［拉闊音度］雙失情人節，二月最多人聽慘情歌？大數據係咁講
有話一月最慘情，至少北半球嘅人係。聖誕又過完，日短夜長，有排都未到夏天。有話一月第三個星期一係Blue Monday，全年最慘，即係我地「年初四咁嘅樣」
Economist自己做嘅數據研究（都話好多嘢睇），研究下到底邊個月份心情最差，就係睇你聽乜歌。結論發現，二月就最多人聽慘情歌。不過你可以話掉轉，心情差先要聽勵志歌，心情靚唔怕聽慘情歌。但實證上，我理解，其實係正相關嘅，多數啲人越頹越失戀先聽慘歌去自憐沉溺，人生得意時先聽勵志歌。
用嘅就係Spotify嘅數據，5000萬首歌，近3億用家，主要都係北半球，歐美。Spotify有演算法，去計首歌嘅valence，正能量，開心程度。開心歌就高分，慘情歌就低分。然後Spotify又會每日公佈200首最多人聽嘅歌，每個國家都有，就有得分析。個分析用咗30個國家，近5萬首歌，3000億次播放。
個圖就係結論，大把嘢可以講，快講下
右上細圖見到了，一月開始慘，去到二月就最多人聽慘情歌，之後谷底回升，去到七月就最開心（夏天放暑假同陽光玩遊戲？），然後又慘過，到聖誕就忽然亢奮（鬼咩，播足幾日聖誕歌），然後聖誔節後急速dur皮（要返工），頹到下年二月
仲有，你睇到了，香港人就最撚慘的。數據應該2017年先開始有，大可以講政治，但我就覺得係因為香港人係聽情歌，而聽情歌梗係失戀歌。而你見到以為好開心好樂天嘅菲律賓，尾二。民主大國美利堅尾三，香港人日日J嘅新加坡尾四，點講都係完美（除咗天氣）嘅挪威都尾五。好似冇乜特別結論？
另外，你會話，係咪同天氣有關？北歐天氣出名令人想自殺。但又睇下，呢個二月慘情七月興奮嘅模式，在南半球嘅紐西蘭澳洲都係咁。全年一季嘅新加坡都係咁。「所以我估都係情人節」。個別國家冇呢種月份模式，主要係南美國家，全年都聽拉丁音樂，而演算法認為係開心嘢
同樣係北歐，挪威很慘，瑞典冰島都慘，比全球平均慘。但芬蘭偏偏例外。而芬蘭向來都特別奇怪，語言都同其他四國完全唔同，亦係北歐唯一用EURO嘅
然後可以講民族語言之類，你見日耳曼語系嘅英國德國荷蘭，都係比較開心嘅。
仲有，見到了，真係同窮富，甚至有冇民主，貧富懸殊未必有乜關係。最開心嘅，全部係啲南美國家，巴西阿根廷智利墨西哥。拉丁音樂嘛。連帶西班牙都係。呢堆係寧寧晒晒特別開心嘅
北歐國家係起落最大嘅，相信係同日照時間有關。幾明顯見到日照時間長嘅日子聽嘅歌就開心啲，另外，落雨就冇咁開心
作為港仔等我提出一個問題：就係，只係聽聲音去判斷慘情定勵志，在廣東歌或華文歌未必work。眾所周知廣東或華文歌，往往詞大過曲，詞先判斷到首歌慘定唔慘嘛，應該整多個演算法睇歌詞。
一時唔係好諗到例子，但，《我一個人住》同《我不是一個人住》明明就同曲唔同詞，意境都唔同。另外，陳慧嫻嘅《傻女》同《傻女的新衣》，又係同曲，但意思相反喎！仲有《閃著淚光的決定》同《懷著笑意的決定》
當然，最經典嘅，就梗係「熱烈地彈琴熱烈地唱」嘅《喜氣洋洋》，原曲明明唔係開心歌喎，咁點計？
（最尾呢兩段真係出賣晒年紀）
