《鳥獸行》影評
「我的離開也是一種愛」
（含劇透，優迷必看電影！）
—
好多蒼井優嘅作品，其實我都無睇過。但如果要問我最鍾意邊個日本當紮嘅女星，唔係結衣，唔係長澤，唔係石原，唔係滿島光，唔係安藤櫻或者宮崎葵，我反而會毫不猶豫咁答係蒼井優。
—
可能係審美疲勞嘅關係，我一向對東方人鬼妹樣嘅果種類型全無好感，因為東方人係應該要有東方人嘅美。蒼井優唔係典型嘅靚女，但渾身是戲，氣質滿瀉。對你笑一笑、一個凝視、背影，講說話嘅形式，表情，所有嘢對我嚟講都非常吸引，而《鳥獸行》更加係佢嘅個人表演，擺脫既有文青或者乖乖女嘅形象，淫蕩到底。
—
好多電影都會將唔同嘅東西推到去極端，例如九把刀嘅《樓下的房客》，標榜「開鑿人性嘅盡頭」，；《情繫海邊之城》講嘅係人悲傷嘅盡頭究竟係啲咩；而《鳥獸行》想嘗試觸及嘅，係「愛的盡頭」。
—
愛嘅極致究竟係啲咩？任何嘢推到極端都會將佢嘅原意扭曲，而愛呢樣嘢都係唔例外。男主角醜男陣治，佢話會為蒼井優嘅幸福，而做任何嘢。如果你真心愛一個人，你的確會為佢無條件做好多嘢，犧牲自己嘅努力去換嚟對方嘅安好。
—
事實上，陣治呢個角色係全套電影寫得最好嘅一個。佢一開始係以令人厭惡嘅形象出現，以電話、訊息轟炸蒼井優，試圖控制女方嘅起居生活同一舉一動。愛一個人，唔代表你要控制一個人，就算果個人已經同你一齊好耐，就算你曾經幫過果個人好多，就算你哋已經結埋婚、生埋仔，人都必須尊重另一半作為獨立嘅個體。
—
《鳥獸行》最重心嘅一樣嘢，係描寫唔同人唔同嘅畸戀，有人可能係真心鍾意對方，有人只係為錢，有人為性慾嘅發泄，彼此因為佢哋想得到嘅嘢，即使現實上有好多不利嘅因素，但都離唔開對方。
—
例如由蒼井優飾演嘅十和子，佢深愛住已經娶咗老婆嘅黑崎俊一，即使對方打佢，要佢做雞，但女方始終對男方念念不忘，實為犯賤；陣治知道十和子只係當佢係提款機，但佢唔介意，因為佢只係想蒼井優得到幸福。
—
愛一個人，係咪代表要不離不棄，死守到底呢？陣治恐嚇錶店嘅水島，希望呢個有婦之夫離開十和子，有場寫得特別精彩：十和子知道陣治騷擾水島，竟然鬧番陣治轉頭，陣治出於一片苦心，雖然阻止唔到故事最後嘅悲劇，但佢仍然被「好人當賊辦」。
—
有好多人，你努力搏曬命幫佢，佢只會覺得你煩，當你係害緊佢。而犯賤嘅十和子就係一個最好嘅例子，一頭栽去黑崎，栽去水島，陣治想幫佢過番啲正常嘅生活，反而被女方認為係最大嘅壞人。
—
愛一個人，你就要無條件支持同幫佢。但事實係咪真係咁呢？陣治喺電影中就做咗一個最好嘅示範，佢幫十和子殺黑崎，認自己傷水島，最後跳樓而死，十和子闖禍，自己無條件地去承擔，因為佢愛十和子。
—
但真正嘅愛係唔係不論對方做錯啲咩事，你仍然要去撐呢？你支持你愛嘅人做錯事，其實變相鼓勵緊佢錯誤嘅行為。所以十和子五年前殺完黑崎，今日會殺水島，即使今次無比人發現，佢之後仍然會傷害其他人，咁樣仲係愛咩？
—
愛，其實包含引領你喜歡嘅人去正確嘅道路上面。當佢做錯嘢嘅時候，你要用更大力去鬧，甚至必要時大義滅親。而人其實亦有犯賤嘅權利，你幾愛一個人都好，你都無辦法強迫佢做改變，所以底線就係盡力去勸告，然後轉身離開。
—
故事入面嘅各個人物，有做錯事嘅勇氣，但偏偏唔夠膽去離開唔會有結局嘅感情。真正嘅愛就係，當你嘅愛人蒙住眼喺懸崖前面，你會盡你所有嘅力同佢講前面有危險唔好再行，但行唔行下一步，交番比佢去決定，你只能遠觀或者離開。
—
「愛的盡頭」，唔係幫對方做盡壞事，而係忍痛離開。
—
Edko Films Ltd. 安樂影片
Movie Express電影速遞
