關於 抗爭之前你首先係一個人 ，我們在網路上蒐集到這些相關的討論、資訊與評價

【#請你好好放低你個ego】

想分享下一件童年往事。

我細細個已經係個好多意見同好多野講既人（簡稱多管閒事），而我從小習弦樂（後來反叛就無玩了），小學時有玩學校orchestra，有日指揮提出左一個我覺得好有問題既改動，於是我即時表達自己反對既意見，指揮一聽到就話：「我而家有問你意見咩？」

我當堂啞左，好似被人狠狠地摑左一巴咁。

細個個陣最大既感覺就係「無面」，無咁多深入思考，而家大個左諗番，當下應該係覺得自尊被踐踏了，被奚落了。

但係一句咁既野點解會踐踏到我自尊？

因為過大既「我」。

「我」姐係個ego，過大既ego簡單黎講就係：我我我我我我我我我我我我我我我我我我我我我我我我我⋯⋯

呢件往事教訓了我，其實我既意見唔係真係咁重要，其實我個人都唔係咁重要，我會介意只係我ego太強。

好多人都係ego大過天，但除非你有番咁上下斤兩，不然你既ego只係累人累己，而恰巧世界上叻人係佔唔多population，姐係平庸既人先係世界大多數，大家都好大機會係one of the平庸既人，咁你ego放到咁大做乜呢？

我join左唔同既「黃絲」group，每日都見到好多人急不及待要出黎發表意見，因為放得自己太大，佢地睇唔清自己有幾多斤兩，有啲人直頭覺得自己看透世事，出謀獻策，以致於一堆「捉鬼」、鬧人「扮黃」、鬧人「伸手黨」每日發生，而做呢啲野佔據左佢地大部分既時間，所有既精力都係攞黎去拗啲「我咁醒無可能睇錯既」既野，但又唔係真係醒喎。其實有時間不如去閱讀多幾篇有用文，睇下書同電影，沉著一點思考下，多學習，修煉專長。你唔出聲都唔會對個世界有咩影響的，其實無人想知你點睇的。

呢樣野唔止「黃絲」有，放諸於大部份人同群體都一樣，幾乎係人性黎。我舉兩個例子：呢排成日喺啲facebook group見到有人特登出post話群組太政治化喇所以要退群；有次參與業主大會有個睇落年邁70既阿伯走上台大大聲話一定唔會揀後生參選人，都係個句：

無 人 想 知 呀（幻想下周星馳對住個海嗌個幕）。

我知，原來自己係咁唔重要既呢個事實好難接受，亦好難接受原來自己既意見係no one really cares，但係當你肯放低少少個ego去睇下個世界有幾大時，你會知道你只係一粒微塵，你既意見唔重要係好正常，你而家既不安、難受情緒都只係好minor。而喺你想發脾氣屌鳩我講野刻薄之前，不如諗下點解自己會有呢個情緒，嘗試將所有野都放低，停一停，觀照下你既自我。

#抗爭之前你首先係一個人 （好似提得太多次好煩），你必定要去認識自己，清楚知道自己有乜問題，先可以做好一個人，簡稱係「革自己的命」。如我之前既文所講：先自我檢討，追求自我成長，再去講回饋群眾。講到呢到，咁我地而家可以做既係咩呀？謙卑做人，在自己專長上默默耕耘（無既你快啲去發掘！！！），少說話，多做事。做左幾多野唔洗同人交待，唔需要掌聲同喝彩，唔需要好多心心同like，因為我地決定做乜都係與人無尤。將「我」放低，抗爭如是，拍拖如是，番工如是，做人父母如是。

曾經見過某小隊投稿[1]，提起《Batman: The Dark Knight》入面Joker講既野，再quote埋DC個Joker既對白，大概意思就係唔想成為condom、佢地做左好多野無人理等等。而我想講既係，Bruce Wayne為了大局，寧願背負殺死Harvey Dant既罪名，隱世八年，佢從來無去怪過其他人，無去怪Gotham既人唔支持自己，無去怪人地唔珍惜自己既付出，只係默默咁做自己認為應該要做既事 — 我希望大家都可以從Batman身上學到「無我」，奉獻既精神同信念，而唔係只在Joker身上自我投射同尋求人格缺陷既認同感。

成功不必我在，功成定必有我。放下ego，認真做事，共勉。

-

參考資料：
[1] 蜘蛛小隊 於PPRN的讀者投稿
https://www.facebook.com/…/a.133481744682…/154130589284741/…

延伸閱讀：
抗爭之前你首先係一個人
https://medium.com/@lifesabitxh.13…/抗爭之前你首先係一個人-222d7523a2a1

革命是在殘軀中仍能奉獻幾多 — 本民前無名手足字
https://www.facebook.com/1546925482228025/posts/2536063456647551/?d=n

-

Medium link:
https://medium.com/@lifesabitxh.13…/請你好好放低你個ego-3c91d73a0401

-

#做人好難

【背水一戰，呢場仗，許勝不許敗?】

我從來不是運動領袖，也不是政治明星，宏遠的答案我沒有，只是不知有幸還是不幸，在此時此刻，要為香港人爭一口氣。

「可以卑微如塵土，不可屈曲似蛆蟲」，今次嘅選舉，係法治同人治嘅對決，係民主同威權嘅對決，係真誠同謊言嘅對決。

我係區諾軒，我向全港市民發出一個邀請，3.11，用選票展示香港人嘅尊嚴。

#香港人心不死 #votethe1
__________________

多謝剛才有好多位朋友、前輩上嚟發言，回顧左我過去十年政治路上面嘅點點滴滴。

或者到今日，都仲有人會以為，區諾軒入到閘，民主派係港島就可以大安旨意。但事實係，對手半年前已經開始選舉工程，幾個月前係隧道口賣廣告，幾個月前將海報貼滿老人院，我只有個半月進行選舉工程，呢場絕對係一場硬仗。

