我被我綁架（上）
我今日好開心，去咗幾次面試，呢間國際大公司終於請咗我。
薪高糧準福利好，而且前途無限，不枉我奮鬥咗咁多年。
我一路行番屋企，一路回想我嘅經歷。
我想做一個出色嘅人，自細就努力讀書，畢業後又努力工作，幾乎無咩娛樂。
好彩，皇天不負有心人，我步步高昇，愈嚟愈有前途。
我老公阿峰，亦係一個出色上進嘅人，我哋都係親戚朋友羨慕嘅對象。
我趕住返屋企，同阿峰分享呢個好消息，就抄捷徑行入一條暗巷。
忽然間，我後腦一痛，然後眼前一黑，就咁失去意識。
醒番嗰陣，我手腳都被綁住，蒙眼塞口，完全唔知自己喺邊。
我唯一感受到嘅係，我全身赤裸，衫褲都俾人剝晒。
唔通我遇到色狼？佢會唔會先姦後殺？但周圍靜悄悄，似乎無人。
我逼自己冷靜落嚟，無論遇到咩事，我都要有足夠體力，先可以同壞人周旋。
我數住綿羊，瞓著咗。
醒番嗰陣，蒙面布縫隙透入一絲光亮，我諗已經過咗一晚。
無論係強姦、綁架定變態殺人，總要有人出現掛。
又過咗一日一夜，我滴水未進，身下早已被小便浸濕，我一生都無試過咁狼狽。
我努力想磨開身上嘅繩，但實在綁得太緊，徒勞無功。
唔通我會就咁喺度渴死，死得不明不白？
好彩，終於有人出現，蒙面布被解開，塞口嘅嘢都被拎出嚟。
然後我見到，我眼前有一個女人，一個生得同我一模一樣，並且著住我件衫嘅女人。
女人開咗一支礦泉水，直直倒落我個口裡面，我顧唔上儀態，張開口好似狗咁飲水。
乾涸嘅喉嚨得到滋潤，我終於可以問：「你係邊個？」
女人答：「我係你，我叫Jamie。」
「我唔係叫Jamie。」
「我知道，你叫Alice，但我哋嘅中文名一模一樣。」
Jamie微笑：「我係嚟自另一個平行時空嘅你，我細個都叫Alice，後來自己改咗英文名啫。」
改唔改英文名都係小事，我好急切咁講：「你點解要捉我？你快啲放我，我失蹤咁耐，我老公會報警。」
Jamie冷笑：「無人會報警，因為你根本無失蹤。依加我就係Alice。」
「你到底想點？」我倒抽一口涼氣，無論佢係唔係「平行時空嘅我」，但佢個樣同我一樣，其他人可能真係唔會發現。
「我想返屋企。」Jamie解釋，佢喺屋企瞓緊覺，無啦啦穿越咗嚟呢個時空，好想返去，但佢無身份證無錢，連生活都成問題，寸步難移。
我即刻講：「我可以幫你。」
我唔係呃佢，我平時都會捐錢啦，遇到啲咁離奇嘅事，我點會睇住「自己」餓死，一定會畀錢佢生活，幫佢諗辦法。
Jamie問：「我諗住買番我之前住嗰層樓，將成間屋裝修到我以前屋企咁，試吓可唔可以返到去。你會幫我？」
我一時語塞，買層樓至少都幾百萬，邊有咁樣幫人法。
Jamie冷笑：「求你幫手，邊有自己當家作主咁痛快？」
就因為咁，Jamie將我綁架嚟呢間爛屋度，取代我嘅身份？
「我仲想問你，銀行密碼係幾多。」Jamie咁樣講。
我扭過頭去，完全唔想理佢。
Jamie拎出一個飯盒，香氣飄入我嘅鼻腔，Jamie挑挑眉，意思好明顯。
唉，人在屋簷下，為咗生存落去，我只好老實答佢。
Jamie一路餵我食飯，一路講：「放心，我唔會殺你，我咁大個女都未殺過人，聽講處理屍體好麻煩。我會日日嚟餵飯。等我搵到辦法返屋企，我就會放你。」
我提醒佢：「你穿越嚟呢度，毫無徵兆。話唔定你會突然穿越番去，點嚟得切放走我？到時我一樣係餓死渴死。」
「點同呢？我都走咗，我唔駛處理屍體嘛。」Jamie輕描淡寫咁答。
我心寒，我點估得到，另一個平行時空嘅我，居然係咁冷血自私。
Jamie塞番我個口之前，我忍唔住講：「你打暈我之前，XX公司啱啱請咗我，嗰間係國際大公司，好有前途。」
「哦，我會推咗佢。」Jamie見我一臉震驚，加多句：「唔通我仲要去返工啊？」
自此之後，Jamie每日都會嚟餵飯，既會問我嘅事，亦會講吓佢喺出面做嘅事。
佢一句「我唔做啦」就辭咗職，仲到處問親友借錢，當然唔會還。
破壞容易建設難，我辛辛苦苦建立嘅名聲、搵番嚟嘅好工，俾佢毀於一旦。
下集：http://bit.do/e2qZh
將專頁設定為「搶先看」/ "See first"，最新故仔馬上睇！
買咗凶宅之後：https://goo.gl/DIQrI0
富狗綁架案：https://goo.gl/rW3rgm
#短故 #短篇 #小說 #陳美濤 #廣東話 #粵語 #tomatochan #我被我綁架
挑眉意思 在 挑眉注音在PTT/Dcard完整相關資訊 的推薦與評價
注音：. ㄊㄧㄠˇ 播放. 漢語拼音：. tiǎo. 解釋：. 1. 引動、舉起。 【例】挑眉立 ...眉目傳情- 教育部重編國語辭典修訂本字詞, 【眉目傳情】. 注音, ㄇㄟˊ ㄇㄨˋ ㄔㄨㄢˊ ... ... <看更多>