋有啲似Vapor 5嘅設計，佢腳內檔同腳外檔係唔同顏色，腳內檔係黃色，腳外檔就係灰綠色。Mercurial Victory DF嘅鞋面鞋身就有一條條微微突出嘅橫紋，相信係加強球感嘅用途；鞋外檔嘅橫紋就無咁突出，不過就有一點點嘅閃點，另視覺十分突出。

Mercurial Victoy DF保留襪筒嘅設計，繼續俾一種貼腳穩定嘅感覺球員，而且都有一定嘅保護足踝能力。鞋釘上Mercurial Victory DF係繼續用刀形釘，且呈箭嘴形狀，務求加強球員直線跑動嘅速度。

事不宜遲，小編拎咗對鞋去試下個感覺，就睇下對平版高筒會係點。可能小編本身對平版嘅鞋係無咩期望，所以呢對鞋俾小編有唔少驚喜。最驚喜係斬波，個波唔知點解離奇地食力同準，估計可能係佢鞋面嘅橫紋令佢增強咗球感，加上鞋釘食力，感覺有啲意外。

傳波上感覺正常，同以往嘅傳波狀態差唔多。控球上觸感當然唔夠袋鼠皮嘅Boot好，但係佢塊皮係有少少厚度，感覺就好似塊薄薄嘅Pad格住鞋面同腳，變相增強咗緩衝嘅作用，因此控球感覺都算唔錯。

射門上因為鞋係合成皮嘅關係，唔難食得應個波。受惠於佢鞋身嘅橫紋，腳內檔嘅射波同出波表現理想。鞋釘係另一個驚喜位，雖然係平版，釘嘅質料應該會有啲唔同，但係佢箭嘴形嘅設計令小編嘅爆速能力加強了唔少，佢嘅First Touch轉方向爆速係令小編响比賽上面感到驚喜嘅，輕輕一步就過到對手。

總括嚟講，小編以往主要介紹都係貴版嘅鞋，呢對Mercurial Victory VI CR7 DF更新咗小編對平版波boot嘅印象，因為佢嘅感覺，除咗腳踭係有少少刮腳之外，整體感覺算唔錯（可能係小編好波咗都唔定😂），而且分分鐘按性價比嚟講係最優勝嘅一對。鍾意C朗嘅朋友，或者上平買高筒波Boot嘅波友，呢對鞋係時候入貨喇！！

＃nikemercurialvictoryvicr7dffg #cr7高筒波boot #平版nike高筒波boot #c朗 ＃chapter3 #nikemercurialsuperflyv #nikemercurialveloceiii #高筒釘boot #足球鞋實測 ＃波boot實測 #屎波裝備多

小編剛剛去完日本福岡休假，一翻到香港 ，立即同大家介紹日本嘅足球產品文化。小編本身諗住會睇兩場J league，分別係福岡黃鋒對名古屋鯨魚，以及鳥栖砂岩對神户勝利船。不過不幸嘅是熊本地震，所有九州主場嘅賽事均取消咗。點都好啦，安全最重要，天佑熊本。(圖1，2)

小編第一樣要介紹當然係福岡kamo啦，地點係晌天神站嘅parco商場7樓，裡面有齊全嘅J league波衫，九州隊伍嘅球衣就有北九州向日癸同鳥栖砂岩，出名嘅隊就有大阪飛腳同櫻花，橫濱水手，浦和紅鑽等，球迷版波衫若10000円至13000円不等，小編就見到練習波衫會平啲到，價錢為7000円到，啫係約港紙$500到。(圖3，4)

除咗J league波衫外，當然少不了一大蘿嘅波boot啦，牌子就有晒Nike, Adidas, Mizuno ,Asics, Umbro, Diadora 同New Balance，且大部份都係貴版波boot，釘底則主要為日本常見嘅HG釘，識合日本嘅偏硬草地。(圖5)

小編就深深俾黑色個對Nike Tiempo Premier吸引住，價錢為8千幾円，啫係港紙6百幾蚊，6百幾有袋鼠皮嘅質素，唔係唔買嘛！仲聽聞喱對係上年出嘅復古款，巴西球王羅馬利奧舊時著個喱款添呀，不過佢著嘅係有鞋舌嘅款式喇。不過可惜嘅係，好嘢係搶手嘅，對鞋無我size, 嗚嗚……(圖6)

