老規矩，香港人、香港事，原文畢錄如下。不過近來 Medium 轉咗數式，流量低咗好多。希望 Facebook 嘅朋友賞面支持。
Medium link: https://link.medium.com/LlANdgmPzZ
//
2014 年 8 月 31 日，中共全國人大委員會作出「 831 決定」，為香港嘅普選之路一劍封喉。我唔覺得係一槌定音，定咗音之後 supposed 係開 show 而唔係收檔，文人用字係講究啲。
之後嘅事，當然都係歷史 (the rest is history ，鬼唔知呢一刻之前嘅都係歷史？) 。 9 月 28 日嘅 87 枚催淚彈，往後 79 日嘅佔領，將香港人抗爭、公民抗命、爭取民主嘅志氣，統統粉碎。
雖然政府普選嘅方案因為「等埋發叔」而壽終正寢 (特首，呢個四字詞咁用就啱喇) ，但係往後五年，「民氣盡洩」係香港嘅寫照。即使中間出現過梁天琦同及後嘅本土派崛起，發生過「確認書」同 DQ 事件，議事規則一改再改去杜絕拉布，但係傳統大型遊行、集會，點吹大雞都冇氣勢冇隊形冇人數。
期間賴叔心諗，反正無事可閱，不如去政治化，寫下其他嘢，對自己、對讀者都可能更有益處。及至林鄭以 777 票擊敗曾俊華，中央情願畀一介女流 (no offence but this is really atypical ，各位女權份子請高抬貴手) 掌政，都唔要曾蔭權嘅兄弟、唔要 blue-blood 嘅港英遺物 (if not 餘孽) 。呢一下，真係壓垮駱駝嘅最後一根禾草，我戒了，打算從此 apolitical ，非政治。
- - -
屌，咁你哋睇到呢篇文，以至過去兩個幾月嘅一堆字，就知道我戒唔到。畢竟政治乃眾人之事，戒 J 可能仲易少少。而書寫政治或時事，痛苦在於你有份 (林鄭口中嘅 stake – – 留意返唔係牛扒嘅 steak ，雖然 stake 都可以 rare 。 Stakeholder 譯「持份者」真係幾準確) ，但主宰大局嗰個唔係你或你身邊嘅人。
當然，繼續寫落去，梗係有原因：世事如棋日日新，一日唔死，一日都有新聞睇。冇人估到一次中出、一次旅行、一對小情人，會一石擊起千重浪。係，就係因為一樁喺台灣發生嘅謀殺案，疑犯潛逃返香港，毋須被引渡返台灣，觸發咗政府修訂《逃犯條例》，以及至今嘅「反送中」浪潮。
不過又咁講，第一次世界大戰都純粹係一粒子彈穿過咗奧匈帝國皇儲嘅身體，就此引發。都係老謀，都係搞出人命。所以話，咩「蝴蝶效應」，真係任你講，亦唔好睇輕自己改變世界嘅能力。當然都唔好高估啦下。
- - -
中共喺 2014 年基本上係大石責死蟹咁封咗普選之路。冇嘅，安全系數要夠高，確保香港唔會成為反共基地吖嘛。當然就又篩又揀又選咁，令可以落場跑嘅人都係自己人，根正苗紅，中共政權就千秋百載，一統江湖。
嚟到 2019 年，中央嘅思維有冇變？當然冇。國家統一不分裂，比一切都來得重要。對於新疆、西藏等邊陲地區，中央將古代「和番」、「通婚」、「融和」等手段照辦煮碗，逐步從語言、宗教、思想等領域，實踐「大一統」嘅理念。
對於香港，軟性嘅輸入新移民、娛樂文化、喜茶、普教中，一直都做緊，但步伐唔係話好快。即使林鄭月娥上台，大家都只係諗住香港會繼續被融合，差在係落入大灣區定係廣東省手中。而融合同磨合一樣需要時間，唔係一時三刻由天鵝變醜小鴨嘅。
香港可恃嘅，仲有呢個城市本身獨特嘅定位同歷史地位。曾經嘅轉口港，而家都係大陸同西方世界接軌嘅一個主要關口。貿易以外，金融體系亦係香港 (暫時) 難以被深圳同上海取代嘅原因。人民幣離岸中心、滬港通、深港通、債券通⋯⋯更唔好講各種在明在暗、先進或原始嘅資金流動方式。
