飛咗一轉美國，一路都有睇實香港個市，《月球下的人》兩個星期六晚嘅字幕場嘅飛去得好快，都係得番極少量門票。
.
其實點解要做字幕場呢？呢個想法係由上年《29+1》bloom again開始嘅。因為電影嘅關係，帶住《29+1》去咗好多地方，特別喺日本，有不同觀眾都問我幾時有演出，表示會飛嚟香港睇，結果我做咗一個唔係幾化算嘅決定，某些場次特設中英文字幕。既然我自己會去睇外團演出，點解外國人唔可以睇番我哋嘅製作?
.
做字幕場一啲都唔容易，要將劇本翻譯（中文同英文都要經過整理），要另外租字幕器材，仲要搵人嚟出字幕，成本不輕。香港嘅話劇演出好少可以有字幕提供，有時大型劇團最多都係中文字幕，但有咗英文字幕，可以入場嘅觀眾類別就多咗好多，所有非華語朋友都可以睇。
.
上次嘅結果我知道真係有嚟自內地、日本等朋友捧場，而且睇得明，係好開心。有朋友話俾我聽，佢特登介紹咗佢外國嘅朋友買飛，大部分都係第一次睇香港話劇！雖然除番開，每位要睇字幕嘅觀眾嘅投資係非常高，不過我仍然希望繼續做落去。
.
都話我個人鍾意搵嚟搞㗎啦。
.
今次《月球下的人》再設字幕場，剛好喺兩個星期六，我的確希望所有資源可以用得其所，真係有更多非廣東話觀眾可以欣賞到我嘅作品。而家收到幾個日本觀眾嘅order, 到時會飛過來睇；又有普通話觀眾，仲兩個法國朋友已經訂咗飛，希望佢哋可以感受呢個屬於香港嘅創作。
.
如果你都有非廣東話朋友對香港劇場演出有興趣，不妨推介俾佢哋吖，幫我掃埋剩低嘅飛，呢兩場係為佢哋而設㗎！
.’
「諗得出，做得到，小雞識跳舞！」小珊，《月球下的人》
.
.
#月球下的人舞台劇
#字幕場
#搵嚟搞
#我好期待翻譯
英文字幕翻譯 Tommy Chan
