《權貴的血，是藍色嗎？》
我係一個定期捐血嘅人，最近有朋友傳送一段關於紅十字會嘅特別捐血新聞比我，同我講：「你睇吓紅十字會點去幫權貴服務，有錢人出事就有特別捐血活動地場同安排。」
睇完篇新聞，我諗左好一陣，問自己仲會唔會去捐血。
動物農莊入面有一句名言：「所有動物都是平等的，但有些動物比其他動物更加平等。」
年中有病嘅人好多，需要救助嘅人每日都有，但擁有特別待遇嘅人就係少數。
公平嗎？唔公平啊。
救人，係一種道德，無人會眼見一個人死亡而自己可以伸出援手但視而不見，問題係，我嘅救助到底以邊個準則去判斷俾邊個？先到先得？由醫護人員判斷邊個更有生命危險？定後面自己有一套人治原則去運作？
更多人偏向信最後一種，因為香港，甚至資本社會中，我地從心底都唔相信有公平，問題係，你唔公平會唔會做到出面。
但今次既不公，感覺係放到上明面，所有曾經需要救助嘅人都會諗，點解自己無呢種待遇？因為你有錢？因為你有權？
當然，可能紅十字會曾經對於其他患者都推出過特別宣傳，呢層我無從驗證，但問題都係，用咩標準同準則去推出特別宣傳呢？
捐血又好，骨髓又好，都唔會有咩特別獎金，你捐完血最多都係有餅同飲品比你飲，定期捐血會有小禮物，都唔係貴重嘅野。
捐，真係一種自發嘅行為，不求回報，但求心安幫人。
呢十年八年，捐血呢個行為愈來愈反感，好多人有唔同嘅指控，我只可以話，無論指控係直係假，觀感上你令人卻步，就係卻步，透明、公平、澄清一定係令人唔滿意先會令人有呢種想法。
令人反感，唔應該去怪責民眾唔理解、偏激等等，應該去檢討自己有邊方面做得唔好。
答返上面嘅問題，我仲會唔會去捐血。
答案係，會。
都係個句，細佬同阿媽都做過大手術，佢地用過幾多血我唔知，但用過就肯定係有人捐出黎，絕唔係憑空出現，或者係責任，係義務，我可以幫佢地還到幾多咪幾多。
捐血個陣，我從來都會指明，我嘅血只可以俾年收入30萬以下嘅人使用，俾家中有定期捐血嘅人使用，權貴唔用得，有案底唔用得等等，而我亦唔可能指明俾邊個用。
對我講，就算係俾一個我認為係仆街嘅人用左，我都無話可說。
我捐，可能會俾唔喜歡嘅人用；我唔捐，可能會有無辜同需要嘅人無血用，令一個家庭傷心欲絕。
兩害取其輕，每個人都有輕重之分，對我講，我仲會捐。
但人人條線都唔同，有人取其輕之後，認為唔捐，都係一種取捨，無罪可言。
當有部份動物比另一部份動物更平等時，其實已經可以分成兩個族群，得出嘅只有一個結果，非我族類，為何要救？我嘅血係紅色，你嘅係藍色，應該唔啱你用。
－－－－－－－－－－－－－－－－－－－－－－－
連載故事《離婚挽救系統》一至三回連載中：
https://www.facebook.com/photo?fbid=349030749921809&set=a.275594140598804
支持作者可以：
訂購我過往的作品，連結如下
https://bit.ly/3fL9QUH