香港需要國策扶持，但國家 (及其領導人) 在公在私，一樣需要香港。所以解放軍咪未出動、《緊急法》咪未實施囉。
是但一樣嘢發生，香港「一國兩制」正式死亡 (雖然過去幾年都死咗好多次，勁過羅樂林) ，而金融體系賴以存活嘅法治、通訊等軟件，將會失去歐美等國嘅信心。香港呢隻雞，由會生金蛋，變成生普通蛋，都至少仲有所出。但係變成一隻不育嘅雞，就真係 KFC 家鄉雞。
- - -
但係八月下旬，香港特區政府一邊口口聲聲話大家攰喇，埋枱傾啦，另一邊廂就有穿著警隊制服嘅人士 (謎之音：這是正式錄用的警察嗎？) 繼續催淚彈放題，愛國愛黨人士就攞棍同藤條出嚟無雙亂舞冇後果。成件事，好分裂。
我最初有諗過，林鄭係咪被警隊呢個易請難送嘅屎坑觀音夾住，所以一邊吹和風，一邊又唔可以成立獨立調查委員會或宣布「撤回」。但唔係喎，林鄭呢個星期都放風威脅必要時會考慮引用香港現有法例去「止暴制亂」，即係實施《緊急法》啦。林鄭想攬炒？嗰邊嘅《環球時報》又馬上出文降溫，話高度自治好撚重要乜乜七七。
媽呀，我好亂。
直到路透社引述最少三個知情人士 (其他網媒或者報紙佬未 factcheck 就寫出嚟嗰啲你可以唔信，但路透社嘅權威地位，真係唔講得笑) ，話林鄭其實交過報告畀北京，建議正式撤回及成立獨立調查委員會，好等香港社會回復安寧。呢下，打破晒之前啲咩「林鄭收咗美國錢」、「林鄭匿埋食花生、挾香港令中央」嘅八奇沙盤推演。
Reuters 引述一名商人話，林鄭對手根本畀北京綁撚住咗。唔係林鄭唔想撤，而係中央根本唔畀。所以先有「唔係冇回應，係不接受示威者訴求」呢句咁直截了當嘅 soundbite 。
換句話講，如今香港嘅局面，一係就繼續任由示威者同警察互相消磨，一係就 somehow 中央作出讓步。
- - -
喺 831 五週年前夕，發生咗「 830 大搜捕」，黃之鋒、周庭、陳浩天、鄭松泰等政治人物相繼被捕，控罪或大或小，總之拉咗你，製造寒蟬效應先。雖然上述四位同 decentralized 嘅示威者嘅關連性都相當之低，但對外媒同泛民傳統支持者嚟講，都係一單大新聞。
警方亦反對 831 有任何集會或遊行，甚至叫大家唔好咁多藉口上街。
逆向思維，越係叫你唔好，即係越驚你咁做。 831 五週年出現大規模反政府示威，有乜象徵意義？其實多一次唔多，過去兩三個月更大鑊嘅都試過。
或者，當局都係怕再一次有好多群眾上街嘅畫面出現，觸動西方國家嘅神經，削弱中國喺貿易戰嘅籌碼。唔好忘記，中國真正打到水深火熱，不惜將貨幣眨值、硬食關稅都要打落去嘅，係同 Donald Trump 片緊嘅 Trade War 。
而香港，只係其中一個籌碼。
中央唔會畀香港死，我信。但中央亦唔想香港嘅局面，為侵侵製造更多本錢。此外，美國國會嚟緊會表決《香港人權及民主法案》，一旦通過，美國政府有權禁止損害香港人權同自由嘅人士進入美國，甚或凍結佢哋嘅資產。呢一點，中港政經領導人都未可忽視。
時間，可能係敵人。差在係香港，抑或中央嘅敵人。呢個亦可能係近期鐵腕鎮壓加速惡化嘅原因。所謂「 70 週年十一國慶」死線根本只係面子問題，香港嘅問題，如果拖到十月仍未解決，喺經濟貿易同政治/自身層面，先至令人最頭痛。
我在北京等你 小鴨 在 我在北京等你評價2023-在Facebook/IG/Youtube上的焦點新聞 ... 的推薦與評價
看看《我在北京等你》裡的徐天，為了求個門票竟然假哭！！！ 簡直太可愛了，但是網上的評價貶乏不一。該劇到底是好看還是槽點慢慢 ... ... <看更多>