自從知道咗西營盤站延遲嘅秘密之後，我就再唔敢搭港島綫。（４）
守西營盤站夜更嘅第三晚，原先講好會交代一切嘅達叔居然請咗假，結果得返我一個睇住呢個充滿詭秘嘅車站。而漫漫長夜只係啱啱開始，馬上就出現異常情況──月台中央傳嚟敲打幕門嘅聲音。
為咗搞清楚自己到底係有幻覺定真係撞到「嘢」，我鼓起勇氣開住手機錄影走過去。終於到達聲音源頭，赫然發現敲打幕門嘅「人」並唔係身處喺月台，而係路軌上面。因為高低差，呢刻只可以見到有一隻喺到不斷拍幕門……（圖源自手機錄影）
－－－－－
上回連結：
http://bit.ly/1q6wQjN
－－－－－
咚咚……咚咚……
雖然無尋晚「達叔」嗰幕咁震撼，但仍然係相當嚇人。雖然雙腿又開始顫抖起嚟，但走到嚟呢一步，我決心要過去睇清楚係乜嘢一回事。
咚咚咚咚……咚咚……
隨即，我見到幕門另一面有一個嬌弱嘅身影，原來拍門嘅係一個少女，推斷年紀大約二十五歲左右……喺手機補光燈嘅照耀下，睇得出佢臉色蒼白非常虛弱。少女一注意到我馬上睜大雙眼，更加用力起勢去拍幕門。
確認清楚眼前呢個真係人之後，我心裡面嘅恐懼瞬間消失咗，取而代之係一大堆疑問。
「妳無事嘛？」我彎低身問，「點解妳會喺出面？！」
佢並無回答，而係用另一隻手指向嘴巴，然後搖搖頭。
「妳講唔到嘢？」
佢點咗下頭，顯得相當無助。見狀，我擺低手機企返起身，諗住睇下可唔可以用蠻力拉開道幕門，但係唔成功。
「係喇！」我突然醒起一點，「妳嗰邊應該係會有幕門拉掣，妳要開咗佢先可以拉開呢道門。」
佢馬上理解到我講緊嘢開始搜索起嚟，我喺另一邊利用手機電筒幫佢提供照明，好快就搵到拉掣嘅確實位置。然而，緊急拉掣原先係設計俾車廂入面嘅人用，所以企喺路軌上面嘅佢就算舉高手都掂唔到，有必要跳高去拉。對虛弱嘅佢可以話係好大嘅挑戰。
結果，一連跳咗好幾下都唔成功。
「妳再繼續試下！」我激動咁大喊，「我睇下有冇其他方法救妳！」
附近會唔會有嘢可以打爛道門？一係打電話叫消防嚟幫手，或者站務經理威哥……照計佢應該未係走到好遠，佢一定有辦法打開道門……
就喺我輸入號碼嘅一刻，我注意到月台末端傳嚟異樣。……係光，列車車頭燈傳嚟嘅光，而且越嚟越明顯，越嚟越接近，隨時都會到站……
見狀我大感錯愕，望返落去少女身上，佢呢刻一臉恐懼，停哂手腳。
「唔好停呀！」喺正月台中央，要佢走已經無可能，退去牆邊又唔知係咪真係保險，「妳要快啲拉到嗰掣，唔係就死硬！」
聞言，少女用盡氣力再跳多次，但都係唔成功，離個拉掣仲有一段距離。情況越嚟越危急，雖然明知好難，我都出哂盡力想試下扯唔扯得開道門……
越嚟越近了，我開始聽到轟隆轟隆嘅列車聲，整個月台都開始震起嚟，少女條命危在旦夕……
「啊啊啊啊啊！！」
終於，如同奇蹟一般，我成功將幕門拉開一呎到嘅距離，喺關鍵一刻伸出手將少女拉上嚟。下一秒，列車已經駛到嚟少女剛才身處嘅位置，幾秒後就穿過呢個西營盤站，並無剎車亦都無停到站。
「到底搞咩呀？點解凌晨時份仲會有車……」
疑問，俾少女嘅抽泣聲打斷咗。呢刻佢躺住喺地板上面，全身顫抖得好厲害，眼淚不停係咁流……稍微睇清楚，佢身上面嗰套好似係地鐵嘅職員制服嚟，但外套明顯係唔啱碼大得多。
「水……」就喺下一瞬間，突然傳來少女虛弱而沙啞嘅聲音。
「水？」原來佢並唔係講唔到嘢，只係缺水口乾。「妳等我一陣，我而家即刻去倒杯水俾妳。」
然而行咗兩步我又猶豫起嚟，記得之前嗰堆腳印就係轉個頭就唔見咗，大概天井位嘅「達叔」情況都係一樣（所以先無報導）。如果我呢刻走去拎水，會唔會轉個頭就再見唔返呢個少女？
為咗確保唔會發生呢種情況，我返轉頭彎低身同少女講：「不如等我孭妳過去？」
少女點頭回應，就係咁，我將佢孭上背脊帶返去職員休息室，一到步就即刻斟杯水俾佢。雖然逃過大難，但少女睇落仍然心有餘悸，差少少就揸唔穩水杯跌落地。
「好返少少未？」見佢飲咗幾啖之後，我問。
少女無回答，當我拎起手機諗住打去叫白車嘅時候，佢突然喝止我：「唔好打電話！」
「吓？我諗住打電話去醫院……」
「唔好，」少女全身又開始不停顫抖，「唔好……你打嘅話……就會俾『佢地』發現到……」
「佢地？妳指邊班人？」我不解。
「唔好……」少女垂低頭，用空洞的雙眼盯住杯中搖晃嘅水波，
「我唔想再俾佢地捉走……」
（待續）
互動時間，請投票，你地嘅決定將會影響故事的發展，甚至主角的人身安全（？）
<3 (Love) - 問清楚少女到底發生咩事
:D (Haha) - 堅持打電話去醫院
:o (Wow) - 堅持打電話，但係打俾達叔
:'( (Sad) - 行出休息室俾少女一個人冷靜下
Like - 隨便一個（盡量唔好啦～）
票數夠 200 繼續，夠 300 以上會加速，50 shares 以上下篇加字數 O:)
＝＝＝＝＝＝＝＝＝＝＝＝＝＝＝＝＝＝＝＝＝
有咩都可以留言，我會盡可能覆哂佢！
（帶定頭盔先：本故事純屬虛構，如有雷同應該巧合。）
FB： 有心無默
個人ac：（歡迎 follow）
https://www.facebook.com/myechoofheart
IG：echoofheart
