昨天係我老婆生日，同佢去咗一間叫VEA嘅餐廳食，今次同往年唔同，無拍片，因為實在想盡量enjoy用餐嘅體驗同過程。以後如果唔係真係想拍VLOG上Youtube嘅話，我都只會以文字BLOG 出review.
講少少呢間餐廳嘅背景，呢間餐廳係一間FUSION 中法料理嘅Fine Dining 餐廳，拎咗米芝蓮一星，由主廚 Vicky Cheng (鄭永麒) 主理 （呢個亦都係我嚟嘅原因）。餐廳位置係上環，交通都算方便。
今次用餐我哋係食 Tasting Menu，當中包含咗幾個 Course，一路由Snacks, 主菜，一路食到甜品。我相信食物嘅menu會定期更改做到時令味道，不過signiture dish 係會保留。 大家睇相會見到menu 列出嘅幾道菜。我只會揀其中幾道有深刻印象嘅講下個感覺。
一上到去，會有服務員係升降機口等待你嘅來臨，comfirm 訂座之後會帶你埋位，直至你坐上高凳，再推理埋枱，非常親切有禮。然後會有另一位服務員介紹當晚佢會係你嘅主要服務員 （當晚個位好似係叫做 Maggie)，佢哋會因應客人嘅語言溝通，可中可英，感覺係高級餐廳來講係非常好，禮貌都係米仔一星應該有嘅態度。會問我哋會唔會有食物敏感等等。會問我哋需唔需要收起外套，會比軟墊我哋放電話，相機等等以免刮花機身，以上都係非一般餐廳會有嘅配置。
座位係會對住整個嘅 Open Kitchen，睇住整個廚房運作，呢個相信會係對鍾意煮嘢食嘅人嘅一個非常好既享受，好好J 嘅環境。亦都唔大味，只係有少少熱 （當日係香港攝氏15度，會著多咗衫）
有幾隻香檳俾你選擇做餐前飲料，服務員會逐一解釋，亦都會解釋升級嘅食物係點樣樣。亦都可以選擇wine paring ，包括wine/cocktails 7 款。
所以menu 當中，其中會有可以升級嘅部份，當日有燒本地馬友 （或者升級做花膠），煮日本大根蘿蔔 （或者升級做29頭溏心鮑魚嘅tart)。
首先送上嘅snacks, 係由 5道小食組成，味道無重複，有清新而且開胃嘅感覺，軟硬口感都齊晒。最喜歡都係燻蛋（雀巢個個）。個東風螺係有兩隻黃酒煮出嚟，不過味道唔太重。
歌手林子祥先生嘅歌曲裏面，曾經唱過鹹魚白菜也好好味呢句，亦都可以食到出嚟，而且食嘅時候都會有細細聲純音樂比你聽住去食出個味道。
menu其中一道係牡丹蝦刺身，旁邊有一個小小嘅擔擔麵一齊上，服務員會將已經炸過嘅蝦頭壓碎榨汁 ，連同蔥油，紅油混合一齊食，恰到好處，一啲都唔膩。係一個成功中西日嘅 FUSION 嘗試。牡丹蝦放耐咗，蝦肉變咗少少白色，不過味道依然，只係美中不足。
VEA嘅signiture dish ，當然有炸海參，用我最喜歡嘅北海道遼參，釀咗阿拉斯加蟹肉，用蟹殼做出 mousseline，炸出來嘅一個中法Fusion. 出奇地夾，出奇地好食，海參遇油無化，無散，爽口仲食到個味道，係兩個層次嘅味道，非常好食，一啲都唔伏，蟹肉亦都足料。非一般中菜出品嘅風格味道。
大根蘿蔔都係唔簡單，日本高級食用流心蛋黃旁邊嘅花瓣，全部都多由人手即場一片片擺上去，睇得又食得。清新味蕾。
main 係燒雞，呢隻雞係一個法日 Fusion，睇落係炸子雞？都係啦，中一半。首先食第一啖，個雞肉係由外到內都係非常滑，熟度接近完全一樣，睇唔出過熟嘅瑕疵，感覺好似慢煮出來，點知我估錯晒。手勢非常好，佢哋係用傳統法式 Brine 嘅方式，焗爐焗出嚟之後風乾上皮再淋滾油 finish，雞係即場去骨，廚師用切付牛刀飛走位於雞皮同雞肉嘅脂肪再重新砌法上去，極之費事，極之好食，我都睇得非常享受。
煲仔飯：即場做，即將燒，我見到係Vicky 親自逐個整出嚟，定時轉位，再由服務員送上，個飯焦係乾身脆口，但係冇煮過籠，係啡，唔係黑色過份燒焦或者死實嘅飯焦。
當日Booking係備註生日，所以甜品當中有個飛天豬嘅朱古力，放係個木音樂盒上面送出，而且主動有即影即有幫我哋免費拍照留念。做得非常細心。
相片當中嘅甜品嘅款式係可以全部選擇，不過我哋選擇咗4款。
最後嘅糖蔥餅係最後嘅甜品，亦都會講當晚嘅用餐已經完結問我哋仲有無特別嘅需要。
去VEA食飯，點可能唔同Vicky 影像相呢？ 所以我臨走都要求相同Vicky 拍照留念。估唔到佢竟然邀請我入佢個廚房同佢傾兩句，影張相。雖然見佢做嘢嘅時候都專業嚴肅，但係交談係非常友善。
佢第一句問我係咪做廚嘅Youtuber， 我當堂打個突。真係多謝佢嘅團隊當中已經有人為我介紹咗，呢啲嘢我真係唔敢咁樣介紹自己！LOL。。
總結：好多Fine Dining 嘅餐廳一係行傳統，一係行Fusion，後者需要勇氣因為味道嘅配搭一 Over 就好容易出事。而且未必個個人啱，有啲Cross Over到會食到好多黑人問號。不過今晚無呢個問題，全程係享受緊五官嘅感覺。由進場坐低去到離開到感受到服務員嘅質素，唔係被動嘅服務，係主動嘅服務。冇得彈！
用餐時間3至4小時，上每一道菜嘅時間都唔耐，唔會等到悶。食物觀感，味道，口感層次分明，唔會 Overlap，食到心機，亦都感受到廚師嘅愛。等候每道菜個間距係舒服嘅。 不過，高潮起復我覺得可以再做得Surprising 啲。
#唔熟唔食 #cookkingroom #chefvickycheng