小編另外要同各位朋友介紹另外一片樂土。話語福岡有個大outlet，叫Marinoa City Outlet, 晌博多站搭303巴士或者姪濱站坐巴士約40分鐘車程就會到。入到去outlet，當然有大小型牌子嘅特價品，不過唔可以錯過嘅就係喱間叫做SPORTS DEPO嘅運動倉，小編入咗去成兩個鐘都唔厭！(圖7)

裡面究竟有啲咩架呢？佢將所有運動分門別類，佢淨係足球產品就已經有四大行！！先講斷碼區，簡直係細腳福音，只要你對腳係25cm/25.5cm，恭喜你，半價鞋一對接一對，喱對adidas.ace 15.1白黑色只需要8千幾円，佢隔離仲有一炸貴版puma boot，可惜小編對腳又去唔到咁細。(圖8)

再去石地波boot區，有日本版袋鼠皮嘅asics同纖維皮版嘅mizuno, 著上去輕到呢，避震系統都的確唔差。呢度仲有晌日本futsal屆出名嘅巴西牌子Penalty！佢嘅設計非常年青同新穎，材料上貴版更用上麂皮！石地系列點少得室內場嘅大户Joma! 佢嘅鞋晌UEFA Futsal Cup (歐州國家杯五人賽)有唔少球員穿著過。(圖9，10，11，12，13)

之後過去釘boot區，外國牌子即刻出翻嚟。Nike嘅代表就有齊貴版同中價版，但以舊款居多。小編就拎咗對Nike Mercurial Veloce leather上腳，雖然唔係最貴嘅Vapor款，但係佢嘅皮相當軟熟。不過又老實講，本身買Mercurial嘅人應該就係貪佢合成皮輕巧同靈活，將佢換成皮版感覺就好似倒翻轉個理念咁😂。再試埋對tiempo vi第二貴版先，佢叫Tiempo Legacy ii，嫌貴版貴嘅話佢都的確係一個唔錯嘅選擇，佢彩用嘅係高級牛仔皮！(圖14，15)

過去Mizuno釘boot專區，尤如進入咗博物館一樣，舊款嘅Morelia有鞋舌版去到最新出嘅Basara 101同Monarcida應有盡有，有貴版又有平版！小編求期拎對腳塞落對Wave Ignitus 3 SL到，原來佢鞋底咁舒服！就好似跟據住亞洲人腳底而設一樣，踩落去到貼一貼，感覺如腳底嘅倒模。喱對Wave Ignitus 3仲做緊七折，加上隻色可以話最靚個隻，係幾吸引嘅！(圖16，17，18)

再去Puma專區，Well，好多Made in Japan嘅 Puma鞋特價，主要特價嘅款係Paramexico Lite! 售價由11000円到13000円不等，啫係最平個對貴版日本製袋鼠皮波boot只需約八百幾嘅價錢！Paramexico Lite 款色算多，不過小編就麻麻地佢，原因就係佢啲釘係離奇地大粒😂😂。(圖19，20，21)

除咗大牌子外，SPORTS DEPO仲有啲特別牌子嘅鞋，雖然係舊款，但係就接近半價咁濟！小編就遇到喱對日本製嘅袋鼠皮Hummel波boot! 著落去一如Made in Japan過往的好，軟熟嘅袋鼠皮，給予你上盛嘅球感，售價都只不過係六百幾港紙！(圖22，23)

小編喱個trip簡直令自己大開眼界！走進日本喱個亞洲足球王國，見識到當地嘅足球產品文化，略欠不足嘅係睇唔到J-league同無機會落日本球場踢下波咁。睇下下次有無機會啦！！😂仲有最後一點要同各位朋友講聲，如果想買高筒波boot嘅話，福岡嘅鋪頭未必幫到你，佢地嘅鞋大部份都係低筒嘅(小編淨係晌kamo見到三款高筒)。如果要買高筒嘅話，去啲大城市如東京同大阪嘅kamo啦，佢地會有多啲款式同size!