諗返兩個月之前，我真係無諗過要踏上呢個台板，以候選人身份同大家見面。正因為政府無理DQ左6名民選議員，包括香港島嘅羅冠聰，後來再阻撓周庭參選，使盡橫手搶議席，先令我要臨危授命代表民主派披甲上陣。我要首先係度多謝各位支持我、幫我地助選既朋友！

今次嘅選舉，好多人都覺得選舉氣氛麻麻。有傳媒連選舉論壇都唔搞，到今日，我地仍然無科學嘅民調數字。但係大家問心，歸根究底，係因為對政治局勢充滿無力，大家搵唔到香港前路點走，以致我地逃避，唔想面對。

唔知道大家身邊有無朋友係咁，我有好多同學2014年，佢就係金鐘個邊紮營，甚至龍和道個晚，就係我隔離條路食警棍。但係雨傘運動過去左，有人專心做生意、有人走左去幫公司上市、有人專心做公務員、做老師，佢地話，一見到政治新聞，就想熄電視；見到立法會包圍主席台，寧願望番手機覆whatsapp；佢地會黎添馬公園，不過係為左捉精靈，參加英國文化節，睇藝術品，多過黎遊行。有錢，有時間，寧願去旅行透下氣。

你問我做民陣召集人個年係咩感想，就係每次遊行都深深感受到，呢種無力，呢種迷惘，已經變成每一個參與雨傘嘅人，甚至係每一個香港人嘅共同經驗。我真係好想同問在場既傳媒朋友，點解成日要訪問梁愛詩、范徐麗泰、饒戈平，佢地次次出黎電視，日日都踐踏香港人既尊嚴。范太話，若果覺得大陸破壞一國兩制，請香港人移民去台灣；饒戈平話，23條立法沒有討論餘地。佢地代唔代表到香港人呀？

大家將心比己，我好明白大家嘅感受。喺香港生活，本來就係一件好壓抑嘅事，有人會話，咁樣叫做休養生息，有人會鬧唔繼續參與就係港豬，背叛左雨傘運動。但係坦白講，一個充滿無力感，好似無方向嘅政治氣氛，覺得攰，想休息，其實並唔係啲咩可恥嘅事。

但係你問我，係咪代表香港人已經死心，我會話唔係，我仍然對香港人充滿信心。每次遊行，我仍然見番好多雨傘運動既臉孔，佢地未必次次出現，但係敘會之間，仍然感受到佢地對香港著緊；今次選舉，你，同你同你，我認識既、唔認識既，都真切地體會到你地既支持。

我地香港人，即使喺無力，壓抑，仍然會抵抗不公義，捍衛自己嘅價值。大家睇睇林榮基；大律師公會；海麗邨既工友；去到最近九巴工潮，車長話：「我第一個企出嚟，第一個係罰我先……每一樣嘢都係要犧牲。」我想大家比Ｄ掌聲佢地。

佢地嘅出現話俾我哋聽，我地點燈，就有光。我哋未必即刻見到明確嘅方向，但我哋緊守崗位同專業，我哋一定會走出呢種無力嘅狀態，為香港嘅民主運動，為我哋嘅社會公義，揾到新嘅出路同希望。我地點燈，就有光。呢個亦係點解，我係今次選舉強調，重建民主運動組織力量，係我當選後既重要方向。

有好多人問，點解我揀喺呢度開我嘅造勢大會，原因好簡單，十年前既依一度，就正正係皇后碼頭抗爭既發源地，而皇后碼頭抗爭就係我既政治啟蒙。

經歷專權政府既發展，依度雖然被拆卸，但無論係天星皇后，定係雨傘運動，呢度都象徵緊有一班勇敢嘅香港人，願意為我哋嘅城市獻身，抵抗警察嘅暴力。

我相信，我對呢度嘅意義係唔會輕易改變，有人恪守自己既專業，係法律界、金融界、學術界，頂住人濫權；有人參選法團，頂住利益集團。我地每一個人堅持既陣地，就係香港精神！

今日集會，叫做黑夜點燈，香港人心不死。即使我哋因為睇唔到出路而覺得無力，我哋並無選擇放棄香港。面對黑夜，爭一口氣，點一盞燈，我哋依然會默默守護彼此，去點亮包圍我哋嘅黑暗。

依家嘅北京，依家嘅政府，依家嘅權貴，就係想抹殺我哋城市嘅希望。佢哋要將一代人嘅政治權利搶走，要將抗爭者收入監牢。佢哋嘅目的，就係要香港人死左呢條心佢。我問大家一次，大家會唔會因為咁而死心呀？

今次選舉，我將自己既所有既未來都押上黎，因為我對香港市民有信心，「原本我唔需要選，所以我更加要贏。」慢必話：「原本你唔需要投票，所以311，大家更加要出來投票！」

今次選舉，我地背水一戰，呢場仗，許勝不許敗。政府要我哋死心，我地唔單止要贏，更加要用最強大民意，話番比政權聽，DQ周庭，係錯嘅！DQ羅冠聰，係錯嘅！DQ候選人，無論係本土派定係自決派，都係違反國際公約！

「可以卑微如塵土，不可屈曲似蛆蟲」今次嘅選舉，係法治同人治嘅對決，係民主同威權嘅對決，係真誠同謊言嘅對決。我係區諾軒，我而家向全港市民發出一個邀請，有請各位一齊同我一齊，係未來呢個星期邀請身邊既人投票，311，齊投票，守護制度公義，民主派四席全贏，多謝各位！