這是一間政府資助老人院。
「跟住個個新搬嚟嘅。」老人院姑娘對我説。
我望着電腦, 整理着她的病歷。婆婆 93 歲, 無兒無女, 之前住在一間私營老人院, 剛輪候到這裏的政府資助宿位。她有心臟病, 曾經因心跳慢被醫生建議裝起搏器, 但婆婆堅決拒絕。
婆婆扶着助行架慢慢走進來。
「佢有無話乜野唔舒服? 」我問職員。
「佢成日朝早行行吓嗌暈, 想跌想跌咁, 好得人驚㗎。」老人院姑娘説。
「咦? 咁係唔係心跳慢? 」有心臟病心跳慢病歷,又申訴頭暈, 當然要擔心兩者互相關連。
「無喎。 度親血壓脈膊都有六七十㗎。」
「咁係唔係一起身就見頭暈個啲? 」體位性頭暈 (orthostatic intolerance) 在老友記當中相當普遍, 診斷時一定要考慮這個因素。
「唔係呀。」婆婆說。
「我話佢根本就係早餐食得少, 佢成日唔肯食野㗎, 無野落肚咪行到腳軟軟咁囉。」職員對我說。很多時候, 職員對院友徵狀都有着自己的見解。
「你唔鍾意食嘢㗎, 婆婆?」我轉身對婆婆說。
「唔鍾意! 」婆婆斬釘截鐵。
「點解呀? 呢度啲嘢唔好食咩? 」
「唔好食。」婆婆答得直接。
「佢係度食乜野餐㗎?」我問職員。
「佢食糊餐嘅。」職員説。
「係言語治療師話要食糊餐定點? 」一些有吞嚥困難的長者需要食用糊狀食物, 以防嗆到; 但糊餐貌相不佳, 味道又未必吸引, 某些老友記可能不願食用。
「唔係, 係佢無牙啫。」
「咁食碎餐咪得囉。」打碎食物, 就算沒有牙齒也能吞下。
「唔得㗎, 啲菜同肉碎佢會損咗啲汁跟住肚番啲渣出嚟㗎。」
「咁整啲無咁多渣嘅? 豆腐𦁤身啲個啲得唔得?」
「我地啲餐 set 好哂, 碎餐就一份肉一份菜, 廚房好難淨係整佢一份㗎。」
「都明嘅。」我顯得有點無奈。婆婆無親無故, 要别人特別為她準備饍食也不大可能。
「你想食乜呀, 婆婆? 」我轉身問。
「食乜? 」婆婆有點不明白我問什麼。
「啲糊仔食唔食呀? 」
「糊仔? 唔食! 」婆婆搖着頭。
「叉燒燒賣個啲食唔食呀?」
婆婆猶豫了半秒, 然後説: 「食呀!」
民以食為先, 口腹是人的一大享受。在日本, 不少飲食集團都有出產適合不同吞嚥困難長者的饍食, 製成品既美味貌相亦佳。
希望本地的商界也能投放資源在這個範疇上, 令老友記受惠。
