話說表侄女帶埋佢男朋友（係呀，我寫左兩年文，終於出現一對異性戀角色啦！！！） 黎倫敦探我地兩位老人家，咁我地都唔可以待薄客人，所以，第二日我地去左都幾出名嘅Dishoom 食個印度版的英式早餐。
作為洋腸界代表（我諗應該無人同我搶呢個title了吧？），我不得不說呢度嘅腸係真心ok，外脆肉實多汁，一擺落口就知道係靚野，呢方面無得彈！
炒蛋軟滑是基本，但這裡還加上印度香料，非常惹味，也不會蓋過蛋香。人到歐洲，請你務必要試試這裡的牛奶和雞蛋，絕對跑贏香港啲國產垃圾蛋幾十萬條街。我又講多句，依家英國印有獅子嘜的雞蛋已經講明可以生食，所以啲炒蛋就算生嘅你都唔駛驚。
麵包中間𠝹開煎過，比起用焗爐更勝一籌，一咬下去是鬆軟的質感與麵包的麥香，然後才是焦脆的中層，我倒是吃了一整個，才猛然想起可以用來夾炒蛋，但淨啪都真係好正！
另外茄汁焗豆亦是畫龍點睛，加入了印度香料，帶著與別不同的微辣，讓人欲罷不能，用來沾麵包也很好吃的！
正所謂「包到食時方恨少」，夾了炒蛋，又夾不了蜜糖煙肉，夾了煙肉又沾不到茄汁焗豆，呢個時候，就係考驗愛情的時間— 情深款款秋波暗送望著老公：官人我要... 你個包。
結果：個死佬仲要拿拿臨咬多兩啖慌死我會搶佢...
#原來他不夠愛我
想當年杜十娘以百寶箱試真情，今日人妻先生以百搭早餐試老公，滄海桑田物換星移，唯一沒變的是天下紅顏多薄命，世間男兒都負心... （巨蟹座的悲情小劇場絕對能夠不斷重播重播又重播，比亞視還厲害）
#再見啦無野啦完場啦你唔愛我啦
咳... 說遠了，我地返返黎食評先！
其實我地仲叫左兩種飲品，一種係印度奶茶，另一杯係芒果乳酪。芒果乳酪上面灑上茴香籽，好喝是必然的啦！至於印度奶茶，更加巴閉，無限添飲，你喝完一杯侍應就會問你會否要續杯，基本上上餐前一杯，中段一杯，食完早餐後一面聊天一面喝著又是兩杯。老實說，就算是一杯收這個價錢我覺得合理，因為真的很好喝，更不用說現在變成無限添飲。
拿，老實講句，大家去旅行都係求開心，請大家唔好用「返本」呢啲U字頭啲乞兒飲食心態去狂飲人地但又唔多叫野食，仲要老奉係咁叫侍應幫你refill，到時候人地取消呢個offer又係大家攞黎衰。得些好意須回手、是非曲直在心中，學table manner之前，要先學manner。人家餐廳是付足了誠意，就不要用討債的心情，去將對方吃個不死不休，做人嘛... 放過別人，即是放過自己，輕鬆地欣賞食物吧！
最後，為了將港豬形象發揚光大，貼多幾張圖，食飽又去左行博物館。真心推介：一睇就知未袪靈完成、會在晚上作祟的小朋友肖像畫，以及偷聽隔離屋XXOO的死八婆人妻油畫一幅。
#我究竟睇左啲咩
#CLS食評一則
#飲飲食食最開心
#我想講個侍應手臂好粗
#不過印度嘅我唔岩
#啲接吻技巧差到不予置評
#真係唔好浪費大家時間
#中學時老師無教架咩
#等陣先
#邊間中學會教呢啲嘢
#呢啲係咩食評
